Vantshwa Va Vutisa

Ndzi Nga Swi Papalata Njhani Ku Va Ni Gome?

“Loko vanghana va mina va nga ha swi koti ku tiyiselela swiphiqo swa vona, ndzi va pfuna ku swi lulamisa ni ku va endla va titwa va antswa. Kambe ndzi tlhelela ekaya kutani ndzi fika ndzi nghena ekamareni ra mina ivi ndzi rila naswona vo tala a va swi voni sweswo.”—Kellie.a

“Loko ndzi ri ni gome, ndzi tihambanisa ni van’wana. Loko ndzi rhamberiwa ku ya kun’wana, ndzi va byela swivangelo swo karhi leswaku ndzi nga yi. Ndzi swi kota ngopfu ku fihlela vandyangu wa mina loko ndzi ri ni gome. Va ehleketa leswaku swi ndzi fambela kahle.”—Rick.

XANA u tshame u titwa hi ndlela leyi Kellie kumbe Rick va titwaka ha yona? Loko swi ri tano, u nga tsutsumeli ku gimeta hileswaku ku ni nchumu lowu nga fambiki kahle eka wena. Ntiyiso wa mhaka hileswaku vanhu hinkwavo va va ni gome minkarhi yin’wana. Hambi ku ri vavanuna ni vavasati vo tshembeka va le Bibeleni a va va ni gome.

Minkarhi yin’wana, u nga ha swi tiva leswi ku vangelaka gome; kasi minkarhi yin’wana a wu nge swi tivi. Anna wa malembe ya 19 u ri: “A swi kali swi lava leswaku u va exiyin’weni lexi nga tsakisiki leswaku u va ni gome. Nkarhi wun’wana ni wun’wana u nga va na rona, hambiloko u nga ri na swiphiqo. A swi twali kambe swa humelela!”

Ku nga khathariseki leswaku hi xihi xivangelo xa kona—hambi loko swi tikomba xi nga ri kona—u nga endla yini loko u karhatiwa hi gome?

Goza #1: Vulavula ha rona. Bibele yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.”—Swivuriso 17:17.

Kellie: “Ndzi titwa ndzi ntshunxeke swinene endzhaku ko vulavula ni munhu hikuva se wa swi tiva leswi ndzi dyaka. Kutani a nga ndzi pfuna leswaku ndzi hlula gome!”

Xiringanyeto: Laha hansi, tsala vito ra “nakulorhi wa ntiyiso” loyi u nga vulavulaka na yena loko gome ri ku tshikilela.

․․․․․

Goza #2: Tsala ha rona. Loko gome ri endla leswaku u cinca ndlela leyi u langutaka vutomi ha yona, u nga ha ringeta ku swi tsala ehansi leswi u swi ehleketaka. Minkarhi yin’wana Davhida u phofule gome rakwe lerikulu eka tipisalema takwe leti huhuteriweke. (Pisalema 6:6) Ku tsala hi gome ro tano swi nga ku pfuna leswaku u “hlayisa vutlhari lebyi pfunaka ni vuswikoti byo ehleketa.”—Swivuriso 3:21.

Heather: “Ku tsala swi ndzi pfuna ku hlela mianakanyo leyi pakelanaka hikwalaho ka gome. Loko u phofula ndlela leyi u titwaka ha yona naswona u swi twisisa leswaku ha yini u titwa tano, gome a ri nge ku tshikileli ngopfu.”

Xiringanyeto: Van’wana va hlawula ku tsala eka dayari. Loko u hlawula ku endla tano, i yini leswi u nga swi tsalaka eka yona? Loko u ri ni gome, hlamusela ndlela leyi u titwaka ha yona ni leswi u ehleketaka leswaku hi swona swi ku vangelaka gome rero. Hlaya leswi u swi tsaleke endzhaku ka loko ku hundze n’hweti. Xana yi cincile ndlela leyi u titwaka ha yona hi mhaka yoleyo? Loko swi ri tano, tsala leswi ku pfuneke.

Goza #3: Khongela ha rona. Bibele yi vula leswaku loko u khongela hi leswi ku karhataka, ‘ku rhula ka Xikwembu loku tlulaka miehleketo hinkwayo ku ta rindza mbilu ya wena ni matimba ya wena ya mianakanyo.’—Vafilipiya 4:7.

Esther: “A ndzi ringeta ku kumisisa leswi ndzi vangelaka gome, kambe a ndzi swi kumanga. Kutani ndzi kombele Yehovha leswaku a ndzi pfuna ndzi va ni ntsako. A ndzi hele matimba hileswi a ndzi ri ni gome naswona ndzi nga swi tivi leswaku ri vangiwa hi yini. Eku heteleleni ndzi ri hlurile. U nga tshuki u yi tekela ehansi ndlela leyi xikhongelo xi nga ni matimba ha yona!”

Xiringanyeto: Tirhisa marito ya Pisalema 139:23, 24 tanihi xikombiso xa leswi u nga swi vulaka loko u khongela eka Yehovha. N’wi phofulele leswi nga embilwini kutani u n’wi kombela a ku pfuna u kumisisa leswi ku vangelaka gome.

Ku engetela eka swiringanyeto leswi nga laha henhla, u nga kuma rungula ra nkoka eRitweni ra Xikwembu. (Pisalema 119:105) Ku tata mianakanyo ya wena hi timhaka leti akaka leti u nga ti kumaka eBibeleni swi nga khumba mianakanyo, mintlhaveko ni swiendlo swa wena. (Pisalema 1:1-3) Timhaka leti tsakisaka ti kumeka ebukwini ya Bibele ya Mintirho. Swiringanyeto leswi engetelekeke leswi akaka swa ku hlaya ka Bibele swi nga kumiwa hi ku hlaya matluka ya kaye lama nge “Xikombiso Lexinene” ebukwini leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, leyi kandziyisiweke hi Timbhoni ta Yehovha. Tin’wana ta timhaka ta le Bibeleni leti tlhuvutsiwaka eka matluka wolawo i ta Yosefa, Hezekiya, Lidiya na Davhida. Eka tluka 227, u ta tlhela u twa ndlela leyi muapostola Pawulo a koteke ku lwisana ni mianakanyo yo biha leyi minkarhi yin’wana a a pfa a va na yona hikwalaho ka ku nga hetiseki kakwe.

Kambe u nga endla yini loko u hambeta u va ni gome ku nga khathariseki matshalatshala lawa u ma endlaka yo lwisana na rona?

Loko U Hambeta U Va Ni Gome

Ryan u ri: “Masiku man’wana nimixo, ndzi twa onge swi nga antswa leswaku ndzi nga pfuki ku va ndzi ta papalata ku langutana ni siku rin’wana leri nga pfuniki nchumu.” Ryan i un’wana wa lava khomiweke hi vuvabyi bya ntshikilelo wa mianakanyo. Minkambisiso yi ringanyeta leswaku muntshwa un’we eka va mune va khomiwa hi muxaka wo karhi wa vuvabyi bya ntshikilelo wa mianakanyo va nga si va vanhu lavakulu.

U nga swi tivisa ku yini loko u ri ni vuvabyi bya ntshikilelo wa mianakanyo? Swikombiso swin’wana swa vuvabyi lebyi swi katsa ku va ni swipfukela ni ku cinca ndlela leyi u tikhomaka ha yona, ku tihambanisa ni van’wana, ku nga ha tsakeli mintlango hinkwayo, ku nga ha dyi kahle, ku nga ha etleli kahle, ku titwa u ri xikangalafula kumbe ku titwa nandzu swi nga fanelanga.

Entiyisweni, minkarhi yin’wana vanhu hinkwavo va va na xona xikombiso xin’we kumbe swo tala swa vuvabyi lebyi. Kambe loko swikombiso sweswo swi phikelela ku ringana mavhiki yo hlayanyana, ha yini u nga vulavuli ni vatswari va wena malunghana ni ku ya eka dokodela a ya ku kambela? Dokodela a nga ha ku pfuna ku tiva loko gome leri u nga na rona ri vangiwa hi vuvabyi bya ntshikilelo kumbe ri nga vangiwi ha byona.b

Loko u ri ni ntshikilelo lowukulu wa mianakanyo swi nga ku khomisi tingana. Endzhaku ko tirhisa murhi wa kona, vanhu vo tala lava nga na wona va sungule ku titwa va antswa swinene—kumbexana ku tlula ndlela leyi va tshameke va titwa ha yona enkarhini lowu hundzeke! Xisweswo, ku nga khathariseki leswaku gome leri u nga na rona ri vangiwa hi ntshikilelo wa mianakanyo kumbe a ri vangiwa hi wona, tsundzuka marito lama chavelelaka ya Pisalema 34:18 lama nge: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”

Swihloko swin’wana leswi nge “Vantshwa Va Vutisa” swi kumeka eka Website leyi nge www.watchtower.org/ype

[Tinhlamuselo ta le hansi]

SWIVUTISO SWO ANAKANYISISA HA SWONA

● Xana swa vuyerisa ku rila?

“A ndzi nga swi tolovelanga ku tshamela ku rila, kambe ndzi vone leswaku swa fanela loko ndzi ri ni gome. Ku rila swi herisa mabibi ya mbilu. Endzhaku ko rila, ndzi sungula ku ehleketa kahle naswona ndzi langutela ku va ni ntsako enkarhini lowu taka.”—Leanne.

● Van’wana va nga ku pfuna njhani leswaku u langutana ni gome?

“Loko ndzi ri ni gome, ndzi papalata ku tshama ndzexe. Ndzi nga ha lava ku tshama ndzexe leswaku ndzi tiehleketa kumbe ndzi rila. Kambe endzhaku ka sweswo, ndza swi tiva leswaku ndzi fanele ndzi tshama ni vanhu leswaku ndzi ta tshika ku ehleketa hi swilo swin’wana ni swin’wana leswi a swi ndzi vangela gome.”—Christine.

[Bokisi/Swifaniso leswi nga eka tluka 21]

LESWI TINTANGHA TA WENA TI SWI VULAKA

“Ndzi tala ku va ni gome loko ndzi anakanya ngopfu hi mina n’wini. Kambe ku pfuna van’wana swi endla leswaku ndzi nga anakanyi ngopfu ha mina naswona sweswo swi endla leswaku ndzi tsaka.”

“Loko ndzi tshamela ku endla vutiolori, a ndzi tali ku va ni gome hikuva ndzi sungula ku titwa ndzi ri munhu lonene. Loko ndzi heta ku endla vutiolori, ndzi va ndzi karhele lerova a ndza ha ri na wona nkarhi wo ehleketa hi gome ra mina!”

[Swifaniso]

Drenelle

Rebekah

[Xifaniso lexi nga eka tluka 22]

U nga swi kota ku hlula gome hi ku pfuniwa hi van’wana ni hi ku endla matshalatshala lamakulu