Leswi Hi Swi Dyondzaka Eka Ntumbuluko

“Mintirho ya wena yi tele swinene, Wena Yehovha! Hinkwayo ka yona u yi endle hi vutlhari.”—Pisalema 104:24.

VANHU vo tala va tirhisa rito leri nge “ntumbuluko” ku kombetela eka xihlovo xa swilo leswi hanyaka. Hi xikombiso, magazini wa Scientific American wa March 2003 wu te: “Eka swilo hinkwaswo leswi tumbuluxiweke hi ntumbuluko swo funengeta miri, tinsiva hi tona ti hlamarisaka swinene naswona ti nga ni mixaka yo hambana-hambana ngopfu.” Hambileswi mutsari yoloye a nga ha ehleketaka leswaku ntumbuluko ko va matimba ntsena, u vula leswaku ntumbuluko wu ‘tumbuluxe’ tinsiva. Xana matimba ma nga tumbuluxa swilo?

Ku “tumbuluxa” swi vula ku “kunguhata (nchumu) hi xikongomelo xo karhi emiehleketweni.” (The New Oxford Dictionary of English) I munhu ntsena la nga tumbuluxaka ni ku endla swilo. Tanihi leswi vaendli va swilo va nga ni mavito, Muvumbi na yena u ni vito. Yehovha i Muvumbi wa swilo swa ntumbuluko. Hi yena “La nge Henhla-henhla emisaveni hinkwayo,” la ‘tumbuluxeke swilo hinkwaswo.’—Pisalema 83:18; Nhlavutelo 4:11.

I yini leswi hi swi dyondzaka eka ntumbuluko? Nchumu lowukulu lowu hi wu dyondzaka eka wona wu malunghana na Yehovha swin’we ni timfanelo takwe leti hlamarisaka, nileswaku u ni vutlhari. “Timfanelo ta xona leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona.” (Varhoma 1:20) Ntumbuluko wu hi dyondzisa leswaku Xikwembu xi tlharihe ngopfu ku hi tlula. Loko xi kota ku tumbuluxa swilo ku tlula vanhu lava endlaka swilo, xana a swi twali ku vula leswaku xi nga hi nyika switsundzuxo leswinene ku tlula vanhu?

Swilo swa ntumbuluko a hi yona ndlela ya xisekelo leyi Xikwembu xi yi tirhisaka ku nyika vanhu switsundzuxo swa xona kambe xi tirhisa Rito ra xona ku nga Bibele. Xana u ehleketa yini? Xana Muvumbi la vumbeke swirho swa hina swo vulavula a nga rhandza ku vulavula na hina? Swi vonaka swi fanerile ku vula leswaku wa swi rhandza. Bibele yi ri: “Matsalwa hinkwawo ma huhuteriwe hi Xikwembu.”—2 Timotiya 3:16.

Loko u kuma leswaku swa ku tsakisa ku dyondza hi vanhu lava endlaka swilo, u ta kuma leswaku swi tsakisa ni ku tlurisa ku dyondza hi Muvumbi. Hi xikombiso, a swi kanakanisi leswaku wa swi lava ku tiva tinhlamulo ta swivutiso swo fana ni leswi nge: Hikwalaho ka yini hi xaniseka kutani hi fa? Xana lexi hi xona xikongomelo xa Xikwembu hi vanhu? Loko swi nga ri tano, ha yini Xikwembu xi pfumelela leswaku vanhu va xaniseka?

Ku nga khathariseki leswaku va pfumela kumbe e-e, van’wasayense va dyondze eka Yehovha ku endla swilo. Na wena u nga dyondza swo tala eka Muvumbi wa hina. Hi xikombiso, u nga ha dyondza ndlela yo hlayisa vukati lebyi tiyeke, yo kurisa vana hi ndlela leyinene, nileswaku hi xihi xikongomelo xa Xikwembu hi misava ni swilo swo tala leswi nga endlaka leswaku vutomi bya wena byi va ni xikongomelo. Buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha, yi nga ku pfuna leswaku u vuyeriwa swinene hi ku dyondza Rito ra Xikwembu.