Tigere Ta Xitsotswana Lexi Vuriwaka Issus

VUNJHINIYARA bya tigere i nchumu lowu a ku ehleketiwa leswaku wu endliwa ntsena hi vutlhari bya munhu. Kambe ku kumiwe leswaku a swi tano. Ku kumiwe leswaku xitsotswana lexi vuriwaka Issus lexi kumekaka emintangeni ya le Yuropa xi ni tigere.a

Xitsotswana lexi xi kota ku tlula timitara leti ringanana 3,9 hi sekoni. Xi kota ku baleka hi ku tlula kunene, hi ku copeta ka tihlo. Leswaku xitsotswana lexi xi kota ku tlula kahle, xi fanele xi tlakusa milenge ya xona ya le ndzhaku hi nkarhi wun’we. Xana xi swi kotisa ku yini ku endla sweswo?

Xiya: Van’wasayense va kume tigere leti khomaneke laha milenge ya xitsotswana lexi ya le ndzhaku yi sungulaka kona. Loko xitsotswana lexi xi tlula, tigere toleto ti endla leswaku milenge hayimbirhi yi tlula hi nkarhi wun’we. Loko swi nga ri tano, rivilo ra xona a ri nga ta lawuleka.

Loko swihadyana swin’wana swi tlula, swi va swi pfuniwa hi misiha leswaku milenge ya swona yi kota ku fambisana. Kambe loko xitsotswana lexi a xo fana na swona a xi ta nonoka. Hi yona mhaka xi tirhisaka tigere. Mutsari ni mulavisisi Gregory Sutton u ri: “Hi tala ku vona tigere eka nchumu lowu endliweke hi vanhu.” U tlhela a ku, “sweswo swi endliwa hi leswi hi nga lavisisiki hi vukheta.”

U anakanya yini? Xana tigere ta xitsotswana lexi vuriwaka Issus ti lo endliwa kumbe ti lo tiendlekela?