Langutelo Ra Bibele

Ha Yini Valandzeri Va Yesu Va Ntiyiso Va Vengiwa?

“Vanhu va ta mi nghenisa enhlomulweni, va mi dlaya, naswona mi ta vengiwa hi matiko hinkwawo hikwalaho ka vito ra mina.”—MATEWU 24:9.

YESU u vule marito wolawo ku sele masiku ma nga ri mangani a nga si dlayiwa hi ndlela ya tihanyi. Hi vusiku bya le mahlweni ka rifu rakwe, u byele vaapostola vakwe vo tshembeka a ku: “Loko va ndzi xanisile, na n’wina va ta mi xanisa.” (Yohane 15:20, 21) Kutani ha yini vanhu va venga vanhu lava yingisaka Yesu kambe va ringeta ku tifanisa na yena? Phela u nyikele hi miri wakwe hikwalaho ka vanhu hinkwavo, a chavelela swisiwana ni ku nyika lava tshikileriweke ntshembo.

Bibele yi paluxa swivangelo leswi kongomeke swa ku vengiwa ka vona. Loko hi kambisisa rivengo leri, ha swi vona leswaku hikwalaho ka yini vanhu lava landzelaka Kreste namuntlha va langutana ni ku kanetiwa loku a langutaneke na kona.

Vakaneti Va Nga Endla Swilo Hikwalaho Ko Pfumala Vutivi

Yesu u byele valandzeri vakwe a ku: “Nkarhi wa ta lowu un’wana ni un’wana loyi a mi dlayaka a nga ta anakanya leswaku u endlele Xikwembu ntirho wo kwetsima. Kambe va ta endla swilo leswi hikuva a va n’wi tivanga Tatana kumbe mina.” (Yohane 16:2, 3) I ntiyiso leswaku vaxanisi vo tala va vule leswaku va gandzela Xikwembu lexi Yesu a a xi gandzela, kambe a va kuceteriwa hi tidyondzo ta mavunwa ta vukhongeri ni mindhavuko ya vona. A “va xi hisekela Xikwembu; kambe ku nga ri hikwalaho ka vutivi lebyi kongomeke.” (Varhoma 10:2) Un’wana wa vakaneti volavo a ku ri Sawulo wa le Tarso, loyi eku heteleleni a veke muapostola Pawulo la nga Mukreste.

Sawulo a a ri wa ntlawa lowu tiviwaka tanihi Vafarisi, n’watipolitiki la nga ni matimba ni mukuceteri wa mpambukwa wa Vayuda lowu a wu kanetana ni Vukreste. Endzhakunyana, Sawulo u pfumerile leswaku a a ri “musandzi ni muxanisi ni murhukani.” U tlhele a ku: “A ndzi pfumala vutivi naswona a ndzi endla hi ku pfumala ripfumelo.” (1 Timotiya 1:12, 13) Hambiswiritano, loko a dyondze ntiyiso malunghana ni Xikwembu ni N’wana wa xona, u nambe a ku ma thya, mahanyelo yakwe!

Namuntlha ku endleke leswi fanaka eka vo tala lava eku sunguleni a va ri vaxanisi. Ku engetela kwalaho, van’wana va vona vo fana na Pawulo, eku heteleleni va xanisiwile. Nilokoswiritano, a va tlheriselanga swo biha hi swo biha kambe va landzele xitsundzuxo xa Yesu lexi nge: “Hambetani mi rhandza valala va n’wina, mi khongelela lava mi xanisaka.” (Matewu 5:44) Timbhoni ta Yehovha ti tikarhatela ku tirhisa marito wolawo, ti ri ni ntshembo wa leswaku van’wana va vakaneti va ta cinca langutelo ra vona, hilaha Pawulo a endleke ha kona.

Vakaneti Van’wana Va Ni Mavondzo

Vanhu vo tala lava kaneteke Yesu, va n’wi kanete hileswi a va ri ni mavondzo. Hakunene mufumi wa Rhoma Pontiyo Pilato “a a swi lemukile leswaku vaprista lavakulu va nyikete [Yesu] hikwalaho ka mavondzo” leswaku a beleriwa emhandzini! (Marka 15:9, 10) Ha yini varhangeri va vukhongeri bya Vuyuda a va n’wi venga Kreste? Xivangelo xin’wana hileswi a a rhandza hi vanhu lava tolovelekeke, lava a va languteriwa ehansi hi varhangeri va vukhongeri. Vafarisi va vilele va ku: “Misava ya n’wi landzela.” (Yohane 12:19) Hilaha ku fanaka, loko vanhu va angula kahle eka vutirheli bya valandzeri va Kreste, varhangeri va vukhongeri lava kanetaka ‘va tale mavondzo’ kutani va sungula ku sola vutirheli bya Vakreste.—Mintirho 13:45, 50.

Valala van’wana a va hlundzukisiwa hi mahanyelo lamanene ya malandza ya Xikwembu. Muapostola Petro u byele Vakreste-kulobye a ku: “Hikwalaho ka leswi mi nga hambetiki mi tsutsuma na vona [evubihini] endleleni leyi yaka exidziveni lexi fanaka xa manyala, va hlamala naswona va tshamela ku vulavula ha n’wina hi ku tseketsela.” (1 Petro 4:4) Leswi swa endleka ninamuntlha. Loko Vakreste va ntiyiso va papalata mahanyelo yo biha, a va kombisi swona leswaku va lulamile kumbe va tlakukile. Hakunene sweswo ku ta va ku nga ri moya wa Vukreste, hikuva vanhu hinkwavo va dyohile naswona va lava tintswalo ta Xikwembu.—Varhoma 3:23.

Ku Vengiwa Hikwalaho Ka Ku Nga Vi “Xiphemu Xa Misava”

“Bibele yi ri: “Mi nga rhandzi misava kumbe swilo leswi nga emisaveni.” (1 Yohane 2:15) Hi yihi “misava” leyi muapostola Yohane a a vulavula ha yona? Misava ya vanhu yi tihambanise ni Xikwembu kutani yi tiveka ehansi ka Sathana ku nga “xikwembu xa mafambiselo lawa ya swilo.”—2 Vakorinto 4:4; 1 Yohane 5:19.

Khombo ra kona, van’wana lava rhandzaka misava ni tindlela ta yona to biha va kaneta lava ringetaka ku hanya hi tidyondzo ta Bibele. Hikwalaho, Yesu u byele vaapostola vakwe a ku: “Loko a mi ri xiphemu xa misava, misava a yi ta rhandza leswi nga swa yona. Kutani leswi mi nga riki xiphemu xa misava, kambe ndzi mi hlawuleke emisaveni, hikwalaho ka sweswo misava ya mi venga.”—Yohane 15:19.

Swi twisa ku vava leswi vanhu volavo va vengaka malandza ya Yehovha hileswi ma nga rhandziki misava leyi fumiwaka hi Sathana leyi teleke hi vukanganyisi, vuhomboloki ni madzolonga! Vanhu vo tala va timbilu letinene va lava ku endla misava yi va ndhawu yo antswa, kambe a va nge swi koti ku herisa mufumi wa yona la nga vonakiki. I Yehovha ntsena la nga herisaka Sathana naswona u ta n’wi lovisela makumu onge hiloko a tirhisa ndzilo!—Nhlavutelo 20:10, 14.

Ntshembo wolowo lowu hlamarisaka ku vulavuriwa ha wona eka “mahungu lamanene lawa ya mfumo” lama chumayeriwaka hi Timbhoni ta Yehovha emisaveni hinkwayo. (Matewu 24:14) Ina, Timbhoni ta khorwiseka leswaku i Mfumo wa Xikwembu ntsena, lowu fumiwaka hi Kreste lowu nga ta tisa ku rhula ni ntsako lowu nga heriki emisaveni. (Matewu 6:9, 10) Hikwalaho, ti ta hambeta ti chumayela hi Mfumo wolowo, ti teka ku amukeriwa hi Xikwembu swi ri swa nkoka swinene ku tlula ku amukeriwa hi vanhu.

XANA U TSHAME U TIVUTISA?

● Ha yini Sawulo wa le Tarso a a kaneta valandzeri va Kreste?—1 Timotiya 1:12, 13.

● Hi rihi langutelo ro biha leri endleke leswaku valala van’wana va Yesu va n’wi venga?—Marka 15:9, 10.

● Xana Vakreste va ntiyiso va yi languta njhani misava?—1 Yohane 2:15.

[Xifaniso lexi nga eka tluka 21]

Hi 1945, Timbhoni ta Yehovha ti xanisiwe hi ntshungu wa vapfukeri eQuebec ni le Canada hikwalaho ko chumayela mahungu lamanene ya Mfumo wa Xikwembu

[Xihlovo Xa Kona]

Courtesy Canada Wide