Ku Vula Marito Hi Ndlela Leyi Twalaka

LESWAKU u twisisiwa kahle, u fanele u humesa marito khwatsi. Leswi u lavaka ku swi vula swi nga ha va swi tsakisa naswona swi ri swa nkoka, kambe swo tala a swi nge twali loko marito ya wena ma nga twisiseki hi ku olova.

Vanhu a va susumetiwi loko marito ma nga twisiseki kahle. Hambiloko munhu a ri ni rito ra matimba naswona ri twala kahle, loko marito ya yena ma nga phofuriwi khwatsi, a ma nge va susumeti vanhu leswaku va endla leswi a swi vulaka. Swi ta fana niloko a vulavula hi ririmi rimbe, leri nga twisisiwiki hi loyi a yingiseke. (Yer. 5:15) Bibele ya hi tsundzuxa: “Loko mhalamhala yi humesa mpfumawulo lowu nga tivekiki, i mani loyi a nga ta lunghekela nyimpi? Hi ndlela leyi fanaka, handle ka loko n’wina hi ririmi mi humesa mhaka leyi twisisiwaka hi ku olova, xana leswi vuriwaka swi ta tivisiwa ku yini? Entiyisweni leswi mi swi vulaka swi ta va swi famba ni moya.”—1 Kor. 14:8, 9.

I Yini Lexi Endlaka Marito Ma Nga Twali Kahle? Ku nga ha va ku ri ku tsandzeka ku pfula nomu khwatsi. Tinhlaya leti nga pfulekiki kahle ni milomu leyi nga tlangatlangiki, swi nga ha vanga ku mitiwa ka marito.

Ku vulavula hi ku hatlisa na swona swi nga ha endla leswaku marito ma nga twisisiwi kahle. Sweswo swi nga ha fana ni ku tlangisa thepi ya marito lama rhekhodiweke, hi rivilo lerikulu. Marito ma rhekhodiwile, kambe a ma twali leswaku ma ri yini.

Minkarhi yin’wana, leswi endlaka leswaku marito ma nga twali swi nga ha va swi vangiwa hi vugono byo karhi enon’wini. Hambi ku ri lava va bohekaka ku langutana ni xiphiqo xexo, va nga antswisa xiyimo xa vona hi ku tirhisa swiringanyeto leswi nga edyondzweni leyi.

Hambiswiritano, minkarhi yo tala mavulavulelo lama nga twaliki kahle ma vangiwa hi ku mita marito—ku ma pfanganisa hi ndlela leyi tikaka ku ma twisisa. Xiphiqo lexi xi nga ha katsa ku siya mapeletwana kumbe maletere ya nkoka kumbe ku tsema marito. Loko munhu a pfuva-pfuva marito, vayingiseri vakwe va ngo twa swiga swo karhi ntsena kambe swin’wana va boheka ku swi mbambela kunene. Ku tsandzeka ku vitana marito hi ndlela leyi twisisekaka, swi nga endla leswaku ndlela leyi munhu a dyondzisaka ha yona yi nga humeleli.

Ndlela Yo Vulavula Khwatsi. Xin’wana lexi pfunaka ngopfu leswaku u kota ku vula marito khwatsi i ku twisisa mavekelo ya marito hi ririmi ra wena. Hi tindzimi to tala, marito ma hlanganisiwa hi mapeletwana. Mapeletwana ma vumbiwa hi letere rin’we kumbe ku tlula, lama vitaniwaka xikan’we. Eka tindzimi to tano, peletwana rin’wana ni rin’wana ra vuriwa loko munhu a vulavula, hambileswi rin’wana ni rin’wana ri kandziyisiwaka hi ndlela ya rona. Loko u lava ku antswisa mavulavulelo ya wena, ma va lama twalaka kahle, u nga hatlisi loko u vulavula naswona lwela ku vitana peletwana rin’wana ni rin’wana. Loko wa ha sungula swi nga ha twala swi tshunanyana, kambe loko u ri karhi u titoloveta, u ta ya u swi kota ku vulavula hi ndlela yo hlantsweka. Leswaku mhaka yi khuluka, a swi kanakanisi leswaku marito man’wana u ta ma vula hi ku hatlisa, kambe sweswo swi fanele swi papalatiwa loko swi ta tshuka swi endle leswaku mongo wa marito wu nga twali.

Xitsundzuxo: Leswaku u kota ku vitana marito kahle, u nga ha titoloveta ku vulavula ni ku hlaya hi ku vitana mapeletwana hinkwawo hi ku nonoka. Kambe u nga pfumeleli sweswo swi va ndlela ya wena yo vulavula. Swi ta twala swi tshuna swi tlhela swi phyama.

Loko marito lawa u ma vulaka ma twala ma nga humi kahle, titolovete ku tlakusanyana nhloko loko u vulavula, naswona u nga tshiki xilepfu xi khumba xifuva. Loko u hlaya Bibele, yi vekele ehenhlanyana leswaku loko u susa mahlo eka vayingiseri u languta Bibele, yi nga vi ehansi ngopfu. Sweswo swi ta endla leswaku marito ya wena ma huma kahle, ma nga kavanyetiwi.

Ku dyondza ku lawula ripfalo na swona swi nga antswisa mavulavulelo ya wena. Swi tiviwa khwatsi leswaku loko misiha ya tinhlaya kumbe misiha leyi lawulaka ku hefemula ka wena, yi nga ntshunxekanga, swi nga endla leswaku mavulavulelo ya wena ma nga twali swona. Loko misiha yoleyo yi nga ntshunxekanga, ntirhisano lowu faneleke wu va kona exikarhi ka mianakanyo ya wena, swirho swo humesa rito ni swo lawula ku hefemula, wa kavanyeteka—ku nga fambiselo leri a ri fanele ri endleka hi ku olova, hi ndlela ya ntumbuluko.

Misiha ya tinhlaya yi fanele yi ntshunxeka leswaku yi kota ku landzela leswi byongo byi lavaka swi endliwa. Milomu na yona yi fanele yi ntshunxeka. Yi fanele yi lunghekela ku kokeka ni ku tlhelela endzhaku leswaku mimpfumawulo yo tala leyi humaka enon’wini ni le nkolweni yi kota ku huma khwatsi. Loko tinhlaya ni milomu swi nga ntshunxekanga, nomu a wu nge pfuleki kahle, naswona mpfumawulo wu ta huma emenweni. Sweswo swi ta vanga leswaku rito ra wena ri va ni mahlehleleti, marito ya wena ma ta mitiwa naswona ma nga twali. Hambiswiritano, ku endla leswaku tinhlaya ni milomu swi ntshunxeka a swi vuli swona leswaku u vulavula hi ku nonoka. Mhaka leyi yi fanele yi fambisana ni ku vula marito hi ndlela leyi twalaka.

Ku hlayela ehenhla ku ta ku pfuna loko u ri karhi u kambisisa xiyimo xa wena. Xiyisisa ndlela leyi u swi tirhisaka ha yona swirho swo vulavula ha swona. Xana u wu pfula kahle nomu loko u vulavula leswaku marito ma huma kahle handle ko kavanyeteka? U nga tshuki u rivala leswaku ririmi a hi rona ntsena leri tirhisiwaka eku vulavuleni, hambileswi ku nga rona leri tirhaka ngopfu. Nhamu, tinhlaya ta le hansi, milomu, misiha ya xikandza ni ya nkolo, hinkwaswo swi hoxa xandla. Loko u vulavula, xana swa endleka leswaku xikandza xa wena xi nga tshukatshuki? Loko swi ri tano, swi fanele swi tika ku twisisa leswi u swi vulaka.

Loko u ri ni thepi yo rhekhoda, tirhekhode u ri karhi u vulavula hilaha u toloveleke ku vulavula hakona, loko u vulavula ni munhu evutirhelini bya nsimu. Rhekhoda timinete to hlayanyana ta bulo ro karhi. Ku yingisa marito wolawo u ma rhekhodeke swi nga ku pfuna ku kuma xiphiqo lexi u nga ha vaka u ri na xona loko u vula marito yo karhi. Hi xikombiso xiyisisa laha u tsemaka kona marito, laha u ma mitaka kumbe u ma pfanganisaka kona, kutani u ringeta ku kuma leswaku swi vangiwa hi yini. Hakanyingi xiphiqo lexi xi nga lunghisiwa hi ku tirhisa tinhla leti ku buriweke ha tona laha henhla.

Xana wa tsandzeka ku vulavula kahle? Ringeta ku pfula nomu ku tlula ndlela leyi a wu tolovele ku wu pfula ha yona eku sunguleni, naswona u ringeta ku vitana marito hi vukheta lebyikulu. Koka moya khwatsi naswona u nga vulavuli hi ku hatlisa. Ku endla sweswo swi pfune vo tala lava nga ni xiphiqo emhakeni yo vulavula, leswaku va vulavula hi ndlela leyi twalaka. Loko u ri munhu la karhatiwaka hi ku vitana maletere s na z, susa ririmi ekusuhi ni meno loko u vitana marito lama nga ni maletere lawa. Hambiloko xiphiqo xa wena xi nga tlhantlheki hinkwaxo, u nga heli matimba. Tsundzuka leswaku Yehovha u hlawule Muxe, wanuna loyi kumbexana a a nghanghamela, leswaku a twarisa rungula ra nkoka eka vanhu va Israyele ni le ka Faro wa Egipta. (Eks. 4:10-12) Loko u swi tsakela, na wena u ta ku tirhisa naswona u ta ku katekisa evutirhelini bya wena, u kota ku humelela.