Xana Vukhongeri Byi Kondletela Ku Rhula?

TIKEREKE tin’wana ta vujagana ti tekiwa tanihi leti kwetsimaka ngopfu, Kereke ya Sirha ro Kwetsima eYerusalema na yona yi sungule ku va mfungho wa vukhongeri lebyi nga ni madzolonga ni rivengo. Hi ku ya hi ndhavuko, tikereke ti funghe ndhawu leyi, “tanihi leyi Kreste a lahliweke eka yona ni leyi a nga pfuxiwa eka yona.” Hambiswiritano, ndhawu leyi leyi xiximiwaka yi tlhele yi va ndhawu ya madzolonga. Tinghwendza ni vaprista lava humaka eka mintlawa ya tsevu yo hambana-hambana ya “Vakreste” va sungule ku kwetlembetana malunghana ni loyi a nga ta tirhisa ndhawu yoleyo. Nkwetlembetano lowu wu nyanyile swinene emalembeni lama ha ku hundzaka. Maphorisa lama lwisanaka ni madzolonga, lama hlomeke hi matlhari ma boheke ku nghenelela leswaku ma lawula ndhawu yoleyo swa xinkarhana.

I Khale Vukhongeri Byi Ri Karhi Byi Vanga Madzolonga

Swiendlakalo leswi humeleleke eKerekeni ya Sirha ro Kwetsima i swiendlakalo swa matimu ya khale ya ku dlaya ni leswi a swi fanisiwa ni ku hisekela vukhongeri. Eka nkambisiso lowu endliweke ematikweni yo hambana-hambana malunghana ni nkwetlembetano wa le kerekeni, buku leyi nge Violence in God’s Name yi ri: “Ku suka eIndonesia ku ya eIreland N’walungu, Vuxa Xikarhi bya Kashmir, Indiya ku ya eNigeria, matiko ya Balkan ku ya eSri Lanka, Vakreste, Mabudha, Vayuda, Mahindu, Mamoslem ni Masikh, ma nyikele xivangelo lexi twalaka malunghana ni madzolonga lama endliwaka etindhawini leti va ti lawulaka ta vukhongeri ni leti va ti rhandzaka.”

Hambiswiritano, vukhongeri byo tala byi dyondzisa ku kondletela ku rhula ni ntwanano tanihi dyondzo ya xisekelo. Ku ringana malembe yo tala, milawu ya vutianakanyi yo tanihi ku rhandza vaakelani ni ku kwetsimisiwa ka vutomi bya munhu swi kuceteriwe hi vukhongeri. Tanihi leswi vukhongeri byi dyondzisaka hi ku rhula, byi fanele byi rhanga byi kombisa vanhu van’wana ku rhula. Vanhu lava nghenaka kereke va fanele va kambisisa mhaka leyi hi vukheta.