Langutelo Ra Bibele

Xana Xikwembu I Munhu Wa Xiviri?

VANHU vo tala va boheka ku pfumela eka Xikwembu hikwalaho ka leswi va hlamarisiwaka hi ntumbuluko. Xana swa ku hlamarisa leswi vuako hinkwabyo byi rharhanganeke swonghasi? Xana swa ku hlamarisa swilo swa ntumbuluko swa pulanete ya hina leswi nga tolovelekangiki ni ku rharhangana ka miri wa munhu?

Loko swi ri tano, kumbexana na wena u susumeteleke ku pfumela eka Xikwembu. Vukhongeri byin’wana byi dyondzisa leswaku Xikwembu xexo xi tshama etintshaveni, emisinyeni, exibakabakeni ni le ka swilo swin’wana swa ntumbuluko. Kasi van’wana va pfumela leswaku mimoya ya vakokwa wa hina lava feke khale, leyi yin’wana ya yona yi nga yinene naswona yin’wana yi hombolokeke, ya hlangana kutani yi va Xikwembu.

Ku nga khathariseki tinhlamuselo teto hinkwato, dyondzo leyi dumeke i ya leswaku Xikwembu xexo a hi munhu. Vanhu van’wana swa va tikela ku pfumela leswaku Xikwembu xi ni mianakanyo, mintlhaveko, xikongomelo ni swilo leswi xi swi rhandzaka. Xana Xikwembu i munhu wa xiviri? Bibele, ku nga yin’wana ya tibuku ta khale to kwetsima leyi hangalasiweke swinene namuntlha, yi nyikela nhlamulo leyi nga erivaleni.

Timfanelo Ta Vanhu Ti Hi Byela Hi Vumunhu Bya Xikwembu

Bibele yi dyondzisa leswaku munhu u vumbiwe leswaku a ta va ni timfanelo leti fanaka ni ta Xikwembu. Genesa 1:27 yi vula leswaku “Xikwembu xi tumbuluxe vanhu, xi va endla leswaku va fana na xona.”—Bibele ya Today’s English Version.

Marito wolawo a ma vuli swona leswaku vanhu vo sungula a va fana hi ku helela ni Xikwembu. Bibele yi vula leswaku Xikwembu i xivumbiwa xa moya, kasi vanhu va endliwe hi ntshuri wa misava. (Genesa 2:7; Yohane 4:24) Hambileswi vanhu va hambaneke hi ndlela yoleyo ni Xikwembu, ku kambisisa timfanelo ta munhu hi vukheta swi nga hi pfuna ku twisisa vumunhu bya Xikwembu.

Vanhu va kota ku tirhisa matimba ni ku endla swilo leswi va rhangeke hi ku swi ehleketa kahle. Swiendlo sweswo swi nga susumetiwa hi timfanelo to fana ni musa, vuswikoti byo anakanya, vutlhari ni vululami. Vanhu va ni mintlhaveko leyi nga va endlaka va va ni rirhandzu, rivengo ni vukarhi. Ku va ni timfanelo leti to hambana-hambana swi hi endla hi nga fani ni vanhu van’wana. Hakunene un’wana ni un’wana wa hina u ni vumunhu lebyi hlawulekeke.

Xana a swi ta twala eka Xikwembu leswaku xi vumba hina tanihi vanhu lava rharhanganeke kasi xona i matimba lama nga riki munhu lama tsendzelekaka ntsena exibakabakeni? Loko vanhu va endliwe hi xifaniso xa Xikwembu, vumunhu bya xona a byi ta fana ni bya vanhu hi tindlela to tala. Kambisisa tinhla leti landzelaka.

Xikwembu xi ni vito. Bibele yi vula leswi eka Esaya 42:8: “Hi mina Yehovha. Rero i vito ra mina.” Xikwembu xi lava leswaku vito ra xona ri tiviwa. Nakambe Bibele yi ri: “Onge vito ra Yehovha ri nga dzunisiwa ku sukela sweswi ku ya fika enkarhini lowu nga riki na makumu. Ku suka eku humeni ka dyambu ku fikela eku peleni ka rona vito ra Yehovha ri ta dzunisiwa.” (Pisalema 113:2, 3) Hikokwalaho, loko vagandzeri va Xikwembu va tshamela ku tirhisa vito ra xona va xi teka tanihi munhu.

Xikwembu xi hlawulekile. Bibele yi dyondzisa leswaku Xikwembu xi hlawulekile hakunene. (1 Vakorinto 8:5, 6) Bibele yi ri: “Hakunene u . . . lonkulu, Wena Yehovha, Hosi leyi Lawulaka; hikuva ku hava un’wana la fanaka na wena, naswona a ku na Xikwembu handle ka wena.” (2 Samuwele 7:22) Nakambe Matsalwa ma hlamusela Yehovha tanihi “Xikwembu xa ntiyiso ematilweni ehenhla ni le misaveni ehansi. A ku na un’wana.”—Deteronoma 4:39.

Yehovha Xikwembu u venga vubihi. I munhu ntsena la nga vaka ni rivengo. Bibele yi hi byela leswaku Muvumbi u venga swilo swo fana ni “mahlo lama titlakusaka, ririmi ra vunwa, ni mavoko lama halataka ngati leyi nga riki na nandzu, mbilu leyi kunguhataka makungu yo biha, milenge leyi hatlaka ku tsutsumela evubihini, mbhoni ya vunwa leyi tisungulelaka mavunwa, ni loyi a hlohlotelaka timholovo exikarhi ka vamakwavo.” (Swivuriso 6:16-19) Xiya leswaku Xikwembu xi venga mahanyelo ya munhu lama vavisaka vanhu van’wana. Kutani hi dyondza leswaku Xikwembu xa hi khathalela naswona xa swi venga swilo leswi hi vavisaka.

Yehovha i Xikwembu lexi nga ni rirhandzu. Bibele yi hlamusela leswaku Xikwembu xi va rhandza ngopfu “vanhu va misava leyi.” (Yohane 3:16, Bibele ya Contemporary English Version) Yi xi hlamusela tanihi tatana la nga ni rirhandzu loyi a navelelaka vana vakwe leswinene. (Esaya 64:8) Vanhu va nga kuma mikateko yo tala hi ku pfumela leswaku Xikwembu i Tata wa vona la nga ni rirhandzu.

U Nga Va Munghana Wa Xikwembu

Entiyisweni, Bibele yi dyondzisa leswaku Muvumbi i munhu wa xiviri la nga ni vito ni timfanelo. U ni vuswikoti byo tirhisa matimba ni ku teka magoza lawa a rhangeke hi ku ehleketisisa ha wona a susumetiwa hi timfanelo letikulu to fana ni musa, vutlhari ni vululami. A nga le kule na hina. Ematshan’weni ya sweswo, u ri: “Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’”—Esaya 41:13.

Xikwembu xi ni xikongomelo hi vanhu. Bibele yi ri: “Lavo lulama va ta dya ndzhaka ya misava, va ta tshama eka yona hi masiku.” (Pisalema 37:29) Ku tiva leswaku Yehovha u hlawulekile nileswaku vumunhu byakwe a byi fani ni bya vanhu, swa hi olovela leswaku hi aka vunghana na yena ni ku tsakela mikateko leyi a yi nyikaka lava vaka vanghana vakwe.—Deteronoma 6:4, 5; 1 Petro 5:6, 7.

XANA U TSHAME U TIVUTISA?

● Xana Xikwembu xi ni vito?—Esaya 42:8.

● Xana ku ni swikwembu swo tala?—1 Vakorinto 8:5, 6.

● Xana vanhu va nga va ni vuxaka lebyikulu ni Xikwembu xa ntiyiso?—1 Petro 5:6, 7.

[Xifaniso lexi nga eka tluka 29]

Xana Xikwembu a xi ta hi vumba hi ri vanhu lava rharhanganeke loko xona a xi ri matimba lama nga riki munhu?