Ta Rivala
Le Riphabliki ra Georgia edzonga-vuxa bya Yuropa, “nhlayo ya ku dlaya vukati yi lava ku ringana leyi phindhiweke kambirhi eka malembe ya khume lama hundzeke.” Vo tala va lava dlayaka vukati va le hansi ka malembe ya 20.—PHEPHA-HUNGU RA FINANCIAL, RA LE GEORGIA.
Le Ireland, vantshwa lava endlaka tiphesente ta 17 lava malembe ya vona ma sukelaka eka 11 ku ya eka 16 “va nyike munhu loyi va nga si tshamaka va n’wi vona, loyi va hlanganeke na yena eka Internet mavito ya vona lama heleleke.” Nakambe vantshwa lava endlaka tiphesente ta khume va nyikele hi “ti-email address, nomboro ya selfoni kumbe swinepe” swa vona.—NHLANGANO WA IRISH SOCIETY FOR THE PREVENTION OF CRUELTY TO CHILDREN.
Mindzilo leyi hisaka makhwati leyi vangiwaka hi swivangelo swa ntumbuluko emisaveni hinkwayo yi endla tiphesente ta kwalomu ka mune ntsena. Kutani minkarhi leyin’wana hinkwayo, mindzilo ya kona yi sunguriwa hi vanhu, hi xihoxo kumbe hi vomu.—XIVANDLA XA MAHUNGU EKA INTERNET XA PRESSEPORTAL, XA LE JARIMANI.
“Muntshwa un’we eka Maamerika ya khume [lama nga ni malembe ya 12 kumbe ku tlula] u vula leswaku u tirhisa swidzidziharisi leswi nga riki enawini nkarhi ni nkarhi, ku katsa ni mbangi, khokheyini, heroyini, swidzidziharisi leswi ku endlaka u vona mijamujamu, swidzidziharisi leswi dzahiwaka hi ku koka nun’hwelo wa swona kumbe maphilisi lama kumiwaka eka dokodela lama nwiwaka leswaku ma dunga nhloko.”—PHEPHA-HUNGU RA USA TODAY, RA LE U.S.A.
Ku Tikhoma Hi Swona Leswi Endlaka Vanhu Va Humelela eVuton’wini
Magazini wa Time wu ri: “Valavisisi va vula leswaku loko vantshwa va tsandzeka ku tikhoma swi nga ha kombisa leswaku va ta va ni swiphiqo swa rihanyo, va ta hola swimalana ni ku va ni rhekhodo ya vugevenga loko se va kurile.” Ku endliwe nkambisiso hi vanhu lava tlulaka gidi ku sukela loko va ha ku velekiwa ku fikela loko va ri ni malembe ya 32. Kutani loko se va kurile, “lava a va ri ni magugu [loko va ha ri vatsongo], va nyangatseka hi ku olova naswona va nga swi tsakeli nikatsongo ku rindza leswaku ku navela ka vona ku enerisiwa kumbe ku rindza nkarhi lowu va nga ta endla nchumu wo karhi ha wona,” va tala ku vika leswaku va hola swimalana, i vatswari lava nga voxe kumbe va endle vugevenga loko se va kurile. Kambe magazini wolowo wu vula leswaku vanhu “va nga dyondza ku tikhoma.” Wu tlhele wu ku: “Tidyondzo ta le xikolweni ni le ndyangwini leti pfunaka vana leswaku va dyondza ku tikhoma loko va ha ri vatsongo, ti nga ha va pfuna leswaku va va vanhu lavakulu lava hanyeke kahle ni lava humelelaka swinene evuton’wini.”
Ku Khawurisiwa Ka Vachayeri Lava Nga Ni Vusopfa
Valawuri va le India va le ku ringeteni ka tindlela letintshwa to xupula vachayeri lava tlulaka milawu ya le magondzweni hi ku va va va tirhisa tanihi maphorisa ya le magondzweni. Xikongomelo xa vona i ku pfuna vachayeri ku twisisa leswi swi vulaka swona ku tlhantlha swiphiqo leswi vona va swi vangaka loko va tlula milawu ya le magondzweni. Kutani sweswi, ematshan’weni yo yimisa vachayeri lava chayelaka hi vusopfa kutani va va tsala thikithi, maphorisa ya le dorobeni ra Gurgaon leri nga en’walungu-vupela-dyambu bya India, ma tlhela ma lerisa vachayeri leswaku va tirha na vona ku kongomisa timovha timinete ta 30 kumbe ku tlula. Vachayeri van’wana va vula leswaku sweswo swi va pfune ku cinca langutelo ra vona. Bharti Arora, mupfuni wa khomixinara wa maphorisa wa kwalaho u te: “Hi tsala vachayeri [mathikithi] ya gidi hikwalaho ko tlula milawu ya magondzo eGurgaon siku ni siku. Kutani hi nga va ni maphorisa lama engetelekeke ya gidi siku ni siku.”