Ndlela Leyi Nhlampfi Leyi Vuriwaka N’wenga Yi Hlambelaka Ha Yona

Xana Yi Lo Endliwa?

Ndlela Leyi Nhlampfi Leyi Vuriwaka N’wenga Yi Hlambelaka Ha Yona

● Leswaku tinxaka leti ta tinhlampfi ti kota ku tshikela matandza, to tala ta tona ti hlambela ti kongome laha mati ma khulakaka ma huma kona. Xana ti swi kotisa ku yini ku tiyisela riendzo rero ro tika handle ko karhala? Mati lama khulukaka hi matimba a ma endli leswaku swi yi tikela ku hlambela, kahle-kahle nhlampfi leyi yi endla leswaku swi yi olovela. Njhani?

Xiya: Nhlampfi leyi a swi yi tikeli ku hlambela eka mati lawa. Ematshan’weni ya sweswo, loko ti hlambela ti ya laha mati ma humaka kona, ti kuma matimba eka mati lama khulukaka hi rivilo, lama siviwaka hi maribye, marhavi kumbe swilo swo karhi. Loko mati lama khulukaka hi rivilo ma ri karhi ma siviwa hi swilo swo fana ni maribye, swi endla leswaku nhlampfi leyi yi kota ku hlambela yi ya hala ni hala ni ku fohla exikarhi ka mati lama khulukaka. (Vona xifaniso.) Mintlawa yin’wana ya tinhlampfi leti, yi kota ku hlambela hi ku olova yi hundza eka mati lama rhendzelekisiwaka hi tinhlampfi leti nga emahlweni. Nhlampfi leyi yi nga tlhela yi kota ku hlambela kahle eka mati lama rhendzelekisiwaka hi miri wa yona!

Valavisisi va navela ku dyondza ndlela leyi nhlampfi leyi yi hlambelaka ha yona ni ndlela leyi yi kumaka matimba eka mati lama khulukaka katsongo. Switirhisiwa leswi tolovelekeke swo humesa gezi hi ntolovelo swi humesa gezi ematini lama khulukaka hi mpimo wa tikhilomitara ta kwalomu ka kaye hi awara kumbe ku tlula. Nchumu wun’wana lowu kotaka ku rhendzelekisa mati ku fana ni nhlampfi leyi, wu nga humesa gezi ematini hi mpimo lowu endlaka tikhilomitara tinharhu hi awara.a Hambiswiritano, thekinoloji a hi nchumu loko yi pimanisiwa ni ku rharhangana ka n’wenga. Profesa Michael Bernitsas wa le Yunivhesiti ya Michigan, eU.S.A., u ri: “Emhakeni leyi nhlampfi leyi yi hi tlula ekule hi vutlhari.”

U anakanya yini? Xana vuswikoti bya n’wenga byo tinyika matimba hi ku rhendzelekisa mati byi lo tiendlekela kumbe byi lo endliwa?

[Nhlamuselo ya le hansi]

a Sweswo swi nga pfuna hikuva rivilo leri mati yo tala ma khulukaka ha yona a ri tluli tikhilomitara ta ntlhanu hi awara.

[Laha Xifaniso Xi Humaka Kona eka tluka 25]