Vantshwa Va Vutisa

I Yini Leswi Ndzi Nga Swi Endlaka Leswaku Ndzi Titshemba?

INA E-E

Xana u titwa onge vanhu va ku rhandza? ◯ ◯

Xana wa ri khathalela rihanyo ra wena? ◯ ◯

Loko u hlamule swivutiso swo hlayanyana leswi nga laha henhla hi e-e, swi nga ha vula leswaku ku nga titshembi swi ku pfala mahlo lerova u nga ti voni timfanelo ta wena letinene. Xihloko lexi xi ta ku pfuna leswaku u vona timfanelo teto!

VANTSHWA vo tala va karhateka malunghana ni ndlela leyi va langutekaka ha yona, vuswikoti bya vona swin’we ni ndlela leyi va nga tifanisaka ha yona ni tintangha ta vona. Xana na wena u titwaka hi ndlela yoleyo? Loko swi ri tano, a hi wena ntsena!

● “Ku nga hetiseki ka mina swa ndzi tshikilela. Hi ntolovelo hi mina ndzi tixopaxopaka ngopfu.”—Leticia.a

● “Ku nga khathariseki leswaku u saseke ku fikela kwihi, minkarhi hinkwayo u hlangana ni van’wana lava sasekeke ku ku tlula.”—Haley.

● “Ndza karhateka swinene loko ndzi ri exikarhi ka vanhu van’wana. Ndzi chava leswaku vanhu va ta ehleketa leswaku a ndzi pfuni nchumu.”—Rachel.

Loko u titwa hi ndlela leyi fanaka ni ya lava boxiweke laha henhla, u nga heli matimba. U nga wu kuma mpfuno. Kambisisa swilo swinharhu leswi nga ku pfunaka leswaku “u titshemba.”

1. Endla Vanghana Lavanene

Tsalwa-nkulu. “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.”—Swivuriso 17:17.

Leswi vulaka swona. Munghana lonene a nga va museketeri lonkulu hi minkarhi ya maxangu. (1 Samuwele 18:1; 19:2) Hambi ku ri ku ehleketa leswaku munhu wo karhi wa khathala ha wena swi nga ku khutaza. (1 Vakorinto 16:17, 18) Kutani endla xinghana ni vanhu lava nga ta ku susumetela ku endla leswinene.

“Vanghana lavanene va ta ku khutaza.”—Donnell.

“Minkarhi yin’wana, nchumu wa nkoka swinene i ku tiva leswaku munhu wo karhi wa khathala swinene ha wena. Sweswo swi nga ku endla u titwa u ri wa nkoka.”—Heather.

Xalamuka: Tiyiseka leswaku a wu tumbeti leswi u nga xiswona hileswi u lavaka ku rhandziwa hi vanghana va wena. (Swivuriso 13:20; 18:24; 1 Vakorinto 15:33) Ku hlanganyela eka swiendlo leswi hoxeke hikwalaho ko lava ku tsakisa van’wana swi ta ku endla u titwa u tisuse xindzhuti ni leswaku vanhu volavo va tlange ha wena.—Varhoma 6:21.

Leswi nga ku pfunaka. Laha hansi, tsala vito ra munghana wa wena la nga ku khutazaka leswaku u titshemba.

․․․․․

Ha yini u nga hleli ku heta nkarhi ni munhu loyi u tsaleke vito rakwe? Xiya: A swi bohi leswaku munhu yoloye a ringana na wena hi malembe.

2. Endlela Van’wana Swilo

Tsalwa-nkulu. “Ku nyika swi tisa ntsako lowukulu ku tlula ku amukela.”—Mintirho 20:35.

Leswi vulaka swona. Xandla famba, xandla vuya. Xana sweswo swi vula yini? Xivuriso xa le Bibeleni xi ri: “Moya-xiviri lowu hananaka wu ta nonisiwa, ni loyi a cheletaka van’wana mahala na yena u ta cheletiwa mahala.” (Swivuriso 11:25) I ntiyiso leswaku loko u pfuna van’wana u ta tsaka!b

“Ndzi ehleketa hi swilo leswi ndzi nga swi endlelaka van’wana naswona ndzi ringeta ku pfuna van’wana lava lavaka mpfuno evandlheni. Ku komba van’wana rirhandzu ni ku heta nkarhi na vona swa ndzi tsakisa.”—Breanna.

“Ntirho wo chumayela wa tsakisa hikuva wu ku susumetela ku tshika ku ehleketa hi wena n’wini kutani u ehleketa hi vanhu van’wana.”—Javon.

Xalamuka: U nga pfuni van’wana hi xikongomelo xo lava leswaku na wena va ku endlela swo karhi. (Matewu 6:2-4) Ku nyika van’wana swo karhi hi xikongomelo lexi hoxeke a swi nge ku pfuni nchumu. Hi ntolovelo vanhu va swi vona loko u va nyika swo karhi hi xikongomelo lexi hoxeke!—1 Vatesalonika 2:5, 6.

Leswi nga ku pfunaka. Ehleketa hi munhu loyi u n’wi pfuneke enkarhini lowu hundzeke. A ku ri mani munhu wa kona naswona u n’wi endlele yini?

․․․․․

Xana u titwe njhani endzhaku ko n’wi pfuna?

․․․․․

Ehleketa hi munhu un’wana loyi u nga n’wi pfunaka naswona tsala ndlela leyi u nga n’wi pfunaka ha yona.

․․․․․

3. U Nga Heli Matimba Loko U Endla Swihoxo

Tsalwa-nkulu. “Hinkwavo va dyohile, naswona va kayivela ku vangama ka Xikwembu.”—Varhoma 3:23.

Leswi vulaka swona. I ntiyiso leswaku a wu hetisekanga. Sweswo swi vula leswaku ku ta va ni minkarhi leyi u nga ta vula kumbe u nga ta endla nchumu lowu hoxeke. (Varhoma 7:21-23; Yakobo 3:2) Hambileswi u nga taka u nga swi papalati ku endla swihoxo, u nga lawula leswi u swi endlaka loko wo tshuka u swi endla. Bibele yi ri: “Lowo lulama a nga ha wa ka nkombo, kunene u ta pfuka.”—Swivuriso 24:16.

“Minkarhi yin’wana hi hela matimba loko hi tiringanisa ni vanhu lava nga ni vuswikoti lebyi hina hi nga riki na byona.”—Kevin.

“Un’wana ni un’wana u ni timfanelo letinene ni leto biha. Hi fanele hi tinyungubyisa hi timfanelo letinene leti hi nga na tona kutani hi tikarhatela ku cukumeta leto biha.”—Lauren.

Xalamuka: U nga endli xidyoho kutani u tiyimelela hileswaku a wu hetisekanga. (Vagalatiya 5:13) Loko u endla swilo swo biha hi vomu swi ta endla leswaku u nga amukeriwi hi munhu wa nkoka swinene, ku nga Yehovha Xikwembu!—Varhoma 1:24, 28.

Leswi nga ku pfunaka. Laha hansi, tsala timfanelo leti u nga tsakelaka ku ti hlakulela.

․․․․․

Tsala siku ra namuntlha etlhelo ka mfanelo leyi u yi tsaleke. Endla ndzavisiso malunghana ni ndlela leyi u nga yi hlakulelaka ha yona naswona u tikambisisa endzhaku ka n’hweti.

Ndlela Leyi U Nga Wa Nkoka Ha Yona

Bibele yi vula leswaku “Xikwembu i xikulu eka timbilu ta hina.” (1 Yohane 3:20) Leswi swi vula leswaku xi nga vona ndlela leyi u nga wa nkoka ha yona leyi wena swi nga ha ku tikelaka ku yi vona. Kambe xana ku nga hetiseki ka wena ku cinca ndlela leyi u nga wa nkoka ha yona? A hi nge u ni mali ya R100 leyi handzukeke katsongo. Xana u nga yi cukumeta kumbe u yi teka yi nga pfuni nchumu hileswi yi handzukeke katsongo? Nikatsongo! Ya ha ri R100 hambi yi handzuke katsongo kumbe yi nga handzukanga.

Swi fana ni ndlela leyi Xikwembu xi ku tekaka u ri wa nkoka ha yona. Xa ma xiya matshalatshala lawa u ma endlaka leswaku u xi tsakisa naswona xa ma tlangela, ku nga khathariseki leswaku ma nga ha vonaka ma nga pfuni nchumu eka wena! Entiyisweni, Bibele ya hi tiyisekisa leswaku “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.”—Vaheveru 6:10.

Swihloko swin’wana leswi nge “Vantshwa Va Vutisa” swi kumeka eka Website leyi nge www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

Xana u ta endla yini loko u sungula ku titwa u hela matimba hileswi

● Vanghana va wena va ku xopaxopaka?

● U vonaka onge a wu endli kahle ku fana ni van’wana?

● U tikombaka onge u vona ntsena swihoxo swa wena?

[Marito lama tshahiweke exihlokweni lama nga eka tluka 27]

“Munhu a nga va a saseke ngopfu kambe a tivona onge u bihile. Kumbe munhu a nga va a bihile kambe a ehleketa leswaku u saseke ngopfu. Langutelo ra hina hi rona ri nga ta lawula ndlela leyi hi titekaka ha yona.”—Alyssa

[Bokisi/Swifaniso leswi nga eka tluka 27]

LESWI TINTANGHA TA WENA TI SWI VULAKA

“Hambi ku ri yindlu leyi tiyeke ngopfu yi lava ku tiyisiwa naswona minkarhi yin’wana yi lava ku lunghisiwa. Hakanyingi marito lama tsakisaka ya munghana hambi ku ri ku n’wayitela kumbe ku angarhiwa, hi swona leswi a swi ndzi tiyisa.”

“Ematshan’weni yo twa ku vava hileswi van’wana va nga ni timfanelo letinene, hi nga vuyeriwa eka tona hilaha na vona va nga vuyeriwaka hakona eka ta hina.”

[Swifaniso]

Aubrey

Lauren

[Xifaniso lexi nga eka tluka 28]

Loko mali yi handzukenyana a swi yi endli yi nga ha pfuni nchumu. Ni ku nga hetiseki ka wena a ku ku endli u nga ha vi wa nkoka eka Xikwembu