Xibumabumelo Xa Phyuphyisa
1 “Xana namuntlha a ndzi nga tikhomanga kahle?” ku rile xinhwanyatana xin’wana xi ri emubedweni wa xona. Xivutiso xexo xi hlamarise mana wa xona. Hambileswi a swi xiyeke leswaku xinhwanyatana xa yena xi ringete hi matimba leswaku xi tikhoma kahle siku rero, a nga kalanga a vula hambi ku ri rito rin’we ro xi bumabumela. Mihloti ya xinhwanyatana lexi yi hi tsundzuxa leswaku hinkwerhu—lavatsongo ni lavakulu—ha swi lava ku bumabumeriwa. Xana ha va phyuphyisa vanhu lava hi tshamaka na vona hi ku va bumabumela hikwalaho ka swilo leswinene leswi va swi endlaka?—Swiv. 25:11.
2 Hi ni swivangelo swo tala swo bumabumela Vakreste-kulorhi. Vakulu, malandza ya vutirheli ni maphayona va tirha hi matimba leswaku va hetisisa vutihlamuleri bya vona. (1 Tim. 4:10; 5:17) Vatswari lava chavaka Xikwembu va endla leswi nga ematimbeni ya vona leswaku va kurisa vana va vona hi tindlela ta Yehovha. (Efe. 6:4) Vantshwa va Vakreste va lwa hi matimba leswaku va nga ngheniwi hi “moya wa misava.” (1 Kor. 2:12; Efe. 2:1-3) Van’wana va tirhela Yehovha hi ku tshembeka ku nga khathariseki ku dyuhala, swiphiqo swa rihanyo ni miringo yin’wana. (2 Kor. 12:7) Vanhu vo tano hinkwavo va fanele va bumabumeriwa. Xana ha va bumabumela hikwalaho ka matshalatshala ya vona lama nkhensekaka?
3 Eka Munhu Hi Xiyexe Ni Hi Ku Kongoma: Hinkwerhu ha tsaka swinene loko hi bumabumeriwa tanihi vandlha. Hambiswiritano, munhu wa tsaka swinene loko a bumabumeriwa hi ku kongoma. Hi xikombiso, eka ndzima 16 ya papila rakwe leri yaka eka Varhoma, Pawulo u vule marito yo karhi loko a bumabumela Febe, Priska na Akhwila, Trayifina na Trayifosa na Persida ni van’wana. (Rhom. 16:1-4, 12) Marito ya yena ma fanele ma va phyuphyisile vanhu lava vo tshembeka! Xibumabumelo xo tano xi tiyisekisa vamakwerhu leswaku va rhandziwa naswona xi hi pfuna leswaku hi va ni vun’we. Xana u kona loyi u nga n’wi bumabumela sweswinyana?—Efe. 4:29.
4 Lexi Humaka eMbilwini: Leswaku xi va lexi phyuphyisaka hakunene, xibumabumelo xi fanele xi va lexi humaka embilwini. Vanhu va nga swi kota ku vona loko hi vulavula swi huma embilwini kumbe loko hi ‘tikurisa hi ririmi’ ntsena. (Swiv. 28:23) Loko hi ri karhi hi titoloveta ku xiya leswinene eka van’wana, timbilu ta hina ti ta susumeteleka ku va bumabumela. Onge hi nga swi endla mukhuva ku bumabumela van’wana swi huma embilwini, hi ri karhi hi tiva leswaku “rito leri fikeke hi nkarhi wa kona i rinene ngopfu!”—Swiv. 15:23.