Xiphiqo Xa Vukhongeri

LOKO ku vuriwa leswaku vukhongeri hi byona byi vangaka mpfilumpfilu, sweswo swi vula leswaku tinyimpi a ti ta va ti nga talanga loko a ku nga ri na vukhongeri. Xana mhaka yoleyo ya twala? Xana hi nga swi kota ku herisa nyimpi loko ho rhanga hi herisa vukhongeri? Ku nga khathariseki nhlamulo ya wena, ntiyiso wa mhaka hi leswaku: Vukhongeri byi endla leswaku vanhu va nga vi na vun’we. Kambisisa swin’wana swa swivangelo leswi endlaka leswaku mhaka leyi yi va ntiyiso.

Ku Avana Ka Vukhongeri

Vanhu va avanile hikwalaho ka vukhongeri byo hambana-hambana lebyi nga ni matimba, ni lebyi tshamelaka ku kwetlembetana. Xana xi kona xivangelo xo tshemba leswaku vukhongeri bya Mabudha, Mahindu, Mamoslem, Vakreste ni bya Vayuda byi ta kala byi hanyisana hi ku rhula?

Nchumu wun’wana lowu twisaka ku vava i ku avana loku nga kona exikarhi ka swirho swa vukhongeri lebyikulu. Hi xikombiso, hi ku ya hi xiringanyeto xin’wana, vujagana byi avane hi mintlawa yo tlula 30 000. Nakambe Mamoslem ma avanile hikwalaho ka tidyondzo ta wona leti nga faniki. Mohsen Hojjat muviki wa mahungu wa le Vuxa Xikarhi tlhelo xidyondzeki xa Mumoslem u pfumerile leswaku “ku nga twanani exikahi ka Mamoslem hi swona swi vangaka swiphiqo eka vukhongeri bya vona.” Vukhongeri byin’wana lebyi nga ni nkutetelo lowukulu byo tanihi Mabudha, Mahindu ni bya Vayuda na byona byi avanile hikwalaho ka leswi ku nga ni mimpambukwa yo tala exikarhi ka byona.

Vukhongeri Bya Katseka Eka Tipolitiki

Swi tikomba onge vukhongeri byi nghenelela eka nchumu wun’wana ni wun’wana lowu humelelaka evuton’wini. Magazini wa The Economist wu vule leswaku “vukhongeri byi katseka eka nchumu wun’wana ni wun’wana lowu humelelaka evuton’wini, ku katsa ni le ka mabindzu. Nakambe vukhongeri lebyi vanhu va pfumelaka eka byona byi khumba swilo leswi va swi hlawulaka ku katsa ni swa timali.” Byi endla leswaku vanhu va avana ematshan’weni yo va ni vun’we. Kambe nchumu lowu onheke swinene i ku va vukhongeri byi katseka eka tipolitiki.

Eka xiviko xa sweswinyana lexi ku vulavuriweke ha xona eka xihloko lexi nga hundza, ntlawa wa van’wamatimu wu vule leswaku “vukhongeri hi byona lebyi vangaka nyimpi loko byi endla xinghana ni valawuri va tiko.” Naswona sweswo swi vula leswaku: Ku sukela eku sunguleni ku ta fikela ninamuntlha, vukhongeri byi nghene hi nhloko eka tipolitiki ni tinyimpi.

Vukhongeri Byo Tala Byi Vanga Mpfilumpfilu

Ematikweni yo tala, vukhongeri lebyikulu byi hundzuke mfungho wo rhandza tiko ni ku rhandza rixaka ro karhi. Vuyelo bya kona, i ku vengana ka matiko, xihlawu-hlawu, ku vengana ka tinxaka ni vulala exikarhi ka vukhongeri lebyi swi nga kotekiki ku byi hambanisa. Mpfilumpfilu lowu wu endla leswaku vanhu va avana.

Lexi endlaka leswaku ku va ni mpfilumpfilu hi leswi vukhongeri byo tala byi vulaka leswaku byi yimela Xikwembu xa le Bibeleni, ku nga Muvumbi. Xana swa twala leswaku lowa matimba hinkwawo, Muvumbi la tlhariheke wa katseka eka swiphiqo ni nandzu wa ngati lowu vukhongeri byi nga na wona?

[Xifaniso lexi nga eka tluka 6]

Magidi ya Timbhoni ta Yehovha ma khomiwile hikwalaho ko hlawula ku nga hlanganyeli eka swa tipolitiki