Xihlovo Xa Nkongomiso Ni Ntshembo Lowu Tiyisekisiweke

KU HAMBANA ni madimona, Yehovha Xikwembu u ni vutlhari ni matimba lamakulu swinene. Nakambe i rirhandzu. (1 Yohane 4:8) Switsundzuxo swakwe i swinene minkarhi hinkwayo, u hi nyika swona mahala naswona u hi navelela leswinene. Wa nga vona ndlela leyi a hambaneke ha yona ni vafembi swin’we ni vakambisisi va miehleketo! Xikwembu xi ri: “N’wina hinkwenu lava nga ni torha [ra moya]! Tanani ematini. Ni lava nga riki na mali! Tanani, mi ta xava mi dya. Ina, tanani, mi ta xava vhinyo ni ntswamba handle ka mali, handle ka nxavo. Ha yini mi tshamela ku hakela mali eka leswi nga riki xinkwa, naswona ha yini mi tikarhatela leswi nga enerisiki? Ndzi yingiseni kahle, mi dya leswinene, moya-xiviri wa n’wina wu kuma ntsako lowu heleleke emafurheni.”—Esaya 55:1, 2.

Leswi Bibele yi huhuteriweke hi Muvumbi wa hina la nga ni rirhandzu, yi hi nyika ntshembo, nsirhelelo wa moya, xikongomelo xa vutomi ni milawu leyi hi faneleke hi hanya ha yona. Hi kombela leswaku u anakanyisisa hi swivutiso leswi landzelaka kutani u xiya tinhlamulo ta swona leti kumekaka eBibeleni.

[Bokisi leri nga eka tluka 7]

● Ndzi nga ku kuma njhani ku rhula ka mianakanyo? Bibele yi ri: “Yehovha, Mukutsuri wa wena, Mukwetsimi wa Israyele u te: “Mina Yehovha, ndzi Xikwembu xa wena, Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona. Kunene loko a wu yingise swileriso swa mina! Kutani ku rhula ka wena a ku ta fana ni nambu, ni ku lulama ka wena a ku ta fana ni magandlati ya lwandle.”—Esaya 48:17, 18.

● Xana vuhomboloki byi ta hambeta byi va kona? “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.” (Swivuriso 2:21, 22) Vanhu vo homboloka swin’we ni tintsumi to homboloka va ta loviseriwa makumu onge hiloko va lovisiwa hi ndzilo.—Nhlavutelo 20:10, 14.

● Xana maxangu ni vuvabyi swi ta kala swi hela? “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula [ku nga swiphiqo swo tala leswi nga kona namuntlha] swi hundzile.”—Nhlavutelo 21:3, 4.

Ku hambana ni madimona Xikwembu a xi si tshama xi hemba. Entiyisweni xi nga ka ‘xi nga hembi.’ (Tito 1:2) Tlhandlakambirhi, hilaha xihloko xo hetelela eka swihloko leswi swa nxaxamelo xi nga ta kombisa ha kona, ntiyiso wa xona wa sirhelela naswona wu nyika vutomi.—Yohane 8:32; 17:3.