Ndzi Swi Langutele Hi Mahlo-ngati Ku Va Byela Ndzi Ku, “Hinkwerhu Hi Kwala!”

Hi ku vula ka Abigail Austin

Siku rin’wana hi April 1995 loko ndzi ri ni malembe ya kaye, ntlawa wa hina lowu humaka evandlheni ra hina ra Timbhoni ta Yehovha wu hlele ku heta siku hinkwaro endhawini leyi nga ekule ni doroba. Hi teke riendzo rero hi famba hi timovha. Sesi wa mina Sarah, munghana wa vatswari va hina Deborah swin’we na mina, a hi famba na tatana na manana. Hi xitshuketa, ku te movha lowu a wu famba hi rivilo lerikulu wu kongome egondzweni leri a hi famba eka rona, hiloko wu hi tlumba. Ku lo pona mina ntsena.

NDZI pfuke exibedlhele endzhaku ka mavhiki mambirhi. Xipalapala xa mina a xi fayekile, kutani madokodela ma hoxe swiphemu swo hlayanyana swa tinsimbi leswaku swi xi khoma xi tiya. Kambe ndzi hlakarhele hi ku hatlisa. Eku heteleleni maxaka ya mina ma ndzi byele leswi endlekeke, kambe a ndzi ma tshembanga. A ndzi tshamela ku ehleketa leswaku vatswari va mina ni sesi wa mina va tile va ta ndzi endzela loko ndza ha etlele naswona a ndzi kotanga ku va vona. Loko ndzi tlhelele ekaya hi kona ndzi nga swi xiya leswaku a va file hakunene. Ndzi tsemeke nhlana.

I yini lexi ndzi pfuneke ku tiyiselela khombo leri?

Matimu Ya Ku Tshembeka eNtirhweni Wa Yehovha

A ndzi ri rikotse eka vana va ntlhanu. Hi nkarhi lowu mhangu leyi yi endlekeke ha wona, Sarah a a ri ni malembe ya 22, Shane a a ri ni 20, Jessica a a ri ni 17 kasi Luke a a ri ni 15. A hi ri ni vatswari lava khathalaka. Tata wa mina Steve, a a ri nkulu eVandlheni ra Timbhoni ta Yehovha ra West Yorkshire le Shipley, naswona a a rhandziwa hi vanhu hinkwavo hileswi a a tinyika nkarhi wo yingisela van’wana ni ku va pfuna. Mana wa mina Carol na yena a a rhandziwa swinene, naswona vadyuhari evandlheni a va n’wi teka tanihi n’wana wa nhwanyana la khathalaka hi vona. A a hi hlelela swinkhubyana hina vantshwa naswona a a hi pfuna leswaku hi kuma vanghana lavanene. Vanhu hinkwavo a va amukeriwa hi mandla mambirhi ekaya ka hina. Vatswari va hina va tlhele va hi dyondzisa ku va ni musa ni ku anakanyela vaakelani va hina.

Ravunharhu wun’wana ni wun’wana a hi dyondza Bibele tanihi ndyangu. Minkarhi yin’wana a hi endla tidrama ta Bibele kutani hi ambala ku fana ni vanhu va kona. Tatana na manana va hi dyondzise ku sukela loko ha ha ri vatsongo ku lunghiselela minhlangano ya vandlha ni ndlela yo chumayela vanhu rungula ra le Bibeleni emakaya ya vona. Hambileswi vatswari va hina a va ri ni mintirho yo tala tanihi leswi a va kurisa vana va ntlhanu, a va heta nkarhi wo tala na hina ni ku hi pfuna leswaku hi va ni vuxaka lebyi tiyeke na Yehovha.

Loko Sarah, Shane na Jessica va hete xikolo, va ve maphayona, ku nga vachumayeri va nkarhi hinkwawo va Vakreste, hilaha Deborah a endleke hakona. Mina na Sarah a hi ri vanghana lavakulu. A a fana ni mutswari eka mina, naswona loko swikolo swi pfarile, a hi heta nkarhi swin’we hi ri karhi hi dyondzisa vanhu Bibele. A ndzi ma rhandza masiku wolawo. A ndzi vona ndlela leyi maphayona hinkwawo a ma tshama ma tsakile ha yona, naswona a ndzi swi tsakela ku va na wona. Pakani ya mina a ku ri ku phayona na Sarah loko ndzi heta xikolo.

Hi tiholideyi, ndyangu wa ka hina ni van’wana evandlheni a va tala ku heta nkarhi swin’we. Vanhu lavakulu ni lavatsongo a va kula va ri vanghana naswona va rhandzana. A ndzi nga swi tivi leswaku vanghana lava lavanene a va ta ndzi pfuna ni ku ndzi chavelela enkarhini lowu taka!

Endzhaku Ka Mhangu

Loko ndzi huma exibedlhele, ndzi tlhelele ekaya. Shane na Jessica a va tirha mintirho ya nkarhinyana leswaku va hi wundla ni ku chumayela nkarhi hinkwawo.

Timbhoni-kulorhi to tala evandlheni ra ka hina ti hi pfunile na tona. Ti hi endlele swilo swo tala! Ti hi tisele swakudya, ti hi basisela ekaya, ti hi xavela swilo ni ku hi hlantswela swiambalo kukondza hi kota ku tiendlela hi hexe. A hi swi tlangela swinene sweswo. Tinyiko ni makhadi yo tala yo hi chavelela lama humaka eka Timbhoni ta le kule, swi kombise ndlela leyi swirho swa nhlengeletano ya Yehovha swi nga ni rirhandzu ha yona.

Endzhaku ka kwalomu ka lembe, vabuti wa mina na sesi wa mina va teke xiboho xa leswaku ndzi fanele ndzi tshama ni ndyangu wo karhi. Mindyangu yin’wana leyi nga ni musa evandlheni yi tinyikerile leswaku yi nga tshama na mina, kutani buti na sesi va kambisise leswi Manana na Tatana a va ta vona swi ri swinene eka mina ni vumundzuku bya mina bya moya. A ku ri ni ndyangu wun’wana lowu a wu faneleka swinene. Billy la nga nkulu ni nsati wakwe Dawn, a va ri vanghana lavakulu va vatswari va hina, naswona a va ri ni n’wana wa nhwanyana wa malembe ya ntlhanu la vuriwaka Lois. Va ndzi amukele hi mandla mambirhi ekaya ra vona naswona ku sukela kwalaho va ndzi khome kahle ku fana ni n’wana wa vona. Hambileswi vatswari va Lois va hi khathaleleke hi ri vambirhi, a a nga si tshama a ndzi vondzoka naswona namuntlha hi vanghana lavakulu onge hiloko hi ri vamakwerhu va xiviri.

Ndlela Leyi Ndzi Langutaneke Ni Khombo Ha Yona

Eku sunguleni, ndzi tivutisile leswaku ha yini ndyangu wa ka hina wu humeleriwe hi khombo leri, ngopfu-ngopfu vatswari va mina swin’we na Sarah na Deborah, lava kombiseke leswaku va rhandza Yehovha ni vanhu van’wana swinene. Kambe ndzi tsundzuke mhaka ya le Bibeleni ya Yobo, loyi a tshameke a tshembekile eka Xikwembu hambileswi a feriweke hi vana. (Yobo 1:19, 22) Ndzi tibyele ndzi ku, ‘Phela Sathana hi yena a vangeleke vanhu ku xaniseka ni rifu emisaveni, naswona a nga tsaka loko mhangu leyi ya movha yo hi endla hi tshika ku tirhela Xikwembu.’ (Genesa 3:1-6; Nhlavutelo 12:9) Ndzi tlhele ndzi tsundzuka leswaku Yehovha u hi nyike ntshembo lowu tsakisaka wa ku pfuxiwa ka vafi. (Yohane 5:28, 29) Hi ta tlhela hi vona swirho swa ndyangu wa ka hina swin’we na Deborah, kambe hi ta va vona emisaveni leyi nga paradeyisi! Entiyisweni, ndlela leyi ndzi rhandzaka Yehovha ha yona yi ye yi kula swinene.

Loko ndzi hlangana ni vanhu lava na vona va weriweke hi makhombo, ndzi twa ku vava loko va nga twanga hi ta xitshembiso xo tsakisa xa le Bibeleni xa ku pfuxiwa ka vafi. Swi ndzi susumetela ku va byela hi ntshembo wa hina, hikuva ndza tiyiseka leswaku i Yehovha ni nhlengeletano yakwe ntsena leswi hi pfuneke ku hlula minkarhi leyi yo tika hi ku tiva leswaku ku ni ntshembo.

Kumbexana ntokoto wa hina wu tlhele wu pfuna vanhu hi tindlela tin’wana, wu susumetela vatswari van’wana ku tivutisa, ‘Xana hi va dyondzise kahle vana va hina hi Yehovha lerova loko ho humeleriwa hi swin’wana va nga hambeta va n’wi tirhela va ri voxe?’

Ndzi ringete ku hanya vutomi bya mina onge hiloko Manana na Tatana va ha hanya. Ndza swi tiva leswaku a va ta va va lave leswaku ndzi tirha hi matimba ku pfuna van’wana, hilaha vona va endleke hakona. Ndzi sungule ku phayona ku sukela loko ndzi hete xikolo, naswona sweswi ndzi tirha na Lois loyi na yena a nga phayona. Buti ni sesi wa mina va nghenele vukati naswona va tirhela Yehovha va tsakile emavandlheni ya vona.

Ndzi yi langutele hi mahlo-ngati misava leyintshwa ya Xikwembu ni ku pfuxiwa ka vafi! Kutani a ku nge he vi ni switlhavi kumbe rifu. (Nhlavutelo 21:3, 4) Ku tiva leswaku hi ta tlhela hi va swin’we swi ndzi pfuna ku hambeta ndzi tirhela Xikwembu ku nga khathariseki swiphiqo leswi ndzi langutanaka na swona. Ndzi swi langutele hi mahlo-ngati ku vukarha Manana, Tatana, Sarah na Deborah kutani ndzi va byela ndzi ku, “Hinkwerhu hi kwala!”

[Xifaniso lexi nga eka tluka 23]

Abigail (wa vumbirhi ku suka eximatsini) a ri ni ndyangu lowu a tshamaka na wona namuntlha