I Yini Leswi Timbhoni Ta Yehovha Ti Pfumelaka Eka Swona?

1. Bibele

Timbhoni ti pfumela leswaku “Matsalwa hinkwawo ma huhuteriwe hi Xikwembu.” (2 Timotiya 3:16) Jason D. BeDuhn, profesa wa tidyondzo ta vukhongeri, u tsale a ku: “[Timbhoni ta Yehovha ti sekela] tidyondzo ni mikhuva ya tona eBibeleni, naswona tidyondzo teto a ti hleriwanga ka ha ri emahlweni leswaku ti fambisana ni leti nga eka yona.” Tidyondzo ta tona ti pfumelelana ni Bibele; a ti yi hlamuseli hi ndlela yin’wana leswaku yi ta fambisana ni leswi ti swi pfumelaka. Kambe ta swi xiya leswaku a hi swilo hinkwaswo leswi nga eBibeleni leswi faneleke swi tekiwa hi ndlela ya xiviri. Hi xikombiso, masiku ya nkombo ya ku tumbuluxa i yo fanekisela, ma kombetela eka nkarhi wo leha.—Genesa 1:31; 2:4.

2. Muvumbi

Xikwembu xa ntiyiso xi tinyike vito leri nge Yehovha (kumbe Yahweh, hilaha ri tirhisiwaka hakona eka Jerusalem Bible ya kereke ya Rhoma Khatoliki ni hi swidyondzi swin’wana swa manguva lawa) leswaku xi tihambanisa ni swikwembu swa mavunwa.a (Pisalema 83:18) Vito ra Xikwembu hi Xiheveru ri humelela minkarhi ya kwalomu ka 7 000 eka Matsalwa yo sungula. Loko Yesu a kandziyisa ndlela leyi vito rero ri nga ra nkoka ha yona, u vule marito lawa eka xikhongelo xa xikombiso: “Vito ra wena a ri kwetsimisiwe.” (Matewu 6:9) Xikwembu xi lava leswaku vanhu va tinyiketela eka xona hilaha ku heleleke. Hi yona mhaka leyi Timbhoni ti nga tirhisiki swifaniso loko ti xi gandzela.—1 Yohane 5:21.

3. Yesu Kreste

I Muponisi, “N’wana wa Xikwembu,” ni “mativula ya ntumbuluko hinkwawo.” (Yohane 1:34; Vakolosa 1:15; Mintirho 5:31) Xikwembu na Yesu a hi munhu un’we. Yesu u te: “Tatana u nkulu eka mina.” (Yohane 14:28) Yesu u hanye etilweni a nga si ta laha misaveni, naswona endzhaku ka rifu rakwe ra nkutsulo ni ku pfuxiwa kakwe eku feni, u tlhelele etilweni. “A nga kona loyi a taka eka Tatana handle [ka yena].”—Yohane 14:6.

4. Mfumo wa Xikwembu

I hulumendhe ya xiviri ya le tilweni leyi nga ni Hosi—Yesu Kreste—ni vafumi-kulobye va 144 000, lava “xaviweke emisaveni.” (Nhlavutelo 5:9, 10; 14:1, 3, 4; Daniyele 2:44; 7:13, 14) Va ta fuma misava leyi, leyi eka yona ku nga ta herisiwa vubihi hinkwabyo kutani ku tshama vanhu va timiliyoni lava chavaka Xikwembu.—Swivuriso 2:21, 22.

5. Misava

Eklesiasta 1:4 yi ri: “Misava yi tshama hilaha ku nga heriki.” (Bibele Ya Xitsonga) Endzhaku ka loko vanhu vo homboloka va lovisiwile, misava yi ta hundzuriwa paradeyisi naswona ku ta tshama vanhu vo lulama eka yona. (Pisalema 37:10, 11, 29) Ku ta hetiseka marito ya Yesu lawa a ma vuleke exikhongelweni a ku, “ku rhandza ka wena a ku endleke emisaveni.”—Matewu 6:10.

6. Vuprofeta bya Bibele ‘Xikwembu a xi nge hembi.’ (Tito 1:2)

Hikwalaho, leswi xi swi profetaka swa hetiseka minkarhi hinkwayo, ku katsa ni vuprofeta bya Bibele lebyi vulavulaka hi makumu ya misava leyi. (Esaya 55:11; Matewu 24:3-14) I mani la nga ta pona ndzoviso lowu taka? Yohane wo Sungula 2:17 yi ri: “Loyi a endlaka ku rhandza ka Xikwembu u tshama hi masiku.”

7. Valawuri va tiko

Yesu u te: “Tlheriselani swilo swa Khezari eka Khezari, kambe swilo swa Xikwembu eka Xikwembu.” (Marka 12:17) Hi yona mhaka leyi Timbhoni ta Yehovha ti yingisaka milawu ya tiko loko yi nga lwisani ni milawu ya Xikwembu.—Mintirho 5:29; Varhoma 13:1-3.

8. Ku chumayela

Yesu u profete a ku: “Mahungu lamanene lawa ya mfumo” ma ta chumayeriwa emisaveni hinkwayo ku nga si fika makumu ya misava leyi. (Matewu 24:14) Timbhoni ta Yehovha ti swi teka ku ri lunghelo ku endla ntirho lowu wo ponisa vutomi. I ntiyiso leswaku vanhu hi vona va tihlawulelaka loko va lava ku yingisa kumbe va nga swi lavi. Bibele yi ri: “Mani na mani la swi navelaka a a nwe mati ya vutomi mahala.”—Nhlavutelo 22:17.

9. Nkhuvulo

Timbhoni ta Yehovha ti khuvula ntsena vanhu lava endzhaku ko dyondza Bibele va lavaka ku tirhela Xikwembu tanihi Timbhoni ta xona. (Vaheveru 12:1) Vanhu volavo va kombisa ku tinyiketela ka vona eka Xikwembu hi ku khuvuriwa ematini.—Matewu 3:13, 16; 28:19.

10. Ku hambana exikarhi ka vafundhisi ni swirho swa kereke

Yesu u byele vadyondzisiwa vakwe a ku: “N’wina hinkwenu mi vamakwavo.” (Matewu 23:8) Vakreste vo sungula, ku katsa ni vatsari va Bibele a va nga ri na swikhundlha swa vufundhisi. Timbhoni ta Yehovha ti landzela endlelo rero ra le Bibeleni.