VANTSHWA VA VUTISA
Ku Rhandzana—Xiyenge 1: Xana Ndzi Swi Lunghekerile Ku Rhandzana?
Eka nhlokomhaka leyi
I yini ku rhandzana?
Vanhu vo tala va teka ku rhandzana ku ri nchumu wo hungasa ha wona. Hambiswiritano, eka nhlokomhaka leyi “ku rhandzana” swi vula nkarhi lowu lava ha tivanaka va wu hetaka va ri swin’we ku vona loko va ta fanelekela ku tekana. Kutani ku rhandzana swi ni xikongomelo. A ko va ndlela yo titsakisa ntsena ni munhu wa rimbewu leri hambaneke ni ra wena.
Hi ku famba ka nkarhi lava rhandzanaka va fanele va endla xiboho xo cata kumbe xo herisa vuxaka byebyo. Loko u sungula ku rhandzana u fanele u lunghekela switandzhaku leswi nga ta va kona.
Leswi u faneleke u swi tsundzuka: Loko u tiyiseka leswaku u swi lunghekerile ku rhandzana, u fanele u tlhela u tiyiseka leswaku u swi lunghekerile ku nghenela vukati.
Ku rhandzana u nga ri na xikongomelo xo nghenela vukati swi fana ni ku ya eka inthavhiyu u nga ri eku laveni ka ntirho
Xana u swi lunghekerile ku rhandzana?
Ku rhandzana swi nga endla leswaku u nghenela vukati kutani u fanele u byi kambisisa kahle vumunhu lebyi u nga na byona. Hi xikombiso, xiya leswi landzelaka:
Ku hanyisana kahle ni vandyangu. Ndlela leyi u va khomaka hayona vatswari va wena ni vamakwavo ngopfungopfu loko u tshikilelekile yi kombisa ndlela leyi u nga ta n’wi khoma hayona munghana wa wena wa vukati.
Nsinya wa nawu wa le Bibeleni: “Cukumetani ku leva hinkwako, ku hlundzuka, vukarhi, huwa ni nhlambha ku katsa ni vubihi hinkwabyo.”—Vaefesa 4:31.
Tivutise: ‘Xana vatswari va mina ni vamakwavo va nga vula leswaku ndza va xixima? Loko hi nga pfumelelani hi nchumu wun’we, xana ndza swi kota ku va la rhuleke kumbe ndza va holovela?’
Loko u nga swi koti ku lulamisa swiphiqo ni vatswari va wena, xana u ta swi kota loko u ri ni nkataku?
Ku titsona swo karhi. Loko u catile, u ta xiya ni ku endla leswi mikarhi yin’wana nkataku a swi lavaka.
Nsinya wa nawu wa le Bibeleni: “Un’wana ni un’wana a a endle leswi pfunaka ni van’wana, ku nga ri leswi pfunaka yena ntsena.”—1 Vakorinto 10:24.
Tivutise: ‘Xana ndzi endla swilo hi ndlela leyi ndzi swi lavaka hayona? Xana van’wana va ndzi tiva ndzi ri la anakanyelaka? Xana ndzi swi kombise njhani leswaku ndzi teka swilaveko swa van’wana swi ri swa nkoka eka swa mina?’
Ku titsongahata. Munghana lonene wa vukati u amukela swihoxo swakwe ni ku kombela ku rivaleriwa.
Nsinya wa nawu wa le Bibeleni: “Hinkwerhu hi endla swihoxo ko tala.”—Yakobo 3:2.
Tivutise: ‘Xana ndza swi amukela swihoxo swa mina kumbe ndza tiyimelela? Xana ndza hlundzuka loko vanhu va ndzi tsundzuxa ndlela leyi ndzi nga antswisaka hayona?’
Swa timali. Munhu loyi a kotaka ku tirhisa mali kahle u papalata timholovo leti nga bohiki evukatini.
Nsinya wa nawu wa le Bibeleni: “I mani eka n’wina loyi loko a lava ku aka yindlu a nga rhangiki hi ku hlayela swilo hinkwaswo leswi lavekaka ku vona loko a ri ni mali leyi ringaneke ku yi heta?”—Luka 14:28.
Tivutise: ‘Xana ndza swi kota ku lawula ndlela leyi ndzi tirhisaka mali hayona kumbe ndzi tshama ndzi ri eswikweletini? Xana ndzi swi kombise njhani leswaku ndza swi kota ku tirhisa mali hi vutlhari?’
Ku va ni vuxaka lebyinene na Yehovha. Loko u ri Mbhoni ya Yehovha, u fanele u dyondza Bibele nkarhi ni nkarhi ni ku ya etinhlengeletanweni ta Vakreste.
Nsinya wa nawu wa le Bibeleni: “Va tsaka lava tikarhatelaka ku va ni vuxaka ni Xikwembu.”—Matewu 5:3.
Tivutise: ‘Xana ndzi rhangisa ku tiyisa ripfumelo ra mina? Xana ndzi teka ku gandzela Yehovha ku ri nchumu wa nkoka evuton’wini bya mina kumbe ndzi pfumelela swilo swin’wana leswaku swi ndzi kavanyeta?’
Leswi u faneleke u swi tsundzuka: Munhu loyi u cataka na yena u faneriwa hi munghana lonene wa vukati. Loko u tikarhatela ku va munhu wo tano, swi ta ku olovela ku kuma munhu loyi a endlaka leswi fanaka.