Vungoma

Xana swi hoxile ku ringeta ku vulavula ni vanhu lava feke?

“U nga tshuki u hundzukela evangomeni . . . leswaku u va la nga tengangiki hi vona.”—Levhitika 19:31.

LESWI VANHU VA SWI VULAKA

Swa twisiseka leswi vanhu va lavaka ku tiyisekisiwa leswaku murhandziwa wa vona la feke a nga le ku xanisekeni. Hikwalaho va ri: “Ha yini hi nga ringeti ku tihlanganisa na yena hi ku tirhisa mungoma kumbe munhu la kotaka ku vona vumundzuku? Kumbexana vanhu volavo va nga hi pfuna ku amukela xiyimo xolexo ni ku endla hi va ni ku rhula ka mianakanyo.”

LESWI BIBELE YI SWI VULAKA

Leswi Bibele yi swi vulaka malunghana ni ku va lava hanyaka va ringeta ku tihlanganisa ni vafi swi le rivaleni, ku nga mukhuva lowu a wu tolovelekile eminkarhini ya khale. Hi xikombiso, Nawu wa Yehovha Xikwembu lowu a wu nyikeke tiko ra Israyele a wu ku: “Ku nga tshuki ku kumiwa eka wena munhu un’wana ni un’wana . . . la vutisaka mungoma kumbe . . . la vutisisaka lava feke. Hikuva vanhu hinkwavo lava endlaka swilo leswi i nchumu lowu nyenyetsaka eka Yehovha.” (Deteronoma 18:10-12) Nakambe Bibele yi vula leswaku vanhu lava tirhisaka vungoma hambi byi ri bya muxaka wihi “a va nge dyi ndzhaka ya mfumo wa Xikwembu.”—Vagalatiya 5:19-21.

Xana vafi va nga pfuna vanhu lava hanyaka?

“Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.”—Eklesiasta 9:5.

LESWI VANHU VA SWI VULAKA

Vo tala va vula leswaku lava feke va hambeta va hanya va ri hi xivumbeko xin’wana. Hikwalaho va nga ha ringeta ku vulavula na vona, kumbexana leswaku va ta kuma rungula ro karhi kumbe leswaku va rhulisa vafi va ri ni ntshembo wa leswaku va nge va karhati lava hanyaka.

LESWI BIBELE YI SWI VULAKA

“Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo . . . Rirhandzu ra vona, rivengo ra vona ni mavondzo ya vona [ku nga ndlela leyi a va titwa ha yona loko va ha hanya] se swi herile.” (Eklesiasta 9:5, 6) Bibele yi dyondzisa leswaku vafi va file! A va nge swi koti ku ehleketa, ku endla swo karhi hambi ku ri ku gandzela Xikwembu. Pisalema 115:17 yi ri: “Lava feke a va [xi] dzunisi [Xikwembu], hambi ku ri mani na mani la rhelelaka eku miyeleni.”

Xana leswi vangoma va swi vulaka minkarhi yin’wana a hi ntiyiso?

“Xana swi fanerile ku kombelela vanhu lava hanyaka eka vanhu lava feke?”—Esaya 8:19.

LESWI VANHU VA SWI VULAKA

Van’wana va vula leswaku vangoma va kota ku hlamusela rungula leri tiviwaka hi vafi ni maxaka ya vona kumbe vanghana va vona ntsena.

LESWI BIBELE YI SWI VULAKA

Ndzima 28 ya buku ya Samuwele wo Sungula yi hlamusela ndlela leyi hosi leyi nga tshembekiki leyi vuriwaka Sawulo, yi xi tluleke ha yona xileriso xa Xikwembu xa ku nga vutisi vangoma. Yi ye eka mungoma, wansati loyi a swi tikomba onge a a vulavula ni munhu wa Xikwembu la feke la vuriwaka Samuwele! Kambe, xana a a vulavula na Samuwele hakunene? Doo! Entiyisweni, a a vulavula ni mukanganyisi—loyi a a tiendla Samuwele la feke.

Mukanganyisi yoloye a ku ri moya wo homboloka, muyimeri wa “tata wa mavunwa”—Sathana. (Yohane 8:44) Ha yini mimoya yo homboloka kumbe madimona swi hlohlotela langutelo ra leswaku vafi va hambeta va hanya? Xikongomelo xa yona i ku onha vito ra Xikwembu ni ku thyakisa Rito ra xona leri tsariweke, ku nga Bibele.—2 Timotiya 3:16.

Xana mhaka leyi hi buleke ha yona yi kombisa leswaku vafi a va na ntshembo? Nikatsongo! Bibele yi tshembisa leswaku vanhu lava nga ‘etlela’ emasirheni, hi ndlela yo fanekisela, va ta pfuxiwa enkarhini lowu taka.a (Yohane 11:11-13; Mintirho 24:15) Sweswi ha tiyiseka leswaku varhandziwa va hina lava feke a va le ku xanisekeni.