U “Endliwe Hi Ndlela Yo Hlamarisa”!
LOKO u anakanya hi vuswikoti byo hlamarisa lebyi swiharhi swi nga na byona, xana minkarhi yin’wana u titwa u navela onge u nga endla leswi swi endlaka? Kumbexana u navela onge u nga haha ku fana ni nyenyana leyi vuriwaka albatross, u hlambela ku fana ni dolfini, u vona ku fana ni gama kumbe u tsutsuma ku fana ni xinkankanka.
Hakunene, swiharhi swi ni vuswikoti byo hlamarisa. Kambe, xana na hina hi na byona! Ina, miri wa munhu wu nga fanisiwa ni muchini lowu tirhaka kahle. Entiyisweni, hi ni vuswikoti byo tlula muchini. Hi kota ku tisungulela swilo, hi navela ku tiva, hi ni mianakanyo swin’we ni vuswikoti, ku nga timfanelo leti endlaka leswaku hi kota ku endla michini leyi hi pfunaka ku endla swilo swo hambana-hambana. Hi nga endla michini yo haha hi rivilo leri tlulaka ra mpfumawulo; hi nga swi kota ku nyupela hi ya exidziveni xa lwandle; hi vona timboni leti nga le xibakabakeni ta kwalomu ka 14 wa tibiliyoni; hi kota ku kambisisa tisele leti hanyaka; hi endla mirhi yo tshungula swin’we ni swilo swa thekinoloji leswi hi pfunaka ku sivela ni ku tshungula mavabyi.
Hambiloko mpfuno wolowo kumbe thekinoloji yi nga ri kona hi nga swi kota ku ya emahlweni hi endla swilo swo hlamarisa. Hi xikombiso, eka Mintlango ya Tiolimpiki, vatlangi va tlanga mintlangu yo hambana-hambana leyi eka yin’wana ya yona va tlulaka hi ku copeta ka tihlo va siya vahlaleri va sala va tikhome tinhlaya.
Xana wa yi tlangela nyiko yo hlawuleka leyi u nga na yona? Entiyisweni, swi nga ha endleka u nga ri mutlangi wa Tiolimpiki, kambe u ni tinyiko to tala leti u nga ti tlangelaka. Mutsari wa khale wa Bibele u kombise ku tlangela ka yena eka Xikwembu hi ku yimbelela a ku: “Ndzi ta ku dzunisa hikuva ndzi endliwe hi ndlela yo hlamarisa, leyi chavisekaka.”a (Ps. 139:14) Ha yini u nga anakanyisisi hi mhaka yoleyo loko u ri karhi u hlaya swihloko leswi landzelaka? Swi ta yi tlhuvutsa hi vuenti ndlela leyi miri wa munhu wu endliweke ha yona hi ndlela yo hlamarisa, swin’we ni timfanelo tin’wana ta nkoka leti hi endlaka hi va vo hlawuleka.
[Nhlamuselo ya le hansi]
a Vahlayi lava lavaka ku tiva leswi engetelekeke malunghana ni ntumbuluko ni dyondzo ya ku tiendlekela ka swilo, va nga ha tsakela ku hlaya broxara leyi nge Xana Swilo Leswi Hanyaka Swi Lo Tumbuluxiwa? ni leyi nge The Origin of Life—Five Questions Worth Asking. Tibroxara leti u nga ti kuma eka Timbhoni ta Yehovha ta laha u tshamaka kona kumbe eka vakandziyisi va magazini lowu.
[Bokisi leri nga eka tluka 3]
ENDLA MATSHALATSHALA YO KUMA MATIMBA
Leswaku hi kota ku famba ni ku yima hi ololoka swi lava hi kuma matimba. John R. Skoyles mutivi la nga ni vutshila etimhakeni ta misiha u ri: Entiyisweni, ‘loko hi yima hi tirhisa tiphesente ta nkombo ta matimba ku tlula loko hi etlele.’ U tlhele a vula leswaku loko mbyana yi yimile (hi milenge ya yona ya mune) yi tirhisa matimba ya kwalomu ka 70 wa tiphesente ku tlula loko yi etlele.