Minongonoko Ya Dyondzo

Timbhoni ta Yehovha ti tiviwa emisaveni hinkwayo hikwalaho ka ntirho wa tona wo dyondzisa hi Bibele.

HIKWALAHO ka leswi ti langutaka ntirho wo dyondzisa hi Bibele wu ri wa nkoka swinene, van’wana va nga ha ehleketa leswaku a ti na mhaka ni dyondzo ya tiko. Kambe sweswo a swi tano. Leswaku a kota ku dyondzisa van’wana, mudyondzisi u fanele ku rhanga a dyondza, naswona leswi swi lava vuleteri ni ku dyondza loku faneleke. Kutani ku engetela eku tirhiseni ka dyondzo ya le xikolweni hi ndlela leyinene, Timbhoni ta Yehovha ti ni malembe yo tala ti ri karhi ti dyondzisiwa hi minongonoko yo hambana-hambana ya dyondzo ni swikolo leswi fambisiwaka hi Sosayiti ya Watch Tower. Yona yi pfune Timbhoni ni van’wana leswaku va antswisa xiyimo xa vona xa mianakanyo, xa mahanyelo ni xa moya.

Hi xikombiso, ematikweni yo tala Timbhoni ti langutane ni ntlhontlho wo hlawuleka—ndlela yo dyondzisa vanhu lava nga wu kumangiki nkarhi wo nghena xikolo hi laha ku faneleke kutani hikwalaho ka sweswo a va swi koti ku hlaya kumbe ku tsala. Leswaku yi hlangavetana ni xilaveko lexi, Sosayiti ya Watch Tower yi hlele minongonoko yo dyondzisa.

Hi xikombiso, eNigeria Timbhoni ta Yehovha ti fambise titlilasi to dyondzisa ku sukela hi 1949. Hi 1961, magidi ya vanhu va le Nigeria ma dyondze ku hlaya, naswona tinhlayo leti nga kona ti kombisa leswaku exikarhi ka 1962 na 1994, ntsengo wa vanhu van’wana lava kuleke va 25 599 va dyondzisiwe ku hlaya ni ku tsala eka titlilasi leti. Nkambisiso wa sweswinyana wu kombise leswaku ku tlula 90 wa tiphesente ta Timbhoni ta Yehovha eNigeria ti dyondzekile, loko ti ringanisiwa ni mpimo lowu nge hansi ka 50 wa tiphesente wa vaaka-tiko. EMexico, Sosayiti ya Watch Tower yi fambise titlilasi to dyondzisa ku sukela hi 1946. Hi 1994, vanhu vo tlula 6 500 va dyondzisiwe ku hlaya ni ku tsala. Exikarhi ka 1946 na 1994, vanhu vo tlula 127 000 va dyondzisiwile. Titlilasi ta dyondzo ti hleriwile ni le matikweni man’wana yo tala, tanihi le Bolivia, Cameroon, Honduras ni le Zambia.

Minongonoko yo tano ya dyondzo hakanyingi yi bumabumeriwile hi vakongomisi va dyondzo ematikweni lawa yi endliweke eka wona. Hi xikombiso, eMexico, mutirhela-mfumo u tsarile: “Ndzi nkhensa ntirhisano wa n’wina, naswona tanihi muyimeri wa hulumendhe ndzi hundzisela ku tlangela lokukulu ka yona hikwalaho ka ntirho wa n’wina wo saseka lowu yaka emahlweni leswaku mi pfuna vanhu hi ku tisa ku vonakala ka vutivi eka lava nga dyondzangiki. . . . Ndzi mi navelela mikateko entirhweni wa n’wina wo dyondzisa.”

Xikolo Xa Vutirheli Bya Le Tilweni

Hikwalaho ka leswi ti wu tekaka wu ri wa nkoka swinene ntirho wa tona wo dyondzisa hi Bibele, Timbhoni ta Yehovha ti lwela ku antswisa vuswikoti bya tona byo hlamusela tidyondzo ta Bibele eka van’wana. Leswaku ku nyikeriwa mpfuno lowu, eka rin’wana ni rin’wana ra mavandlha ya 75 000 emisaveni hinkwayo ku khomiwa nhlangano lowu vitaniwaka Xikolo xa Vutirheli bya le Tilweni, vhiki na vhiki. Hinkwavo lava tsariseke, ku nga khathariseki leswaku i Timbhoni kumbe a hi tona, va siyerisana hi ku nyikela nkulumo yo koma ya mhaka leyi hlawuriweke, emahlweni ka vayingiseri. Ku nga khathariseki malembe ya swona, swichudeni swi kuma ndzayo eka muleteri leswaku swi kuma vutshila bya ku hlaya ni ku vulavula erivaleni. Hambi ku ri lavatsongo, loko se va kota ku hlaya, va swi kota ku tsarisa ivi va leteriwa hi ndlela leyi, leyi va pfunaka ni le ka swilo swin’wana, swin’we ni le xikolweni. Vadyondzisi vo tala va vule leswaku swichudeni leswi nga Timbhoni hakanyingi swi kota ku vulavula kahle.

Ku engetela kwalaho, vandlha rin’wana ni rin’wana ra Timbhoni ta Yehovha ri khutaziwa leswaku eHolweni ya rona ya Mfumo kumbe laha ri hlanganaka kona, ri va ni layiburari leyi nga ni tibuku leti sekeriweke eBibeleni, swihlamusela-marito ni tibuku tin’wana. Layiburari leyi yi tirhisiwa hi hinkwavo lava taka eminhlanganweni eHolweni ya Mfumo. Emavandlheni ya vona va khutaziwa swinene leswaku va hlaya, naswona ndyangu wun’wana ni wun’wana na wona wu khutaziwa leswaku wu va ni layiburari ya ndyangu leyi nga ni tibuku to hambana-hambana leti bulaka hi swilaveko swa vana ni vanhu lavakulu.

Swikolo Swin’wana

Sosayiti ya Watch Tower na yona yi na swikolo swo letela varhumiwa va xinuna ni va xisati, swin’we ni swikolo swo letela vavanuna lava nga ni vutihlamuleri bya vutirheli emavandlheni ya ka vona. Swikolo leswi i xikombiso lexi engetelekeke xa leswaku Timbhoni ta Yehovha ti teka dyondzo yi ri ya nkoka swinene.

[Marito lama tshahiweke exihlokweni lama nga eka tluka 13]

Emavandlheni ya vona va khutaziwa swinene leswaku va hlaya, naswona ndyangu wun’wana ni wun’wana na wona wu khutaziwa leswaku wu va ni layiburari ya ndyangu leyi nga ni tibuku to hambana-hambana

[Xifaniso lexi nga eka tluka 12]

Swichudeni eXikolweni xa Vutirheli bya le Tilweni swi kuma vuleteri bya ku hlaya ni ku vulavula erivaleni