Xana Vutherorisi Byi Ta Kala Byi Hela?

Loko wa ha ku hlaseriwa hi vutherorisi, u nga ha tivutisa leswi: ‘Xana Xikwembu xa khathala? Hikwalahokayini swilo swo fana ni leswi swi endleka? Xana vutherorisia byi ta kala byi hela? Xana ndzi nga swi kota njhani ku ya emahlweni ndzi hanya hambiloko ndzi chava?’ Bibele yi ni tinhlamulo ta swivutiso, leti tiyisaka nhlana.

Ndlela leyi Xikwembu xi ti twaka hayona hi vutherorisi

Xikwembu xa ma venga madzolonga ni vutherorisi. (Pisalema 11:5; Swivuriso 6:16, 17) Yesu loyi a nga muyimeri wa Xikwembu, u tshinye vaapostola vakwe loko va va ni madzolonga. (Matewu 26:50-52) Nakambe a nga swi amukeli swiendlo swa lava nga ni madzolonga hikwalaho ka vito ra Xikwembu. Kahlekahle hambi ku ri swikhongelo swa vona a nga swi yingisi.—Esaya 1:15.

Xikwembu xa khathala hi vanhu hinkwavo lava xanisekaka, ku katsa ni lava hlaseriweke hi vutherorisi. (Pisalema 31:7; 1 Petro 5:7) Nakambe Bibele yi vula leswaku xi ta teka goza ro herisa madzolonga.—Esaya 60:18.

Leswi endlaka ku va ni vutherorisi

Bibele yi hi byela leswi endlaka ku va ni vutherorisi, yi ri: “Munhu u fuma munhu un’wana ku n’wi endla swo biha.” (Eklesiasta 8:9) Ematin’wini hinkwawo, vanhu lava nga ni vulawuri va fume vanhu van’wana hi voko ra nsimbhi. Sweswo swi endle leswaku lava tshikileriwaka, va ti lwela hi ku tirhisa vutherorisi.—Eklesiasta 7:7.

Ku herisiwa ka vutherorisi

Xikwembu xi tshembisa ku herisa ku chava ni madzolonga hinkwawo naswona xi ta endla leswaku ku va ni ku rhula emisaveni. (Esaya 32:18; Mikiya 4:3, 4) Xi ta:

• Herisa leswi vangaka vutherorisi. Xikwembu xi ta herisa tihulumendhe ta vanhu ivi xi simeka ya xona. Mufumi wa yona ku ta va ku ri Yesu Kreste loyi a nga ta khoma vanhu hinkwavo hi vululami ni ku herisa ku tshikileriwa hinkwako ni madzolonga. (Pisalema 72:2, 14) Hi nkarhi wolowo, a nga kona loyi a nga ta va ni vutherorisi. Vanhu hinkwavo “va ta tsaka swinene hikuva ku ta va ni ku rhula lokukulu.”—Pisalema 37:10, 11.

• Horisa hinkwavo lava khumbekeke hikwalaho ka vutherorisi. Xikwembu xi ta horisa hinkwavo lava twisiweke ku vava hi vutherorisi, ku nga ha va emirini kumbe emiehleketweni. (Esaya 65:17; Nhlavutelo 21:3, 4) Xi tlhela xi tshembisa ku pfuxa lava feke leswaku va ta tiphina hi vutomi emisaveni leyi nga ta va ni ku rhula.—Yohane 5:28, 29.

Bibele yi hi nyika swivangelo leswi twalaka swo tshemba leswaku Xikwembu xi ta teka goza ku nga ri khale. Kambe u nga ha tivutisa, ‘hikwalahokayini Xikwembu xi nga tekanga goza khale ro herisa vutherorisi?’ Leswaku u kuma nhlamulo ya xivutiso lexi, hlalela vhidiyo leyi nge, Hikwalaho Ka Yini Xikwembu Xi Pfumelele Leswaku Ku Va Ni Ku Xaniseka?