Langutelo Ra Bibele
Xana Vavasati Va Fanele Va Dyondzisa eVandlheni?
WANSATI un’wana wa Mukhatoliki u tsalele phepha-hungu ra USA Today a ku: “Swi ndzi hlamarisile swi tlhela swi ndzi khunguvanyisa leswaku ni sweswi vavasati a va si pfumeleriwa ku va vafundhisi.” Vanhu vo tala va titwa hi ndlela leyi fanaka. Phela, eka vukhongeri byin’wana vavasati i vafundhisi, vaprista, vabixopo ni varabi.
Vukhongeri lebyi alelaka vavasati ku va vafundhisi ni lebyi va pfumelelaka ku chumayela ekerekeni, byi vula leswaku byi namarhela leswi vuriwaka hi Matsalwa. Hambiswiritano, Bibele a yi ma seketeli mavonelo wolawo. Ha yini? Leswaku hi kota ku hlamula xivutiso xexo, hi fanele hi rhanga hi kambisisa ndlela leyi Bibele yi tirhisaka rito ra Xigriki leri nge di·aʹko·nos, leri hi ntolovelo ri vulaka munhu la tirhelaka vandlha.
Hi Lembe-xidzana Ro Sungula
Ri vula yini eka wena rito leri nge di·aʹko·nos? Vanhu vo tala va nga hatla va ehleketa hi mufundhisi wa xinuna kumbe waxisati, la rhangelaka vandlha etimhakeni ta vugandzeri. Kambe Bibele yi tirhisa rito leri hi tindlela to tala. Ehleketa hi Febe, wansati wa Mukreste, loyi muapostola Pawulo a vuleke leswaku i “makwerhu [wa hina] wa xisati . . . , loyi a nga mutirheli [di·aʹko·nos] wa vandlha leri nga eKenikreya.”—Varhoma 16:1.
Xana u ehleketa leswaku Febe a a yima emahlweni ka vandlha ra le Kenikreya a fambisa nhlangano wa vukhongeri? Kahle-kahle hi wihi ntirho lowu Febe a a wu endla? Eka papila leri Pawulo a ri tsaleleke Vafilipiya, u vule leswaku vavasati van’wana “va tirhe swin’we na [yena] . . . eku chumayeleni ka mahungu lamanene.”—Marito lawa hi lo voyamisa; Vafilipiya 4:2, 3, Contemporary English Version.
Ndlela leyikulu leyi Vakreste va lembe-xidzana ro sungula a va chumayela mahungu lamanene ha yona a ku ri ku “dyondzisa erivaleni ni hi yindlu ni yindlu.” (Mintirho 20:20) Vanhu lava a va endla ntirho wolowo a ku ri vachumayeri. Vachumayeri volavo a va katsa vavasati vo fana na Prisila. Yena swin’we ni nuna wakwe va ‘hlamusele ndlela ya Xikwembu hilaha ku lulameke’ eka wanuna la chavaka Xikwembu, loyi a a nga si khuvuriwa tanihi Mukreste. (Mintirho 18:25, 26) Ku fana na Febe, a swi kanakanisi leswaku Prisila a a ri muchumayeri la humelelaka ku fana ni vavasati van’wana.
Ntirho Wa Nkoka
Xana ku chumayela a ku ri ntirho lowu nga nyawuriki, lowu a wu nyikiwa vavasati leswaku va wu endla loko vavanuna va ri karhi va endla ntirho wa nkoka wa ku rhangela evandlheni? Nikatsongo! Naswona ku ni swivangelo swimbirhi leswi wu endlaka wu va wa nkoka. Xo sungula, Bibele yi swi veka erivaleni leswaku Vakreste hinkwavo—ku katsa ni vavanuna lava nga ni vutihlamuleri lebyikulu evandlheni—a va fanele va chumayela. (Luka 9:1, 2) Xa vumbirhi, ku chumayela a ku ri ndlela ya nkoka enkarhini lowu hundzeke ni namuntlha, leyi ha yona Vakreste va xinuna ni vaxisati va hetisisaka xileriso xa Yesu xa ku “endla vanhu va matiko hinkwawo va va vadyondzisiwa, . . . [ni ku] va dyondzisa.”—Matewu 28:19, 20.
Ku ni vutihlamuleri byin’wana bya nkoka lebyi vavasati van’wana va nga na byona evandlheni. Pawulo u tsale a ku: “Vavasati lava kuleke a va ve . . . vadyondzisi va leswi nga swinene; leswaku va vuyisa mianakanyo ya vaxisati lavatsongo, ku rhandza vanuna va vona, va rhandza vana va vona.” (Tito 2:3, 4) Hikwalaho, vavasati lava wupfeke lava yi tivaka kahle ndlela leyi Vakreste va faneleke va hanya ha yona va ni lunghelo ro pfuna vavasati lavatsongo ni lava nga ni ntokoto lowu nga nyawuriki leswaku va va ni vutlhari. Lunghelo rero na rona i ntirho wa nkoka ni lowu xiximekaka.
Ku Dyondzisa eVandlheni
Hambiswiritano, ku hava laha eBibeleni vavasati va byeriwaka leswaku va yima emahlweni ka vandlha va dyondzisa. Kambe muapostola Pawulo u va lerise leswaku ‘va tshama va miyerile emavandlheni.’ Ha yini? Xivangelo xin’wana lexi a xi tsaleke hileswaku swilo hinkwaswo swi ta endliwa “hi ku tenga ni hi ku hleleka.” (1 Vakorinto 14:34, 40) Leswaku swilo swi famba kahle evandlheni, Xikwembu xi nyike ntlawa wun’we ntsena vutihlamuleri byo dyondzisa. Kambe xiya leswaku munhu a nga nyikiwi vutihlamuleri byo rhangela evandlheni ntsena hileswi a nga waxinuna; byi nyikiwa ntsena vavanuna lava fanelekaka hakunene.a—1 Timotiya 3:1-7; Tito 1:5-9.
Xana ntirho lowu Xikwembu xi wu nyikeke vavasati wu va chicha xiyimo? Nikatsongo. Tsundzuka leswaku Yehovha Xikwembu u va hlawule leswaku va endla ntirho wa nkoka wa ku chumayela erivaleni malunghana na yena. (Pisalema 68:11) Exikarhi ka Timbhoni ta Yehovha namuntlha, vavanuna ni vavasati lava nga vahuweleri va mahungu lamanene va pfune vanhu va timiliyoni leswaku va hundzuka kutani va va ni ntshembo wo ponisiwa. (Mintirho 2:21; 2 Petro 3:9) Ku fikelela sweswo i goza ra nkoka swinene!
Ntirho wa vavanuna ni vavasati wu kondletela ku rhula wu tlhela wu va nyika xindzhuti hinkwavo ka vona. Hi xikombiso: Mahlo ni tindleve swa tirhisana leswaku swi pfuna munhu leswaku a tsemakanya xitarata lexi nga ni mphesamphesa. Hilaha ku fanaka, loko vavanuna ni vavasati va endla ku rhandza ka Xikwembu hi ku ya hi mintirho leyi va averiweke yona, Xikwembu xi ta katekisa vandlha hi vun’we.—1 Vakorinto 14:33; Vafilipiya 4:9.b
[Tinhlamuselo ta le hansi]
a Nakambe xiya leswaku vulawuri bya wanuna evandlheni byi ringaniseriwile. U le hansi ka Kreste naswona u fanele a endla swilo hi ku ya hi milawu ya Bibele. (1 Vakorinto 11:3) Lava nga ni vutihlamuleri evandlheni va fanele va tlhela va ‘tiveka ehansi ka van’wana,’ va kombisa moya wa ku titsongahata ni ntirhisano.—Vaefesa 5:21.
b Loko vavasati va Vakreste va xixima vutihlamuleri lebyi Xikwembu xi byi byarhiseke vavanuna evandlheni va vekela ni tintsumi etilweni xikombiso lexinene.—1 Vakorinto 11:10.
XANA U TSHAME U TIVUTISA?
● Vavasati a va dyondzisa njhani evandlheni ro sungula ra Vukreste?—Mintirho 18:26.
● I vamani lava hlawuriwaka ku rhangela evandlheni?—1 Timotiya 3:1, 2.
● Xikwembu xi wu teka njhani ntirho wo chumayela lowu endliwaka hi vavasati va Vakreste namuntlha?—Pisalema 68:11.
[Marito lama tshahiweke exihlokweni lama nga eka tluka 29]
“Yehovha u vula marito lawa; vavasati lava vulaka mahungu lamanene i vuthu lerikulu.”—PISALEMA 68:11.