Madzolonga Ma Hi Twisa Ku Vava Hinkwerhu

I MANI loyi a nga si tshamaka a vona, a twa kumbe a humeleriwa hi madzolonga? Hi tshamela ku ma vona ni ku twa ha wona emahungwini. Nakambe ha chava leswaku hi nga humeleriwa ha wona eswitarateni ni le ntirhweni naswona vana va langutana na wona exikolweni loko va xanisiwa hi vana lava nga ni rigombo. Hambi ku ri emakaya laha vanhu hi ntolovelo va titwaka va sirhelelekile loko va lotlele tinyangwa ta vona, vanhu va timiliyoni ngopfu-ngopfu vavasati, va titwa va nga sirhelelekanga. Entiyisweni, ematikweni man’wana vavasati lava endlaka 70 wa tiphesente va vika leswaku va tshame va biwa hi vavanuna lava tshamaka na vona kumbe lava a va tshama na vona.

Ematikweni yo tala, vanhu va chava madzolonga lama vangiwaka hi ku pfukeriwa ka mimfumo kumbe ku lwa ka tinxaka hambi ku ri vutherorisi. Sweswo swi vonaka hileswi ematikweni man’wana, ngopfu-ngopfu lama tshameke ma hlaseriwa hi matherorisi, ku nga ni tikhamera to tala leti vekaka vanhu tihlo.

Kutani a swi hlamarisi leswi tikhampani leti endlaka tikhamera teto ti ngo yi nusa kunene mali hambileswi ikhonomi ya misava hinkwayo yi tsekatsekaka. Yi huma eka vamani mali yoleyo? Yi huma eka swibalo ni swikoxo swin’wana leswi hi swi hakelaka. Nakambe nxavo wa tona wu nga ha tlakuka tanihi leswi magoza lama tekiwaka ya vusirheleri ma sungulaka ku andza ni ku durha swinene.

Kambe vuyelo lebyi tsemaka bya madzolonga byi fanele byi hi susumetela ku ehleketa hi mahanyelo ni vupfumeri bya hina. Swihloko leswi landzelaka swi ta hlamula swivutiso leswi: Vuhaxi byi hoxa xandla hi ndlela yihi eka ku andza ka madzolonga? Hi swihi swilo leswi nga kucetelaka langutelo ra hina hi madzolonga? Hi nga tisirhelela njhani eka minkucetelo yo biha?