Khathalela Van’wana—Hi Ku Va Bumabumela
1 Loko u bumabumela munhu hi mbilu hinkwayo swa n’wi khutaza, ni ku n’wi susumetela ku endla swo karhi, naswona sweswo swi n’wi endla a va ni ntsako. Vahuweleri vo tala va kume leswaku ku bumabumelanyana munhu ensin’wini hakanyingi swi n’wi endla a rhiya ndleve. Xana hi nga va bumabumela njhani vanhu loko hi ri karhi hi lava ndlela yo va chumayela mahungu lamanene?
2 Vana Ni Vuxiyaxiya: Yesu Kreste loko a tlhelela etilweni u bumabumele mintirho ya mavandlha ya nkombo ya le Asia Minor. (Nhlav. 2:2, 3, 13, 19; 3:8) Hilaha ku fanaka, vanhu lava hi hlanganaka na vona ensin’wini loko hi va tsakela hi mbilu hinkwayo sweswo swi hi susumetela ku lava tindlela to va bumabumela. Hi xikombiso, rivala ra muti leri basisiweke kahle, mutswari la kombisaka vana vakwe rirhandzu kumbe ku n’wayitela ka n’wini wa muti ni maxewetelo ya yena, leswi hinkwaswo swi nga hi nyika tindlela to bumabumela munhu yoloye. Xana wa swi xiya swilo leswi leswaku u ta kota ku bumabumela munhu ha swona?
3 Vana Muyingiseri Lonene: Loko u ri karhi u chumayela vanhu, va vutise swivutiso leswi faneleke leswaku va ta tiphofula. Va xixime hi ku rhiya ndleve eka leswi va swi vulaka. (Rhom. 12:10) Kumbexana hi ndlela yoleyo u ta kuma xo karhi lexi u nga ta va bumabumela ha xona kutani u andlala masungulo hi mhaka leyi mi twananaka ha yona.
4 Tirhisa Vutlhari: I yini leswi hi faneleke hi swi endla loko n’wini wa muti a vula swo karhi leswi nga pfumelelaniki ni Matsalwa? Ematshan’weni yo n’wi kaneta, nkhensa leswi a swi vuleke kutani u ya emahlweni hi ku vula swo fana ni leswi, “Ndza swi vona leswaku mhaka leyi ya ku tsakisa.” (Kol. 4:6) Hambiloko munhu wa kona a kaneta, hi nga ha n’wi nkhensa leswi a tsakelaka ku vulavula hi mhaka yoleyo. Ku angula hi ndlela yoleyo yo rhula swi nga ha verhamisa munhu la kanetaka mahungu lamanene.—Swiv. 25:15.
5 Leswaku marito ya hina yo bumabumela ma khutaza loyi hi n’wi bumabumelaka, hi fanele hi ma vula swi huma embilwini. Ku vulavula leswi akaka swi yisa ku dzuneka eka Yehovha, naswona swi nga endla vanhu leswaku va tsakela rungula ra Mfumo.