“A Ndzi Nga Lavi No Yi Veka eHansi!”

● Vantshwa lava humaka emisaveni hinkwayo, va kombise ndlela leyi va yi tlangelaka ha yona buku leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2.a Xiya swikombiso swin’wana:

“Buku leyi ndza yi rhandza hikuva yi endla leswaku hi kota ku burisana ni vatswari va hina. Ndzi ringete ku tirhisa swiringanyeto leswi nga eka yona naswona sweswi ndzi nga vula handle ko tipfinyinga leswaku ndlela leyi ndzi burisanaka ha yona ni vatswari va mina se ya antswa.”—Roberto, wa le Mexico.

“Loko ndzo kala ndzi sungula ku hlaya buku leyi, swa ndzi tikela ku yi veka ehansi! Ndzi tsakela bokisi leri nge ‘Leswi Ndzi Tiyimiseleke Ku Swi Endla’ leri kumekaka eku heteleleni ka ndzima yin’wana ni yin’wana swin’we ni tluka leri nge ‘Tinhla Ta Mina’ leri kumekaka eku heteleleni ka xiyenge xin’wana ni xin’wana. Buku leyi yi ndzi pfunile leswaku ndzi kota ku yimela ripfumelo ra mina exikolweni.”—Joelah, wa le United States.

“Loko ndzi ya emahlweni ndzi yi hlaya, rungula ra yona ri ya ri ndzi pfuna swinene. Ndzi tsakisiwe hi mintshaho ya vantshwa vo tala ku katsa ni bokisi leri nge ‘Xana A Wu Swi Tiva Leswaku?’ ni leri nge ‘Xitsundzuxo.’ Buku leyi yi swi veka erivaleni leswaku Huvo leyi Fumaka ya Timbhoni ta Yehovha ya khathala hi vantshwa!”—Hui-won, wa le Korea Dzonga.

“Eka tibuku hinkwato leti kandziyisiweke hi Timbhoni ta Yehovha, leyi hi yona leyi ndzi tsakisaka ngopfu ku tlula hinkwato. Mi swi tiva kahle leswi vana lava nga emalembeni ya kondlo-a-ndzi-dyi va swi anakanyaka ni swiphiqo leswi va langutanaka na swona endyangwini, exikolweni ni leswi vangiwaka hi vanghana.”—Shana, wa le Canada.

“Minkarhi hinkwayo loko vatswari va mina va holova, a ndzi ya ekamareni ya mina ndzi ya rila. Kambe endzhaku ko hlaya ndzima 24 leyi nge ‘Ndzi Fanele Ndzi Endla Yini Loko Vatswari Va Mina Va Holova?,’ ndzi kote ku vulavurisana na vona hi mhaka leyi. Swi va hlamarisile ku tiva leswaku ku holova ka vona a swi ndzi khumba swinene. Na vona va hlaye ndzima leyi. Sweswi va yi twisisa ku antswa ndlela leyi ndzi titwaka ha yona naswona a va ha tshameli ku holova.”—Mariana, wa le Czech Republic.

“Matluka lawa ma nga ni bokisi leri nge, ‘Xikombiso Lexinene’ ma ndzi khumbile naswona ma ndzi pfune ngopfu leswaku ndzi kota ku antswisa laha ndzi siyekaka kona. Hi xikombiso, swa ndzi tikela ku titoloveta ni vanhu lava ndzi nga va tiviki eminhlanganweni ya Vukreste. Kambe tluka 97 ri hi byela leswaku Lidiya u kote ku tiva Pawulo ni vanghana vakwe ku antswa hi ku va kombisa malwandla. Sweswi ndzi lwela ku tekelela xikombiso xakwe.”—Mónika, wa le Hungary.

[Nhlamuselo ya le hansi]

[Bokisi/Xifaniso lexi nga eka tluka 25]

“LESWI ENDLAKA KU ENDLA TIMHAKA TA MASANGU EMAHLWENI KA VUKATI SWI VA LESWI HOXEKE”

Katrina, xinhwanyatana lexi nga ni malembe ya 16 xa le United States, a a xi komberiwe ku hlawula nhloko-mhaka leyi xi nga tsakelaka ku bula ha yona xi yime emahlweni ka vadyondzi kulobye. Xi yi tirhise kahle buku leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, xi hlawule ku vulavula hi nhloko-mhaka leyi nge, “Leswi Endlaka Ku Endla Timhaka Ta Masangu Emahlweni Ka Vukati Swi Va Leswi Hoxeke.” Vatswari vakwe va hlamusela: “Eka mbulavulo wakwe Katrina u vule leswi rito ku nga ‘hlanganyeli’ ri vulaka swona naswona u hlamusele makhombo yo hlanganyela timhaka ta masangu emahlweni ka vukati, u tlhele a hlamusela ni vuyelo byo vava lebyi vaka kona hikwalaho ko tlula milawu ya Xikwembu ya mahanyelo. Nakambe u tshahe leswi vuriweke hi vantshwa van’wana ebukwini yoleyo, a kombisa ndlela leyi vantshwa van’wana va titweke ha yona endzhaku ko tlula milawu ya Xikwembu ya mahanyelo. Kutani u pfumelele vadyondzi-kulobye leswaku va n’wi vutisa swivutiso leswi endzhaku a va hlamuleke swona. Endzhaku ka sweswo, mudyondzisi wakwe u n’wi tsalele xipapilana lexi marito man’wana ya xona a ma ku: ‘Ha ku nkhensa leswi u vulavuleke ntiyiso ni leswi u tiseke rivoningo emisaveni leyi nga tiviki ntiyiso. Tshama u tiyile eripfumelweni.’”