Ta Rivala
“Vanhu lava nga dzahiki fole, lava hanyeke kahle emirini, lava nwaka byala hi ku ringanisela ni lava dyaka mihandzu kumbe matsavu ka ntlhanu hi siku va hanya malembe ya 14 lama engeteleke hi xiringaniso, ku tlula lava nga swi endliki sweswo.” Mhaka leyi va yi kume eka nkambisiso lowu tekeke malembe ya 11 lowu va wu endleke eka vanhu va 20 000.—MAGAZINI WA UC BERKELEY WELLNESS LETTER, LE U.S.A.
“Ku hlaya i ndlela leyinene yo wisa. . . . Hambi ku ri ku hlaya timinete ta tsevu swi ringene leswaku u hunguta ntshikilelo hi tiphesente leti tlulaka 66.”—MAGAZINI WA INDIA TODAY INTERNATIONAL, LE INDIA.
Mabyatso Lama Tshikiwaka eLwandle
Loko phepha-hungu ra The New York Times ri vulavula hi xiyimo xa le United States ri ri: “Ku wa ka ikhonomi ku endle leswaku vanhu va tshika mabyatso ya vona elwandle.” Vini va mabyatso va hutha mavito eka mabyatso ya vona, va susa tinomboro ta wona kutani va ma tshika elwandle kumbe va ma mbombomerisa, minkarhi yin’wana va swi endla hi xikongomelo xo lava ku kuma mali ya ndzindza-khombo. Ha yini va endla tano? Phepha-hungu leri ri vula leswaku “vini va wona van’wana . . . va ni xiphiqo lexi fanaka ni xa vini va tiyindlu lava tsandzekaka ku hakela mali leyi va yi lombeke ebangi leswaku va xava yindlu: va boheka ku hakela mali yo tala ya mabyatso lawa ma nga ha riki na ntikelo kutani va hlawula ku nga ha ma hakeleli,” naswona ri vula leswaku mabyatso wolowo “i switlangisi leswi durhaka ngopfu ku swi khathalela leswi nga ha rhandziwiki.” Phepha-hungu leri ri ri: “Vini va wona a va va kumi vanhu vo ma xava hikuva va tele lava ma xavisaka. Va nge swi koti ku tirhisa madzana ya tidolara hi n’hweti va hakelela ndhawu laha mabyatso ma tshamaka kona ni ku ma khathalela. Naswona a va na wona magidi ya tidolara lama lavekaka leswaku ma cukumetiwa hi ndlela leyi faneleke.”
Tindzumulo Ti Karhateka Hi Miri Ya Tona
Phepha-hungu ra Sunday Telegraph ra le dorobeni ra Sydney ri vika leswaku vana lava nga ni malembe ya mune ntsena va “ringeta ku cinca mimiri ya vona leswaku yi fana ni leyi vanhu va vulaka leswaku yi vumbeke kahle.” Nkambisiso wa ndlela leyi tindzumulo ti dyaka ni ku endla vuolori ha yona wu kume leswaku vafana ni vanhwanyana va karhatekile hi mimiri ya vona—vanhwanyana va karhateke hi ku hunguta miri kasi vafana va karhateke hi ku va ni tinyama. Vaendli va nkambisiso wolowo va te: “Swi tikomba mavonelo lawa vana va nga na wona malunghana ni mimiri ya vona ma fana ni ya vamana wa vona [lava] va nga tsakisiwiki hi ndlela leyi mimiri ya vona yi nga xiswona.”
Vana Va Xava Swilo Eka Internet
Phepha-hungu ra The Daily Telegraph ra le dorobeni ra London ri vike ri ku: “Vana lava endlaka tiphesente ta ntlhanu [eUnited Kingdom] va xava swilo eka Internet handle ka mpfumelelo wa vatswari naswona hafu ya vana volavo va tirhisa makhadi ya swikweleti ya vatswari va vona.” Vana vo tala va tiva ti Website leti vatswari va vona va xavaka eka tona ni marito lawa va nghenaka ha wona eka tona—leswi nga ha tlhelaka swi va olovisela ku kuma nomboro ya khadi ra xikweleti ra vatswari va vona. Vatswari vo hlayanyana va ehleketa leswaku vana va vona va nga xava swilo eka Internet handle ko kuma mpfumelelo wa vona. Xiviko xin’wana xi vule leswaku ku ni ku “hambana lokukulu” exikarhi ka swilo leswi vatswari va ehleketaka leswaku vana va vona va swi tiva ni leswi vana va vona kahle-kahle va swi tivaka. Rin’wana ra makhombo ya sweswo ku nga ha va ku veka vatswari ekhombyeni ra leswaku ku tirhisiwa rungula ra vona hi vukanganyisi. Xitsundzuxo eka vatswari lava xavaka swilo eka Internet hi lexi: “Papalata ku veka rungula ra khadi ra wena ra xikweleti eka Internet,” nghena ntsena eka ti Website leti tshembiwaka naswona ti pfale loko u hetile.”