Xana Timbhoni Ta Yehovha Ti Ni Milawu Loko Swi Ta eMhakeni Ya Ku Rhandzana?

Timbhoni ta Yehovha ti tshemba leswaku milawu ni swileriso leswi nga eBibeleni swi nga hi pfuna ku endla swiboho leswi tsakisaka Xikwembu ni leswi hi vuyerisaka. (Esaya 48:17, 18) A hi hina hi vekeke milawu ni swileriso leswi, kambe hi hanya hi swona. Xiya ndlela leyi swin’wana swa swona swi fambisanaka ha yona ni mhaka ya ku rhandzana.a

• Vukati i xiboho xa vutomi hinkwabyo. (Matewu 19:6) Leswi Timbhoni ta Yehovha ti langutaka ku rhandzana ku ri ndlela leyi nga ta endla leswaku lava rhandzanaka va tekana, hi ku teka ku ri ka nkoka.

• Ku rhandzana i ka lava ntsena va kuleke ku ringana lerova va nga tekana. Vanhu vo tano va “hundzile eka vurhumbuki bya vuntshwa” kumbe eka ku navela lokukulu ka rimbewu.​—1 Vakorinto 7:36.

• Lava rhandzanaka va fanele va va va nga ri na lexi va sivelaka ku nghenela vukati. Vanhu van’wana lava dlayeke vukati hi ku ya hi nawu, Xikwembu a xi va languti va ri lava fanelekaka ku tlhela va nghenela vukati, tanihi leswi nawu wu kombisaka xivangelo xin’we ntsena xo dlaya vukati ku nga ku endla timhaka ta masangu ni loyi u nga tekanangiki na yena.​—Matewu 19:9.

• Vakreste lava lavaka ku nghenela vukati va lerisiwa ku tekana ntsena ni mupfumerikuloni. (1 Vakorinto 7:39) Timbhoni ta Yehovha ti languta xileriso lexi tanihi lexi nga kombeteliki eka munhu loyi a xiximaka leswi hi pfumelaka eka swona ntsena kambe eka loyi a nga Mbhoni leyi khuvuriweke. (2 Vakorinto 6:14) Minkarhi hinkwayo Xikwembu xi kongomise vagandzeri va xona leswaku va tekana ntsena ni lava nga ni ripfumelo leri fanaka. (Genesa 24:3; Malakiya 2:11) Hambi ku ri valavisisi va manguva lawa na vona va kume xileriso lexi xi ri lexi tirhaka.b

• Vana va fanele va yingisa vatswari va vona. (Swivuriso 1:8; Vakolosa 3:20) Eka vana lava ha tshamaka ni vatswari va vona, xileriso lexi xi katsa ku yingisa swiboho swa vona malunghana ni ku rhandzana. Leswi swi nga ha katsa malembe lawa n’wana wa vona wa jaha kumbe wa nhwana a nga sungulaka ku rhandzana a ri na wona ni swiendlo leswi a nga ta pfumeleriwa ku swi endla.

• Hi ku ya hi nkongomiso wa Matsalwa, Timbhoni ti pfumeleriwa ku tihlawulela loko ti lava ku rhandzana swin’we ni loyi ti lavaka ku rhandzana na yena. Leswi swi pfumelelana ni nawu lowu nge: “Un’wana ni un’wana u ta rhwala ndzhwalo wakwe.” (Vagalatiya 6:5) Nilokoswiritano, loko swi ta emhakeni ya ku rhandzana, hi vutlhari vo tala va lava ndzayo eka Timbhoni leti wupfeke leti va navelelaka leswinene.​—Swivuriso 1:5.

• Swiendlo swo tala leswi hi ntolovelo swi fambisanaka ni ku rhandzana entiyisweni i swidyoho leswikulu. Hi xikombiso, Bibele yi hi lerisa leswaku hi papalata ku endla timhaka ta masangu ni munhu loyi u nga tekanangiki na yena. Leswi a swi katsi sweswo ntsena kambe swi katsa ni swiendlo swin’wana swo tanihi ku khomakhoma swirho swa rimbewu swa munhu un’wana kumbe ku hlanganyela rimbewu hi nomu kumbe hi hala mahosi. (1 Vakorinto 6:9-11) Hambi ku ri swiendlo leswi pfuxaka ku navela ku endla timhaka ta masangu ni munhu loyi u nga tekanangiki na yena i “thyaka” leri nga xi tsakisiki Xikwembu. (Vagalatiya 5:19-21) Bulo leri nga riki rinene leri katsaka “mavulavulelo lama thyakeke” na rona ra soriwa eBibeleni.​—Vakolosa 3:8.

• Mbilu kumbe munhu wa le ndzeni, ya kanganyisa. (Yeremiya 17:9) Yi nga endla munhu a endla swilo leswi a swi tivaka leswaku a hi swinene. Leswaku va sivela timbilu ta vona leswaku ti nga va kanganyisi, vanhu lava rhandzanaka va nga papalata ku va voxe etindhawini leti nga endlaka leswaku va ringeka. Va nga ha hlawula ku landzela swilemukiso swo tano leswi twisisekaka swo tanihi ku tshama laha ku nga ni vanhu kumbe ku va ni nxangwani leyi fanelekaka. (Swivuriso 28:26) Vakreste lava nga nghenelangiki vukati lava lavaka munghana wa vukati va xiya makhombo lama nga kona etindhawini to lava munhu loyi va nga rhandzanaka na yena eka Internet, ngopfungopfu khombo ro aka vuxaka ni munhu loyi u nga tiveki swo tala hi yena.​—Pisalema 26:4.