“Mi Nga Tshuki Mi Vilela Hi Swa Mundzuku”

Renée a a twa onge a nge he swi koti ku lawula ku vilela kakwe. Nuna wakwe Matthew se a a ri ni malembe yo tlula manharhu a nga wu kumi ntirho lowu khomelelaka. Renée u ri: “A ndzi karhatekile naswona ndzi hele matimba swinene hileswi a ndzi nga swi tivi leswaku hi ta humeleriwa hi yini!” Matthew u ringete ku chavelela nsati wakwe hi ku n’wi hlamusela leswaku minkarhi hinkwayo va swi kuma swilaveko swa vona swa nyama. Renée u n’wi hlamule a ku: “Kambe ni sweswi a wu si wu kuma ntirho! Hi lava mali.”

ASWI kanakanisi leswaku loko vanhu va lahlekeriwa hi ntirho swa va vilerisa. Munhu la nga tirhiki a nga tivutisa a ku: ‘Xana ndzi ta tshama ku fikela rini ndzi nga tirhi? Xana hi nga swi khathalela njhani swilaveko swa ndyangu wa hina loko hi nga si wu kuma ntirho?’

Hambileswi ku vilela ko tano ku tolovelekeke, Yesu Kreste u nyikele xitsundzuxo lexi twalaka lexi nga pfunaka vanhu leswaku va nga vileli. U te: “Mi nga tshuki mi vilela hi swa mundzuku . . . Ku karhateka ka siku rin’wana ni rin’wana, ku ringene rona.”—Matewu 6:34, Bibele—Mahungu Lamanene.

Ku Tiva Leswi Ku Vilerisaka

Yesu a a nga vuli swona leswaku hi fanele hi endla onge a hi na swona swiphiqo. Hambiswiritano, ku vilela hi swilo leswi nga ha hi humelelaka mundzuku swi to engetela swiphiqo swin’wana eka leswi hi nga na swona namuntlha. I ntiyiso leswaku a hi na wona matimba yo lawula swilo leswi nga ha hi humelelaka mundzuku, ku nga khathariseki leswaku i swinene kumbe i swo biha. Kambe hi nga teka magoza yo karhi leswaku hi langutana ni leswi nga hi humelelaka namuntlha.

Hakunene swa tika ku va hi tshika ku vilela hambiloko hi swi lava! Rebekah, loyi nuna wakwe a heleriweke hi ntirho endzhaku ko tirha malembe ya 12, u ri: “Loko u karhateke ngopfu swa tika ku ehleketa hi ndlela leyinene. Kambe hi boheke ku endla tano. Kutani ndzi ringete ku tikhoma. Loko swilo leswi a swi ndzi vilerisa swi nga humelelanga, ndzi xiye leswaku a swi pfuni ku vilela. Ku dzika eka siku ra namuntlha ni swiphiqo swa rona, swi hi pfune ku tshika ku vilerisiwa hi swilo hinkwaswo.”

Tivutise: ‘I yini leswi ndzi vilerisaka swinene? Xana nchumu lowu ndzi vilerisaka wu ta endleka hakunene? I nkarhi wo tanihi kwihi lowu ndzi wu hetaka ndzi ri karhi ndzi vilela hi swilo leswi nga ha endlekaka kumbe leswi nga ta ka swi nga endleki?’

Eneriseka Hi Leswi U Nga Na Swona

Langutelo leri hi nga na rona ri nga khumba mintlhaveko ya hina. Xisweswo Bibele yi hi khutaza ku va ni langutelo leri: “Loko hi ri ni swakudya ni swifunengeto, hi ta eneriseka hi swilo leswi.” (1 Timotiya 6:8) Ku eneriseka swi vula ku hunguta swilo leswi nga bohiki ku va na swona naswona hi eneriseka loko hi kota ku kuma swilaveko swa hina swa siku ni siku. Ku lwela ku enerisa ku navela ka hina ko lava swilo swo tala swi ta hi endla hi nga tikarhateli ku endla matshalatshala yo olovisa vutomi bya hina.—Marka 4:19.

Renée u dyondze ku eneriseka hi leswi a nga na swona endzhaku ko kambisisa xiyimo xakwe hi vurhon’wana. U ri: “A hi nga si tshama hi pfumala mali yo xava gezi kumbe ku hlongoriwa endlwini hikwalaho ko tsandzeka ku yi hakelela. Xiphiqo-nkulu a ku ri leswaku ndlela leyi a hi hanya ha yona a hi nga yi tolovelanga naswona ku navela ka mina loku nga twaliki ko lava ku hambeta hi hanya hi ndlela leyi a hi hanya ha yona eku sunguleni ku nyanyise ku vilela ka mina.”

Hi ku hatlisa Renée u xiye leswaku langutelo rakwe hi rona leri endleke leswaku swilo swi vonaka swi yime hi nhloko, ku nga ri swiyimo leswi a a ri eka swona. U ri: “Ndzi boheke ku amukela ndlela leyi xiyimo xa hina a xi ri ha yona ku nga ri ku dzika eka ndlela leyi mina a ndzi xi lava xi va ha yona. Loko ndzi dyondze ku eneriseka hi leswi Xikwembu a xi hi nyika swona siku ni siku, ndzi kume leswaku ndzi sungule ku va ni ntsako.”

Tivutise: ‘Xana ndzi swi kumile swilaveko swa mina swa namuntlha? Loko swi ri tano, xana ndzi nga ehleketa ntsena hi swilaveko swa namuntlha, ndzi tiyiseka leswaku swilaveko swa mina swa mundzuku na swona ndzi ta swi kuma?’

Ku va ni langutelo lerinene i goza ro sungula leri nga ku pfunaka leswaku u langutana ni mintlhontlho yo hanya hi mali yitsongo.a Kambe hi wahi magoza lama pfunaka lawa u nga ma tekaka loko se u kuma mali yitsongo hileswi u nga ha tirhiki?

[Nhlamuselo ya le hansi]

[Bokisi leri nga eka tluka 5]

Ku Phikelela Swa Vuyerisa!

Endzhaku ko va Fred a hete mavhiki a lavana ni ntirho kambe a nga wu kumi, u titwe a heleriwe hi ntshembo. U ri: “A swi fana ni loko u rindze munhu leswaku a ta ku landza laha ku yimaka tibazi kambe a nga fiki.” Fred u tibyele leswaku a a ta teka goza rin’wana hi ku ya hi leswi nga ematimbeni yakwe. U rhumele papila rakwe ro kombela ntirho etikhampanini to tala hambi eka leti a swi tikomba ti nga va lavi vanhu lava a va tiva ntirho lowu a wu dyondzeleke. A a ya etikhampanini hinkwato leti a ti n’wi hlamula naswona a a tilunghiselela hi vukheta ku hlamula swivutiso leswi vutisiwaka vanhu lava lavaka ntirho, a ri ni ntshembo wa leswaku “makungu ya lava va gingiritekaka ma endla leswi pfunaka.” (Swivuriso 21:5) Fred u ri: “Ekhampanini yin’wana, ndzi ye kambirhi ndzi ya hlangana ni timininjhere letikulu leti ndzi vutiseke swivutiso leswi vutisiwaka vanhu lava lavaka ntirho.” Kambe ku phikelela kakwe ku tswale mihandzu. U ri: “Ndzi thoriwile!”

[Bokisi/Xifaniso lexi nga eka tluka 6]

Nchumu Wa Nkoka Ku Tlula Mali

I yini leswi nga swa nkoka swinene—i vumunhu bya wena kumbe mali leyi u yi holaka? Xiya swivuriso swimbirhi swa le Bibeleni.

“Wa antswa la pfumalaka kambe a fambaka hi vutshembeki ematshan’weni ya loyi a hombolokeke etindleleni takwe, hambiloko a fuwile.”—Swivuriso 28:6.

“Matsavu ma antswa laha ku nga ni rirhandzu ematshan’weni ya nkunzi leyi wundleriweke exidyelweni kambe ku ri ni rivengo.”—Swivuriso 15:17.

Swi le rivaleni leswaku mahanyelo lamanene ya munhu ni ndlela leyi a nga wa nkoka ha yona a swi heli hikwalaho ka leswi a heleriweke hi ntirho. Kutani loko Matthew a heleriwe hi ntirho, nsati wakwe Renée u byele vana a ku: “Vatatana vo tala va siye mindyangu ya vona. Kambe tata wa n’wina wa ha tshama na n’wina. Ma swi tiva leswaku wa mi rhandza swinene naswona wa mi pfuna eka swiphiqo swa n’wina hinkwaswo. Ku hava tatana lonene ku fana na yena!”