Vana Ni Vutshila Bya Ku Vulavula Ni Van’wana!
1 Leswaku hi hetisisa ntirho wa hina wa ku chumayela ni ku endla vadyondzisiwa, hi fanele hi avela van’wana rungula. (Mat. 24:14; 28:19, 20) Ku vulavurisana ku nga va xiphiqo hambi ku ri exikarhi ka vanghana. I yini lexi nga hi pfunaka ku byela vanhu lava hi nga va tiviki mahungu lamanene?
2 Endla Leswaku N’wini Wa Muti A Ku Vona U Ri Munghana Niloko A Nga Ku Tivi: Anakanyela vanhu lava u vulavulaka na vona ensin’wini. Hikwalaho ka swiyimo swa namuntlha, swa twala leswi van’wana va nga tshembiki vanhu lava nga va tiviki kumbe va va chava. Leswi swi nga tsema bulo. Xana u nga endlisa ku yini leswaku lava u va endzelaka ro sungula va nga titwi va chava? Hambiloko hi nga si vula nchumu, leswi hi langutekisaka xiswona swi vula swo tala. Loko hi ambale kahle hi tlhela hi languteka hi ri ni xindzhuti, sweswo swi nga susa ku chava eka lava hi vulavulaka na vona.—1 Tim. 2:9, 10.
3 Nchumu wun’wana lowu nga hi pfunaka eku vulavuleni ni van’wana i ku ntshunxeka ni ku va ni xinghana. Sweswo swi endla leswaku na vona va ntshunxeka kutani va rhandza ku twa leswi hi va byelaka swona. Ku lunghiselela kahle swa laveka emhakeni leyi. Loko hi swi tiva kahle leswi hi nga ta vula swona, hi vulavula hi ntshunxekile. Kutani ku ntshunxeka koloko ku nga susumetela van’wana leswaku va tsakela rungula ra hina. Wansati un’wana u vule leswi landzelaka malunghana ni Mbhoni leyi n’wi endzeleke: “Leswi ndzi swi tsundzukaka hileswaku ku n’wayitela kakwe a ku kombisa leswaku u ni ku rhula emianakanyweni. Sweswo swi ndzi khumbile.” Leswi swi endle leswaku wansati loyi a yingisela mahungu lamanene.
4 Timfanelo Leti Kokaka Van’wana Rinoko: Hi fanele hi khathala hakunene hi van’wana. (Filp. 2:4) Ndlela yin’wana ya ku endla sweswo i ku papalata ku vulavula ngopfu. Phela ku vulavurisana swi katsa ni ku yingisela. Loko hi kombela vayingiseri va hina leswaku va tiphofula kutani hi yingisela marito ya vona swi suka embilwini, sweswo swi ta endla leswaku va swi vona leswaku ha khathala hi vona. Kutani loko vayingiseri va wena va vulavula, u nga sunguli ku nyunganyungeka hi ku lava ku vula xingheniso lexi wena u lunghiseleleke xona. Va bumabumele loko swi fanerile, kutani u ringeta ku tatisa leswi va swi vulaka. Loko tinhlamuselo ta vona ti paluxa leswaku va karhateka ngopfu hi nchumu wo karhi, endla leswaku xingheniso xa wena xi fambisana ni nchumu wo tano lowu va karhataka.
5 Ku titsongahata ku endla leswaku ku va ni ku vulavurisana lokunene. (Swiv. 11:2; Mint. 20:19) Vanhu a va rhandza Yesu hileswi a a ri ni “moya wo rhula ni mbilu yo titsongahata.” (Mat. 11:29) Hi hala tlhelo, ku tivona swi endla leswaku van’wana va fambela ekule na wena. Hikwalaho, hambileswi hi tiyisekaka swinene leswaku hi le ntiyisweni, hi ringeta ku papalata ku vulavula hi ndlela yo titshemba ngopfu.
6 Ku vuriwa yini loko marito ya munhu loyi hi vulavulaka na yena ma komba leswaku u pfumela tidyondzo leti hambanaka ni leswi Bibele yi dyondzisaka swona? Xana swa boha leswaku hi n’wi lulamisa? Ina, hi fanele hi n’wi lulamisa hi ku famba ka nkarhi, kambe a hi fanelanga hi ringeta ku namba hi n’wi lulamisela kwalaho. Hakanyingi swa antswa ku navisa mhaka leyi hi pfumelelanaka eka yona ni muyingiseri wa hina, hi nga si n’wi byela tidyondzo ta Bibele leti swi nga n’wi nonon’hwelaka ku ti amukela. Sweswo swi lava ku lehisa mbilu ni vuxiyaxiya. Pawulo u veke xikombiso lexinene emhakeni leyi loko a chumayela eka vaavanyisi va le hubyeni ya Areyopago.—Mint. 17:18, 22-31.
7 Ku tlula kwalaho, rirhandzu ro pfumala vutianakanyi ri ta hi pfuna leswaku hi vulavurisana ni van’wana hilaha ku humelelaka. Ku fana na Yesu, hi fanele hi va ni ntwela-vusiwana eka vanhu lava “[vavisiweke] ni ku tsalangana ku fana ni tinyimpfu leti nga riki na murisi.” (Mat. 9:36) Sweswo swi ta hi susumetela ku va byela mahungu lamanene ni ku va pfuna ku nghena egondzweni leri yisaka evuton’wini. Rungula ra hina i ra rirhandzu, kutani a hi hambeteni hi ri haxa hi rirhandzu. Loko hi endla tano, hi ta va hi tekelela Yehovha Xikwembu na Yesu Kreste—Swivulavuri-nkulu evuakweni hinkwabyo.