Leti Humaka Eka Vahlayi
Vantshwa Va Vutisa . . . Ndzi Nga Endla Yini Leswaku Ndzi Tsakela Ku Hlaya Bibele? (April 2009) Ndzi tekiwile naswona ndzi manana la nga ni malembe ya 24 naswona a swi ndzi tikela ku hlaya Bibele. Kambe ndzi swi tirhisile swiringanyeto leswi nga eka Xalamuka! leyi naswona ndza swi tirhisa swiringanyeto leswi ku vuriweke leswaku hi swi tsema kutani hi swi hlayisa. Ndzi tshama ndzi swi langutele hi mahlo-ngati ku hlaya Bibele. Ndza yi vona ndlela leyi tibuku ta Bibele ti pfumelelanaka ha yona. A ndzi si tshama ndzi swi tsakela hi ndlela leyi ku hlaya Bibele. Ndza nkhensa swinene!
K. T. wa le United States
Buku Leyi U Nga Yi Tshembaka—Xiyenge 6 (April 2011) Xihloko lexi nge “Mfumo Wa Rhoma eMatin’wini Ya Bibele” xi te: “Ku humelele yini hi muti wa Yerusalema? Mavuthu ya Rhoma ma tlhelerile ma rhangeriwe hi Vespasian ni n’wana wakwe Titus—ma ri ni masocha lama ringanaka 60 000.” Rungula leri ri kombisa leswaku Vespasian na Titus hi vona lava a va rhangele mavuthu lama hlaseleke Yerusalema. Kambe vumbhoni bya matimu byi kombisa leswaku Vespasian a a ri eRhoma hi nkarhi wolowo.
J. O. wa le Australia
Xalamuka! ya hlamula: Buku leyi vuriwaka “Josephus—The Essential Writings,” leyi tsariweke hi Paul L. Maier yi vula leswaku “Titus u hatle a vuya ku suka eAlexandria leswaku a tisa vuthu ra Vukhume-ntlhanu kutani a ya hlangana ni tata wakwe ePtolemais, laha tata wakwe Vespasian a a n’wi yimele kona ni mavuthu ya Vuntlhanu ni ya Vukhume.” Ku engetela kwalaho, “Encyclopedia of the Roman Empire,” leyi tsariweke hi Matthew Bunson, yi vula leswi landzelaka hi Vespasian: “Loko a ri ni n’wana wakwe Titus, u hlasele Vapfukeri lava nga Vayuda naswona a a tiyimisele ku rhendzela tempele ya le Yerusalema hi lembe ra 68 endzhaku ka loko ku vuriwe leswaku Nero u siviwe hi Galba. . . . Eku heleni ka lembe ra 70 u tlhelele eRhoma.” Kutani swi tikomba onge Vespasian na Titus a va ri swin’we loko ku hlaseriwa Yerusalema. Kambe endzhakunyana ka sweswo, Vespasian u tlhelele eRhoma kutani a siya Titus ni mavuthu wolawo.
Xana U Tivekele Tipakani Leti U Nga Ta Ti Fikelela? (February 2011) Loko xihloko lexi xi vulavula hi tipakani leti nga riki tinene xi katse ni “ndhuma, rifuwo, munghana lonene wa vukati kumbe rihanyo lerinene.” Ha yini ku katsiwe ni “munghana lonene wa vukati”? Xana mi vula leswaku ku tivekela pakani ya ku kuma munghana lonene wa vukati a hi swinene?
S. K. wa le United States
Xalamuka! ya hlamula: Xihloko lexi a xi vulanga leswaku ku tivekela pakani yo nghenela vukati a hi swinene. Kambe xi vulavule hi ku lava “munghana lonene wa vukati.” Eka xihloko lexi, rito leri nge munghana “lonene” ri vula munghana wa vukati la hetisekeke naswona a nga riki na swihoxo. Ku lava munghana wo tano wa vukati a swi pfuni nchumu hikwalaho ka swivangelo swimbirhi: Xo sungula, munhu wo tano a nga kona. (Varhoma 3:23) Xa vumbirhi, ku va munhu a lavana ni munghana wo tano wa vukati swi endla leswaku a dzikisa miehleketo yakwe eka leswi a nga ta vuyeriwa ha swona evukatini byebyo, ku ri ni ku va a ehleketa hi leswi a nga ta swi endla leswaku byi humelela. Hambi ku ri van’wana lava cateke, va ringeta ku cinca vanghana va vona va vukati leswaku va va lava hetisekeke. Kambe vukati lebyi humelelaka i bya vatekani lava tsundzukaka leswaku a va hetisekanga naswona va ‘hambetaka va lehiselana mbilu ni ku rivalelana hi ku ntshunxeka.’—Vakolosa 3:13.