Langutelo Ra Bibele

Xana Swa Boha Ku Veka Siku Rin’we Ro Kwetsima eVhikini?

EMISAVENI hinkwayo timiliyoni ta Mamoslim, Mayuda ni vanhu lava tivulaka Vakreste va ti vekele siku rin’we evhikini leri va ri tirhiselaka swilo swa vukhongeri. Ha yini? Hi xikombiso, Ibrahim loyi a tinyiketeleke eka vukhongeri bya Mamoslem la yaka eka ndhawu leyi ku gandzeriwaka eka yona hi Ravuntlhanu wun’wana ni wun’wana leswaku a ya khongela a tlhela a yingisela dyondzo ya vona u ri: “Ndzi lava ku titwa ndzi ri ekusuhi ni Xikwembu naswona ndzi kuma ku rhula ka miehleketo.”

Xana Bibele yi dyondzisa leswaku Xikwembu xi lava leswaku hi tivekela siku rin’we ro kwetsima evhikini? Xana ku gandzela hi siku ro karhi swi endla leswaku hi va ni vuxaka lebyinene ni Xikwembu?

Lunghiselelo Ra Xinkarhana

Eka malembe lama tlulaka 3 500 lama hundzeke, Xikwembu xi tirhise muprofeta Muxe leswaku a nyika vanhu milawu yo karhi yo hlawuleka. Nawu wolowo a wu katsa Tisavata kumbe masiku yo wisa lawa a ma tirhiseriwa vugandzeri. Siku leri a ku wisiwa ha rona evhikini rin’wana ni rin’wana a ku ri siku ra Savata. A ri sungula nimadyambu hi Ravuntlhanu naswona ri hela hi Mugqivela nimadyambu.—Eksoda 20:8-10.

Xana vanhu va tinxaka hinkwato a va fanele va hlayisa siku rero ro wisa vhiki rin’wana ni rin’wana? Nikatsongo. Nawu wa Muxe a wu nyikiwe Vaisrayele hi ku kongoma swin’we ni vanhu vamatiko lava a va ri na vona. Xikwembu xi byele Muxe xi ku: “Vana va Israyele va fanele va hlayisa savata . . . I xikombiso xa hilaha ku nga riki na makumu exikarhi ka mina ni vana va Israyele.”a—Eksoda 31:16, 17.

Bibele yi vula leswaku Nawu wa Muxe a ku ri “ndzhuti wa swilo leswi nga ta ta.” (Vakolosa 2:17) Hikwalaho, Savata a ku ri lunghiselelo ra xinkarhana ra vugandzeri leri a ri kombisa lunghiselelo leri tlakukeke ra nkarhi lowu taka. (Vaheveru 10:1) Bibele yi vula leswaku hi ku ya hi langutelo ra Xikwembu, Nawu lowu nyikiweke Vaisrayele ku katsa ni ku hlayisa Savata vhiki rin’wana ni rin’wana, wu hele loko Yesu a fa. (Varhoma 10:4) Wu siviwe hi yini?

Ndlela Leyintshwa Yo Gandzela

Vugandzeri lebyi a byi amukeleka eka Xikwembu endzhaku ka loko Nawu wa Muxe wu hetisise xikongomelo xa wona, bya hlamuseriwa eBibeleni. Xana byi katsa ku gandzela hi siku ro karhi vhiki rin’wana ni rin’wana?

Matsalwa ma vula leswaku milawu yin’wana leyi a yi nyikiwa Vaisrayele a yi tlhela yi tirha ni le vandlheni ra Vukreste. Leswi a swi katsa milawu yo tanihi hi ku papalata ku gandzela swifaniso, vumbhisa, swin’we ni ku dya ngati. (Mintirho 15:28, 29) Hikwalaho, nawu lowu a wu vulavula hi ku hlayisa Savata vhiki rin’wana ni rin’wana a wu nga katsiwanga eka milawu leyi Vakreste a va fanele ku yi hlayisa.—Varhoma 14:5.

Hi swihi swilo swin’wana leswi Bibele yi hi byelaka swona malunghana ni ndlela leyi Vakreste va lembe-xidzana ro sungula a va gandzela ha yona? Nkarhi na nkarhi a va hlangana leswaku va khongela, va hlaya Matsalwa, va yingisela tinkulumo va tlhela va yimbelela tinsimu to dzunisa Xikwembu. (Mintirho 12:12; Vakolosa 3:16) Eka minhlangano yoleyo Vakreste a va kuma minkongomiso, va tiyisiwa ripfumelo va tlhela va khutazana.—Vaheveru 10:24, 25.

A ku kona laha Bibele yi vulaka leswaku minhlangano ya Vukreste a yi fanele yi khomiwa hi Sonto kumbe hi siku ro karhi evhikini. Hikwalaho, ha yini vanhu vo tala lava tivulaka Vakreste va teka siku ra Sonto tanihi siku ro kwetsima? Mukhuva wa ku gandzela hi Sonto wu ve kona loko ku hetiwa ku tsariwa Bibele naswona hi nkarhi wolowo ku sungule tidyondzo ni mindhavuko yo hambana-hambana leyi a yi nga sekeriwanga eBibeleni.

Xana hi ku famba ka nkarhi Xikwembu xi veke siku ro karhi evhikini leswaku ri va ra ku gandzela? Doo! Bibele yi yi hlamusela hi vuenti ndlela ya ntiyiso yo gandzela. A ku na matsalwa man’wana lama huhuteriweke lama engeteriweke eka Matsalwa yo Kwetsima. Muapostola Pawulo u huhuteriwe ku tsala a ku: “Niloko hina kumbe ntsumi ya le tilweni ho mi byela leswi fanaka ni mahungu lamanene ku tlula leswi hi mi byelaka swona tanihi mahungu lamanene, a yi rhukaniwe.”—Vagalatiya 1:8.

Vugandzeri Lebyi Phyuphyisaka Ni Lebyi Tsakisaka Xikwembu

Hambileswi vafundhisi va le nkarhini wa Yesu a va ri xixima hi vukheta siku ro kwetsima, vugandzeri bya vona a byi nga amukeleki eka Xikwembu hikuva timbilu ta vona a ti hombolokile. A va rhandza mali naswona a va va tekela ehansi vanhu lava nga swisiwana. A va lava swikhundlha, a va vanga hasahasa naswona a va katseka eka swa tipolitiki swa le minkarhini ya vona. (Matewu 23:6, 7, 29-33; Luka 16:14; Yohane 11:46-48) A va vula leswaku va gandzela Xikwembu. Savata leyi Xikwembu xi yi vekeke leswaku vanhu va ta phyuphyisiwa, va yi hundzurile va endla milawu ya vona leyi tshikilelaka vanhu.—Matewu 12:9-14.

Swi le rivaleni leswaku ku hlayisa siku ro kwetsima evhikini a hi ndlela yo gandzela leyi tsakisaka Xikwembu. I yini leswi lavekaka? Yesu u hi rhamba a ku: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa.” (Matewu 11:28) Vugandzeri lebyi sekeriweke eka tidyondzo leti Yesu a ti dyondziseke bya phyuphyisa hakunene. A byi na vukanganyisi naswona a byi na mihivahivana leyi tikiselaka vanhu.

Emisaveni hinkwayo Timbhoni ta Yehovha ti gandzela hi ndlela leyi valandzeri va Yesu va le ku sunguleni a va gandzela ha yona. Ti khoma minhlangano vhiki ni vhiki leyi eka yona ti dyondzaka Bibele. Masiku lawa ti khomaka minhlangano ha wona ma hleriwa hi ku ya hi swiyimo swa laha ti tshamaka kona, ku nga ri hi tidyondzo leti nga sekeriwangiki eMatsalweni. Ha yini u nga yi eka yin’wana ya minhlangano leyi, ya laha u tshamaka kona kutani u vona ndlela leyi yi phyuphyisaka ha yona?

[Nhlamuselo ya le hansi]

XANA U TSHAME U TIVUTISA?

● Xana u fanele u gandzela Xikwembu hi siku ro karhi evhikini?—Varhoma 10:4; 14:5.

● Ha yini hi fanele hi hlangana swin’we leswaku hi ta gandzela?—Vaheveru 10:24, 25.

● Vugandzeri lebyi phyuphyisaka byi vonaka hi yini?—Matewu 11:28.

Chati/Swifaniso leswi nga eka matluka 10, 11]

(Leswaku u vona rungula leri hleriweke hi ku helela, vona nkandziyiso wa kona)

RAVUMBIRHI

RAVUNHARHU

1 RAVUMUNE

2 RAVUNTLHANU

3 MUGQIVELA

4 SONTO