Ku kandziyisiwe tibuku ta timiliyoni ta xibukwana lexi nge Titolovete Ku Hlaya Ni Ku Tsala, hi tindzimi to tlula 100

Dyondzo Ya Bibele Yi Pfuna Ku Dyondza Ku Hlaya Ni Ku Tsala

“Ku hlaya ni ku tsala i mfanelo ya munhu un’wana ni un’wana, i nchumu lowu endlaka leswaku munhu a titshemba ni ku n’wi pfuna ku vulavurisana ni vanhu ni ku endla leswaku vanhu va hluvuka.”—UNESCO.a

SWIVIKO swin’wana swi kombisa leswaku vanhu lava tlulaka 700 wa timiliyoni emisaveni hinkwayo lava nga ni malembe ya 15 ku ya ehenhla, a va koti ku tsala ni ku hlaya. Sweswo swi endla leswaku va nga swi koti ku tiva leswi humelelaka emisaveni, ku katsa ni mahanyelo lamanene ni tidyondzo leti ‘tsaleriweke ku letela hina’ eBibeleni. (Varhoma 15:4) Ematikweni yo tala, Timbhoni ta Yehovha ti dyondzisa vanhu mahala ku hlaya ni ku tsala loko ti ri karhi ti va dyondzisa Bibele. Xana dyondzo leyi ya pfuna?

Xiya ntirho lowu Timbhoni ti wu endlaka eMexico tiko leri ku vulavuriwaka Xipaniya. Ku sukela hi 1946 Timbhoni ta Yehovha ti dyondzise vanhu vo tlula 152 000 ku tsala ni ku hlaya, endzhaku ka nkarhi vo tala va lava dyondzisiweke va ve vadyondzisi. Mfumo wu tsalele Timbhoni mapapila wu ti khensa hileswi wu xiximaka ntirho lowu ti wu endlaka. Papila rin’wana ri te: “Huvo ya Dyondzo yi tlangela swinene ntirho wa n’wina naswona ya mi bumabumela hi ntirhisano wa n’wina eku hluvukiseni ka Dyondzo ya Vanhu Lavakulu.”

Vanhu lavakulu ni lavatsongo va pfuneke ngopfu eka dyondzo leyi. Hi xikombiso, Josefina a a ri ni malembe ya 101 loko a tsarisa eka dyondzo leyi, u yi pase endzhaku ka malembe mambirhi.

Hambileswi Xipaniya ku nga ririmi leri tirhisiwaka ngopfu eMexico, a hi rona ntsena ririmi leri ri dyondziwaka. Hi 2013, mintlawa ya nhungu yo hambanahambana yi dyondze ku hlaya ni ku tsala hi ririmi ra ka vona.

Ku tiva ku hlaya ni ku tsala i swa nkoka, swi endla leswaku munhu a kota ku dyondza. Kambe xa nkoka, swi endla leswaku vanhu va mixaka hinkwayo va kota ku hlaya Bibele—ku nga buku leyi huhuteriweke leyi ntshunxaka vanhu evuhlongeni bya vukholwa hava, vukhongeri bya mavunwa ni ku va ni tihanyi.—Yohane 8:32.

a Vandla ra Nhlangano wa Matiko ra Dyondzo, Sayense ni Ndhavuko [United Nations Educational, Scientific, and Cultural Organization (UNESCO)].

U HLAMARISE VA NDYANGU WA KA VONA

Daniel u dyondze Ririmi ra Mavoko ra le Mexico hi ku pfuniwa hi ti-DVD

Daniel u fe tindleve naswona a nga swi koti ku vulavula kahle. Sweswo swi endla leswaku a tshama a hlundzukile ni ku holovisa va ndyangu wa ka vona. Loko Daniel a ri ni malembe ya kwalomu ka 23, Mbhoni leyi vuriwaka Josué yi sungule ku dyondza Bibele na yena hi ku kombetela ni ku dirowa. Daniel u tlhele a dyondza Ririmi ra Mavoko ra le Mexico hi ku pfuniwa hi ti-DVD.b

Loko Daniel a ri karhi a twisisa leswi a a swi dyondza, u sungule ku va ni leswi Bibele yi swi vulaka “vumunhu lebyintshwa” lebyi kombisiwaka hi timfanelo to tanihi “tintswalo, musa, [ku] titsongahata, ku rhula, ni ku va ni mbilu yo leha.” (Vakolosa 3:10, 12) Daniel u tlhele a xi tekela enhlokweni xikhutazo xa le Bibeleni xa ku yingisa vatswari vakwe ni ku va xixima. (Vaefesa 6:1, 2) Ndyangu wa ka vona wu hlamarisiwe hi ku vona ku cinca kakwe. Mana wa Daniel u khense Josué a ri karhi a khavaxela mihloti, hileswi a dyondziseke n’wana wakwe Bibele. Hi 2007 Daniel u khuvuriwile a va Mbhoni ya Yehovha.

b EMexico ku ni minkandziyiso ya 46 ya Timbhoni ta Yehovha leyi kumekaka eka DVD hi Ririmi ra Mavoko ra le Mexico. Website ya hina ya jw.org yi ni rungula hi tindzimi ta mavoko ta kwalomu ka 80. Nakambe tibuku ta kumeka hi Braille leswaku ku pfuniwa vanhu lava nga voniki.