Langutelo Ra Bibele

Nkoka Wo Bumabumela Van’wana

VANHU vo tala va vona onge matshalatshala ya vona a ma tekeriwi enhlokweni hi van’wana. Hi xikombiso, hakanyingi vatirhi va titwa va nga tekeriwi enhlokweni hi vathori va vona. Vanhu vo tala lava ngheneleke vukati va vona onge vanghana va vona va vukati a va va teki va ri va nkoka. Entiyisweni, ku titwa hi ndlela yoleyo ku nga hunguteka loko hinkwerhu ho tiyimisela ku bumabumelana nkarhi na nkarhi.

Namuntlha, ku bumabumela a hi nchumu lowu tolovelekeke. Leswi a swi hlamarisi hikuva Bibele yi te: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, . . . lava nga nkhensiki, lava nga tshembekiki.”—2 Timotiya 3:1, 2.

Xana u tshame u bumabumeriwa hi munhu wo karhi swi huma embilwini? Loko swi ri tano, wa swi tiva leswaku ku bumabumeriwa swa tsakisa naswona swa khutaza. Bibele yi ri: “Rito leri fikeke hi nkarhi wa kona i rinene ngopfu.” (Swivuriso 15:23) Matsalwa yo Kwetsima ma nga hi pfuna leswaku hi hanyisana hi musa.

Languta Timfanelo Letinene Eka Van’wana

Xikwembu xa ti xiya ni ku ti tlangela timfanelo ni swiendlo swa hina leswinene hikuva xa hi rhandza. Bibele ya hi tiyisekisa yi ku: ‘Mahlo ya Xikwembu ma famba-famba emisaveni hinkwayo leswaku xi kombisa ntamu xona eka lava mbilu ya vona yi hetisekeke eka xona.’ (2 Tikronika 16:9) Loko hi kombisa leswaku ha xi rhandza hi ku yingisa milawu xona, a swi kanakanisi leswaku xi ta swi xiya.

Yehovha Xikwembu a nga languti swihoxo swa hina. Loko a a languta swihoxo swa hina, a nga kona loyi a a ta yima. (Pisalema 130:3) Ematshan’wini ya sweswo, Yehovha u fana ni mutirhi wa le mugodini la hlawulelaka maribye ya risima eka tinhulu ta maribye. Loko a ma kuma wa tsaka. Ribye rero leri nga siki hatimisiwaka ri nga ha tikomba ri nga ri ra risima kambe u ri teka ri ri ra nkoka. Hilaha ku fanaka, loko Yehovha a kambela timbilu ta hina, u va a lava timfanelo ta risima ku nga ri swihoxo. Loko a ti kuma wa tsaka. Wa swi tiva leswaku loko hi hambeta hi ti antswisa timfanelo teto, hi nga va vanhu va nkoka ivi hi va vagandzeri vakwe vo tshembeka ni lava tinyiketeleke eka yena.

Hi nga dyondza swo karhi eka xikombiso xa Xikwembu. Loko hi languta van’wana, hi nga ha va ni mboyamelo wo languta swihoxo swa vona. Kambe loko hi languta vanhu hilaha Yehovha a va langutaka hakona, hi ta languta timfanelo ta vona letinene. (Pisalema 103:8-11, 17, 18) Loko hi vona timfanelo ta vona letinene, hi nga va bumabumela. Vuyelo byi nga va byihi? Marito ya hina ma nga va khutaza naswona va nga ha tikarhata swinene leswaku va endla leswinene. Hi hala tlhelo, na hina hi ta kuma ntsako lowu tisiwaka hi ku nyika van’wana.—Mintirho 20:35.

Tlangela Swiendlo Leswinene

Yesu a a tala ku xiya ni ku tlangela swiendlo leswinene swa van’wana. Siku rin’wana wansati loyi a a vabya swinene u khumbe nguvu ya Yesu ya le handle a nga voniwi hi munhu leswaku a ta hola naswona leswi swi endle leswaku a sala a khomiwe hi rhumbyana, kambe Yesu u n’wi bumabumerile a ku: “N’wananga, ripfumelo ra wena ri ku hanyisile.”—Marka 5:34.

Eka xiendlakalo xin’wana loko Yesu a ri eku dyondziseni etempeleni ya le Yerusalema, u vone swigwili swo tala swi ri karhi swi nyikela mali emabokisini ya minyikelo. Kutani u vone noni leyi a yi ri xisiwana yi nyikela hi “swimalana swimbirhi swa nsimbi swa ntikelo wa le hansi swinene.” Van’wana va nyikele hi mali yo tala ku yi tlula. Kambe Yesu u yi bumabumele erivaleni hikwalaho ka leswi yi nyikeleke swi huma embilwini a ku: “Ndzi mi byela ntiyiso, Noni leyi, hambileswi yi nga xisiwana, yi hoxe swo tlula leswi hoxiweke hi lavan’wana hinkwavo. Hikuva lava hinkwavo va hoxe tinyiko leti va ti pambuleke eka leswi swi va taleleke, kambe wansati loyi hambileswi a a pfumala u hoxe hinkwaswo leswi a a ri na swona swa ku tihanyisa.”—Luka 21:1-4.

Hi nga n’wi tekelela njhani Yesu? Bibele yi ri: “U nga tshuki u ala ku va endlela leswinene lava swi va lulameleke, loko swi ri ematimbeni ya voko ra wena ku swi endla.”—Swivuriso 3:27.

Ku Bumabumela Swi Nyika Matimba

Emisaveni ya namuntlha leyi nga nkhensiki, hinkwerhu ha swi lava ku tekiwa hi ri va nkoka ni ku rhandziwa. Loko hi bumabumela van’wana swi huma embilwini, ha va tiyisa ni ku va nyika matimba. Xibumabumelo xa hina lexi humaka embilwini xi va susumetela ku hambeta va endla leswi nga ematimbeni ya vona.—Swivuriso 31:28, 29.

Bibele yi khutaza Vakreste hinkwavo yi ku: “A hi khathalelaneni leswaku hi khutazana erirhandzwini ni le mintirhweni leyinene.” (Vaheveru 10:24) Misava a yi ta va yi nga ri swona leswi yi nga xiswona loko hinkwerhu a hi rhandzana, hi languta timfanelo letinene ta van’wana naswona hi tlangela swiendlo leswinene swa vona. Hakunene ku bumabumela swi nyika matimba!

XANA U TSHAME U TIVUTISA?

● Ha yini hi fanele hi bumabumela van’wana loko va endle leswinene?—Swivuriso 15:23.

● I yini leswi Yehovha a swi langutaka loko a hi kambela?—2 Tikronika 16:9.

● Hi nga bumabumela van’wana loko swi te yini?—Swivuriso 3:27.

[Xifaniso lexi nga eka tluka 29]

Xana wa swi xiya ni ku swi tlangela swiendlo leswinene swa van’wana?