Vutherorisi Byi Ta Hela Ku Nga Ri Khale!

EYERUSALEMA ku nga ha tirhisiwa vutherorisi ku hlasela bazi, ku hlasela miako ya mfumo le Doroba–nkulu ra Oklahoma kumbe miako ya le Moscow. Hambileswi matherorisi ma lavaka ku hundzisela rungula ro karhi ra nkoka eka van’wa-tipolitiki, varhangeri va masocha ni lava nga ni vutihlamuleri bya ikhonomi, kambe hakanyingi ku hava vuxaka exikarhi ka leswi va swi lwelaka ni minhlaselo leyi va yi endlaka. Hakanyingi ku hlaseriwa vanhu ntsena—vanhu lava nga taka va nga endli nchumu hi swikoxo swa matherorisi. Kutani, ha yini van’wana va hisekela ku endla vutherorisi?

Ha Yini Ku Ri Ni Vutherorisi?

Vutherorisi i nchumu lowu hleriweke kahle, va tshame ehansi va wu dyela marhambu ya nhloko hi rixaladza lerikulu. Xikongomelo xa vutherorisi a hi ku dlaya kumbe ku vavisa vanhu vo tala. Sweswo swi endleriwa ku fikelela tipakani ta vutherorisi, therorisi ri lava ku chavisa vanhu leswaku ri ta hlula vanhu lava lawulaka kumbe ku endla leswaku va yingisa swikoxo swa rona. Anakanya hi swivangelo swin’wana leswi endleke leswaku matherorisi ma tirhisa madzolonga.

Rivengo. Mukongomisi wa Ndzawulo ya Vulavisisi bya Hulumendhe ya le United States, Louis J. Freeh u te: “Vutherorisi byi nyanyisiwa hi rivengo. Lava va nga ni rivengo ro tano va hanya emisaveni leyi nga ni xihlawu-hlawu, xikhiri naswona yi nga khathariki hi vanhu van’wana.”

Ku tshikileriwa. Stephen Bowman wa tsala ebukwini yakwe leyi nge When the Eagle Screams, u ri: “Entiyisweni, ku ni varhangeri va mintlawa ni matiko man’wana lava tipakani ta vona ku nga ku herisa mindhavuko yin’wana. Kambe swi lo tlangandla leswaku vutherorisi lebyikulu byi vangiwa hi ku heleriwa hi ntshembo.”

Ku pfilunganyeka. Muhleri wa buku leyi nge Urban Terrorism, u ri: “Eswiyin’weni swo tala . . . vutherorisi byi vangiwa hi swiyimo swa tipolitiki, swa ntshamisano ni swa ikhonomi leswi swi vonakaka onge a swi nge cinci.”

Ku pfumaleka ka vululami. “Vutherorisi byi kombisa leswaku ku ni xiphiqo, a hi byona byi vangaka xiphiqo xa kona,” ku vula Michael Shimoff ephepheni ra yena leri nge “The policy of Terrorism.” Wa engetela: “Pakani ya hina ya nkarhi wo leha yi fanele yi va ku herisa swiphiqo swa ntshamisano ni swa tipolitiki leswi vangaka vutherorisi. . . . Loko hi ri karhi hi lwisana ni vutherorisi, hi fanele hi endla matshalatshala lamakulu yo lwela ntshunxeko, xindzhuti, vululami ni ku antswisa timfanelo ta hina. Loko ntsena matshalatshala wolawo ma tirha, hi ta swi kota ku hlula vutherorisi.”

Swivangelo ni matimu ya vutherorisi swi tiyisekise ntiyiso wa marito ya Bibele lama nge: ‘Munhu u fume munhu ku n’wi endla swo biha.’ (Eklesiasta 8:9) Bibele yi profete hi mikhuva leyi nga ha kucetelaka vutherorisi. Yi ri: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, . . . lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa.”—2 Timotiya 3:1-4.

Ntiyiso hi leswaku matshalatshala ya munhu ya ku lwisana ni vutherorisi, ku nga khathariseki leswaku u ma endla hi swikongomelo leswinene ku fika kwihi, a ma nge humeleli. Bibele yi ri: “Ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Kambe, hambileswi munhu a nga taka a nga swi koti ku herisa xiphiqo xa vutherorisi, kambe Xikwembu xi na wona matimba ya ku byi herisa.

Ntlhantlho Wa Kona

Lava va dyeleriweke kumbe lava tshikileriweke ni lava pfilunganyeke va nga kuma nchavelelo exitshembisweni xa Bibele lexi tiyeke lexi nge: “Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”—Swivuriso 2:21, 22.

Xitshembiso lexi xa Xikwembu xi ta hetiseka ku nga ri khale. Mufumi eMfun’weni wa xona, ku nga Hosi Yesu Kreste la fumaka, u ta xi hetisisa. Vuprofeta bya Bibele byi vula leswi malunghana na Kreste: “A nge avanyisi hi ku ya hi leswi a swi vonaka ematihlweni ya yena, kumbe a tshinya hi ku ya hi leswi twiwaka hi tindleve takwe ntsena. Kutani u ta avanyisa swisiwana hi ku tshembeka, naswona u ta tshinya hi vunene ku pfuna lavo rhula emisaveni.”—Esaya 11:3, 4.

Ina, n’wana wa Xikwembu Yesu Kreste, ku nga ri khale u ta herisa ku pfumaleka ka vululami hinkwako swin’we ni hinkwavo lava katsekaka eka byona. Emafambiselweni lamantshwa yo lulama ya Xikwembu, vutherorisi ni madzolonga ku ta va ku ri swilo swa nkarhi lowu hundzeke. Kutani un’wana ni un’wana emisaveni u ta hanya a sirhelelekile, a nge he chavi leswaku u ta vavisiwa.—Nhlavutelo 21:3, 4.

[Xifaniso lexi nga eka tluka 20]

Bibele yi tshembisa leswaku ku nga ri khale Xikwembu xi ta herisa ntshikilelo ni ku pfumala vululami hinkwako