Leti Humaka Eka Vahlayi

Mikateko Leyikulu Ku Tlula Rifuwo (March 2009) Xihloko lexi xi tshahe Kostas, la nga te: “Xikwembu a xi lavi leswaku hi tiyimisela ku va ni swilo swo tala leswi vonakaka.” A ndzi ehleketa leswaku Yehovha a nga n’wi pimeli nandza wakwe leswaku u fanele a va ni rifuwo ro tala kumbe ritsongo ku fikela kwihi, ntsena loko a rhangisa yena evuton’wini. Xana swi hoxile ku va ni rifuwo ro tala loko u ri karhi u tirhela Yehovha hi ku tshembeka?

J. D., United States

“Xalamuka!” ya hlamula: Bibele a yi vuli leswaku swi bihile ku va ni rifuwo. Entiyisweni, malandza yo tala ya Xikwembu enkarhini lowu hundzeke a ma fuwile. (Genesa 25:5; 26:12-16; Yobo 1:1-3) Hambiswiritano, lava fuweke va fanele va tsundzuka leswaku ‘ku bombisa rifuwo ra vutomi—a swi humi eka Tatana, kambe swi huma emisaveni.’ (1  Yohane 2:16) Ku tlula kwalaho, muapostola Pawulo u te: “Ku rhandza mali i rimitsu ra mixaka hinkwayo ya swilo swo biha.” U vule leswaku “van’wana va lahlekisiwile eripfumelweni naswona va titlhave hinkwako-nkwako hi switlhavi swo tala” hileswi va tshikeke ku rhangisa timhaka ta Xikwembu hikwalaho ko navela ku fuwa. (1 Timotiya 6:10) I ntiyiso leswaku Rito ra Xikwembu a ri vuli leswaku lava fuweke va fanele va titwa nandzu hileswi va nga ni rifuwo ro tala ku tlula van’wana. Vakreste va khutaziwa ku “hanana, va tiyimisela ku avelana ni van’wana,” ku nga khathariseki leswaku va ni rifuwo ro tala kumbe ritsongo ku fikela kwihi.—1 Timotiya 6:18.

Ku Twa Rito Leri Nga Vuriwangiki Hi Nomu (October 2008) Ndzi khutaziwe ngopfu hi xihloko lexi lexi vulavulaka hi Hillary, la nga ni vuvabyi lebyi vuriwaka Rett syndrome. Ntukulu wa mina la nga ni malembe ya ntlhanu a nga voni, a nga twi, a nga fambi, a nga vulavuli hambi ku ri ku tshama. Sweswi ndza tshemba leswaku loko ndzi yimbelela, ndzi hlaya, ndzi vulavula ni ku n’wi kandza miri, ku endleka swin’wana ebyongweni byakwe. Ndzi ririle loko ndzi hlaya marito ya mana wa Hillary lama nge: “Hambileswi ndzi nga swi twiki leswi a swi vulaka, Yehovha wa swi twa.” Swi ndzi pfune ku xiya leswaku hambileswi ntukulu wa mina a nga kotiki ku vula nchumu, Yehovha wa swi tiva leswi nga embilwini yakwe.

M. A., Japani

N’wana wa mina wa nhwanyana u ni malembe ya 43, kambe lexi i xihloko xo sungula lexi ndzi pfuneke ku twisisa xiyimo xakwe ni swivangelo swa ku lamala kakwe. Ndzi tshandzisana na Hillary, mana wakwe ni sesi wakwe. Hambileswi hi tshamaka ekule na kule, ndzi langutana ni xiyimo lexi fanaka ni xa vona naswona ndza xi tlangela xikombiso xa vona xa ripfumelo, rirhandzu ni ku tiyisela.

T. Y., Ghana

Ku Susa Khwiri—A Hi Ndlela Yo Olova Yo Tlhantlha Xiphiqo (June 2009) Ndza swi nkhensa swihloko swa n’wina swa nxaxamelo leswi vulavulaka hi ku susa khwiri. Loko ndza ha ri ni malembe ya kwalomu ka 20, ndzi suse khwiri naswona ndza tisola swinene hi xiendlo xexo. Loko a ndzi nga wu tivi ntiyiso sweswi, a ndzi nga ta va na wona ntshembo. Ndza nkhensa swinene leswi ndzi nga ni ntshembo naswona ndzi tivaka leswaku Yehovha wa rivalela.

Vito ri susiwile, United States

Vantshwa Va Vutisa . . . Ndzi Nga Ri Tiyiselela Njhani Gome Ra Ku Feriwa Hi Mutswari? (August 2009) Ndzi ni malembe ya 22, naswona rifu ra tatana ri fike hi xitshuketa lerova ri ndzi siye ndzi tsemeke nhlana. Hilaha xihloko lexi xi vuleke hakona, ndzi ta swi tsundzuka ku endla swilo swo tsakisa evuton’wini na yena. Hambileswi se ku hundzeke malembe manharhu a file, swa ha ndzi tikela ku tlhela ndzi hanya hi ndlela leyi a ndzi hanya ha yona eku sunguleni. Hambiswiritano, xihloko xexo xi ndzi chavelele ngopfu. Hambileswi a swi tika ku tirhisa swiringanyeto leswi nga eka xona leswi pfunaka ku tiyiselela gome ra ku feriwa, kambe swi ndzi pfunile. Ndza wu nkhensa ntirho lowunene lowu mi wu endlaka.

N. P., Furwa