Madzolonga Ya Le Mindyangwini Ma Ta Hela

SWI nga ha ku hlamarisa ku tiva leswaku eka swiendlakalo leswimbirhi ku vulavuriwa hi mpatswa wun’we.

Ku fana ni vanhu vo tala lava vangaka madzolonga emindyangwini, Frank u kota ku tiendla n’wavunene loko a ri exikarhi ka vanhu kumbe loko a ri ni vatswari va nsati wakwe. Kambe loko a ri ni nsati wakwe, u va ni tihanyi swinene.

Vavanuna vo tala vo fana na Frank va kulele emindyangwini leyi nga ni madzolonga kutani loko se va kurile va ehleketa leswaku ku va ni madzolonga a swi bihanga naswona swi tolovelekile. Kambe ku va ni madzolonga emindyangwini a hi nchumu lowu tolovelekeke. Hi yona mhaka leyi vanhu vo tala va chuhaka swinene loko va twa leswaku wanuna u be nsati wakwe.

Hambiswiritano, madzolonga ya le mindyangwini i tshamelo-maxelo. Hi xikombiso, le United States nkambisiso wun’wana wu kume leswaku hi xiringaniso hi siku rin’we tinomboro leti pfuleriweke vanhu lava xanisiwaka emindyangwini etikweni hinkwaro ti beriwe tinqingho leti tlulaka 16 hi minete. Madzolonga ya le mindyangwini i xiphiqo lexi karhataka vanhu emisaveni hinkwayo ku nga khathariseki ndhavuko, xiyimo xa timali ni rixaka ra vona. Tanihi leswi swiendlakalo swo tala swi nga vikiwiki, swi le rivaleni leswaku xiphiqo lexi xi nyanye ngopfu ku tlula ndlela leyi tinhlayo ti swi kombisaka hakona.b

Swiviko swa madzolonga ya le mindyangwini swi tlakusa xivutiso lexi nge: Swi tisa ku yini leswaku wanuna a va ni tihanyi tonghasi eka munhu un’wana, ngopfu-ngopfu eka nsati wakwe? Xana vavanuna lava bukutelaka vasati va vona va nga pfuniwa?

Timbhoni ta Yehovha leti nga vakandziyisi va magazini lowu, ti tshemba leswaku switsundzuxo leswinene leswi nga eBibeleni swi nga pfuna vavanuna lava tekeke kumbe vavasati lava tekiweke leswaku va tshika madzolonga! Xana swa olova ku endla tano? E-e. Xana swa koteka? Ina! Dyondzo ya Bibele yi pfune vanhu vo tala leswaku va tshika madzolonga ivi va hlakulela ku va ni musa ni xichavo. (Vakolosa 3:8-10) Xiya ntokoto wa Troy na Valerie.

Vuxaka bya n’wina a byi ri njhani eku sunguleni?

Valerie: Hi siku leri hi vutaneke ha rona, Troy u ndzi makale hi mpama lerova ndzi pfimbe rhama vhiki hinkwaro. U kombele ndzivalelo hi mbilu hinkwayo naswona u ndzi tshembise leswaku a nge he pfuki a ndzi bile. Emalembeni yo tala lawa hi ma heteke hi tekanile, a a ndzi ba a tlhela a kombela ku rivaleriwa minkarhi yo tala.

Troy: A ndzi hlundzukisiwa hi xin’wana ni xin’wana, ku fana ni loko nsati wa mina a hlwele ku ndzi nyika swakudya. Siku rin’wana ndzi tshame ndzi n’wi ba hi le ndzhaku ka xibamu. Kasi siku rin’wanyana ndzi n’wi be ngopfu lerova ndzi kala ndzi ehleketa leswaku ndzi n’wi dlele. Kutani ndzi ringete ku n’wi chavisa hi ku n’wi byela leswaku ndzi ta dlaya xifanyetana xa hina lexi a ndzi veke mukwana enhan’wini ya xona.

Valerie: A ndzi tshama ndzi chuhile. Minkarhi yin’wana a ndzi baleka endlwini kukondza Troy a vohla. Hambileswi a swi hoxile ku ndzi bukutela, ndzi kume leswaku marito yakwe yo tlhava a ma vava swinene ku tlula ku bukuteriwa.

Troy, xana i khale u ri ni madzolonga?

Troy: Ina, ku sukela evutsongwanini. Ndzi kulele endyangwini lowu a wu ri ni madzolonga. Tatana a a bukutela manana emahlweni ka mina ni tindzisana ta mina. Endzhaku ka loko tatana a fambe a hi siya, manana u sungule ku tshama ni wanuna un’wana naswona na yena a a n’wi ba. U kale a ndzi endla vusodoma a tlhela a pfinya sesi wa mina. U pfaleriwile hikwalaho ka sweswo. Kambe ndza swi xiya leswaku sweswo a hi swona leswi ndzi endlaka ndzi va ni madzolonga.

Valerie, ha yini u nga n’wi tshikanga?

Valerie: A ndzi chava. A ndzi tivutisa ndzi ku, ‘Xana a nge ndzi hloti kutani a ndzi dlaya kumbe a dlaya vatswari va mina? Xana xiyimo a xi nge nyanyi ku biha loko ndzo n’wi mangalela?’

Swilo swi sungule rini ku cinca?

Troy: Nsati wa mina u sungule ku dyondza Bibele ni Timbhoni ta Yehovha. Eku sunguleni a ndzi n’wi vondzoka hikwalaho ka vanghana vakwe lavantshwa naswona a ndzi tibyela leswaku ndzi lava ku n’wi sirhelela eka vukhongeri lebyi a ndzi byi teka byi ri mpambukwa. Kutani ndzi sungule ku va ni tihanyi swinene, ku nga ri eka Valerie ntsena kambe ni le ka Timbhoni. Kambe siku rin’wana Daniel, xifanyetana xa hina xa malembe ya mune lexi nga ni vuvabyi bya switshetshela, xi etlerisiwe exibedlhele mavhiki lama lavaka ku ringana manharhu. Hi nkarhi wolowo, Timbhoni ti hi pfune swinene lerova ti kale ti khathalela Desiree, xinhwanyetana xa hina xa malembe ya tsevu. Endzhaku ka loko Mbhoni yin’wana yi tirhe vusiku hinkwabyo, yi tlhele yi tshama siku hinkwaro na Daniel leswaku Valerie a ta kota ku lata rivambu. Musa wa vanhu lava wu ndzi khumbe swinene hambileswi a ndzi va venga. Eku heteleleni ndzi xiye leswaku va tikhoma ku fana ni Vakreste va ntiyiso, xisweswo ndzi kombele Timbhoni leswaku ti dyondza na mina Bibele. Loko ndzi ri karhi ndzi dyondza na tona Bibele, ndzi dyondze ndlela leyi wanuna a faneleke a khoma nsati wakwe ha yona ni leswi a nga fanelangiki a swi endla eka yena. Ndzi nambe ndzi tshika madzolonga ni tihanyi. Eku heteleleni, ndzi ve Mbhoni ya Yehovha.

Hi yihi milawu ya Bibele leyi ku pfuneke ku cinca mahanyelo ya wena?

Troy: Yi tele ngopfu. Hi xikombiso, 1 Petro 3:7, yi vula leswaku ndzi fanele ndzi “xixima” nsati wa mina. Vagalatiya 5:23 yi khutaza ku hlakulela “ku olova” ni “ku tikhoma.” Vaefesa 4:31 yi sola “mavulavulelo ya nhlambha.” Vaheveru 4:13 yi vula leswaku ‘swilo hinkwaswo swi paluxekile erivaleni’ eka Xikwembu. Hikwalaho, Xikwembu xa ma vona mahanyelo ya mina hambiloko vaakelani va mina va nga ma voni. Ndzi tlhele ndzi dyondza leswaku ndzi fanele ndzi tshika vanghana va mina hikuva “vunakulobye byo biha byi onha mikhuva leyi pfunaka.” (1 Vakorinto 15:33) Phela vanghana va mina va khale a va ndzi khutaza leswaku ndzi va ni madzolonga. A va vula leswaku swi lulamile ku ba wansati leswaku u n’wi vuyisa endleleni.

Mi titwa njhani hi vukati bya n’wina sweswi?

Valerie: Troy se u ni malembe ya 25 a ri Mbhoni ya Yehovha. Hi mpfhuka a ve Mbhoni, u ndzi komba rirhandzu ra xiviri, musa naswona wa ndzi anakanyela.

Troy: A ndzi nge ma cinci maxangu lawa ndzi ma vangeleke ndyangu wa mina naswona ndlela leyi ndzi n’wi khomeke ha yona nkatanga a yi nga n’wi faneli. Kambe ndzi ku langutele hi mahlo-ngati ku hetiseka ka Esaya 65:17, loko maxangu hinkwayo lawa ndzi va vangeleke wona va nga ta ka va nga ha ma tsundzuki.

Hi swihi switsundzuxo leswi mi nga swi nyikaka vatekani lava nga ni xiphiqo xa madzolonga emindyangwini ya vona?

Troy: Loko u ba kumbe u khahla swirho swa ndyangu wa wena, pfumela leswaku u lava mpfuno naswona tikarhatele ku wu kuma. Wu tele mpfuno lowu u nga wu kumaka. Ku dyondza Bibele ni Timbhoni ta Yehovha ni ku hlanganyela na tona swi ndzi pfunile leswaku ndzi tsuvula madzolonga lawa se a ma dzime timitsu embilwini ya mina.

Valerie: U nga hatliseli ku ringanisa xiyimo xa wena ni xa van’wana kumbe ku yingisa xitsundzuxo xa vanhu lava ehleketaka leswaku va tiva leswi nga ku vuyerisaka. Hambileswi ku nga riki vanhu hinkwavo lava nga kumaka vuyelo byo fana ni bya mina, ndza tsaka leswi ndzi nga byi dlayangiki vukati hikuva sweswi swilo swi hi fambela kahle.

KU HERISA MADZOLONGA YA LE MINDYANGWINI

Bibele yi ri: “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo.” (2 Timotiya 3:16) Ku fana na Troy, loyi ku vulavuriweke ha yena laha henhla, vatekani vo tala va tirhise ndzayo ya Bibele naswona va kote ku cinca mahanyelo ya vona.

Xana u nga swi tsakela ku dyondza leswi engetelekeke malunghana ni ndlela leyi Bibele yi nga ku pfunaka ha yona evukatini bya wena? Leswaku u kuma rungula leri engetelekeke, tihlanganise ni Timbhoni ta Yehovha ta le ndhawini ya ka n’wina kumbe u nghena eka www.jw.org/ts.