Nomu Wa Ngwenya

NGWENYA yi luma swinene ku tlula swiharhi leswi nga kona. Hi xikombiso, ngwenya leyi kumekaka ematini lama nga ni munyu ya le kusuhi na Australia, yi luma ngopfu ku tlula nghala kumbe yingwe. Kambe nomu wa ngwenya wu ni switwi leswi hlamarisaka leswi tlulaka ni leswi nga kona eka tintiho ta munhu. Xana swi kotekisa ku yini tanihi leswi yi nga ni dzovo ro tsindziyela swinene?

Nomu wa ngwenya wu ni switwi swa magidi. Endzhaku ko swi kambisisa, mulavisisi Duncan Leitch u te: “Nsiha ha un’we wu huma eka ximbovana lexi nga eka xipalapala xa ngwenya.” Leswi swi endla leswaku misiha leyi nga kona enon’wini yi sirheleleka, hi nkarhi lowu fanaka switwi leswi swi twa ngopfu lerova a ku na muchini lowu nga kotaka ku swi pima. Hikwalaho ka switwi leswi, ngwenya yi kota ku hambanisa swakudya ni leswi nga riki swakudya enon’wini wa yona. Yi tlhela yi kota ku rhwala swingwenyana hi nomu yi nga swi lumi. Nomu lowu wa hlamarisa hikuva wu ni matimba kambe wu tlhela wu va ni switwi leswi twaka swinene.

U anakanya yini? Xana nomu wa ngwenya wu lo endliwa kumbe wu lo tiendlekela?