Loko Munhu Loyi U N’wi Rhandzaka A Vabya

“Loko Tatana a nga si ntshunxiwa exibedlhele, hi kombele dokodela leswaku a hi hlamusela mbuyelo wa swikambelo swa ngati. Dokodela u hi tiyisekisile leswaku hinkwaswo swi tshamisekile kambe u pfumerile ku tlhela a languta mbuyelo. Lexi xi n’wi hlamariseke u kume leswaku mimbuyelo yoleyo yi komba leswaku ku ni xiphiqo. U kombele ku rivaleriwa hi mhaka leyi ivi a vitana dokodela loyi a nga ni ntokoto eka xiphiqo xolexo. Tatana se wa antswa sweswi. Kambe hi tsakile hikwalaho ka leswi hi vutiseke.”—Maribel.

Wansati u pfuna nuna wa yena ku xaxameta swikombiso swa vuvabyi ni mirhi ya kona — Loko mi nga si ya eka dokodela, tsala swikombiso swa ku vabya ni mirhi leyi a yi tirhisaka

Ku ya exibedlhele ni ku etlela kona swi nga vanga ntshikilelo. Hilaha ntokoto wa Maribel wu swi kombisaka hakona, nseketelo wa munghana kumbe xaka wu nga va ni mpfuno swinene kumbe wu ponisa vutomi. Xana u nga n’wi pfuna njhani munhu la vabyaka?

Loko mi nga si ya eka dokodela. Pfuna muvabyi leswaku a tsala swikombiso hinkwaswo swa vuvabyi ni mixaka ya mirhi ni vutshunguri lebyi a byi tirhisaka. Tsalani swivutiso leswi mi nga ta swi vutisa dokodela. Pfuna munhu la vabyaka leswaku a tsundzuka vuxokoxoko hinkwabyo hi vuvabyi bya yena ni loko ku ri ni lava nga na byona ekaya. Mi nga ehleketi leswaku dokodela se u tiva vuxokoxoko hinkwabyo kumbe leswaku u ta vutisa.

Loko dokodela a hlangana ni vatekani, nsati wa kona u tsala rungula ra kona — Yingiserisisa, vutisa u tlhela u tsala leswi dokodela a swi vulaka

Loko mi ri eka dokodela. Tiyiseka leswaku muvabyi wa swi twisisa leswi vuriwaka hi dokodela. Vutisa swivutiso kambe u nga endli onge wa tiva. Nyika muvabyi nkarhi wo vutisa swivutiso ni ku tivulavulela. Yingiserisisa u tlhela u tsala leswi dokodela a swi vulaka. Vutisa hi matshungulelo man’wana lama nga kona. Minkarhi yin’wana swi nga va swinene ku ringanyeta eka muvabyi leswaku a ya vona dokodela un’wana, ku twa leswaku yena u ri yini.

Dokodela u pfuxeta rungula ra kona leri tsariweke loko va ri ehofisini — Kambisisani swiletelo leswi humaka eka dokodela, ni mirhi leyi mi nyikiweke yona

Loko mi vuya eka dokodela. Bulani hi leswi dokodela a swi vuleke. Tiyiseka leswaku muvabyi u kuma mirhi leyi faneleke. N’wi khutaze leswaku a nwa mirhi hi ku ya hi swiletelo swa dokodela ni ku tivisa dokodela loko ku ri ni swi ta ndzhaku. Khutaza muvabyi ni ku n’wi tsundzuxa leswaku a landzelela swiletelo swin’wana swo fana ni ku tlhelela eka dokodela. N’wi pfune leswaku a dyondza leswi engetelekeke hi vuvabyi byakwe.

Loko Mi Ri eXibedlhele

Wansati u etlele emubedweni wa le xibedlhele, muyimeri wa yena u vulavurisana ni dokodela — Tiyiseka leswaku tifomo hinkwato ti tatiwe hi ndlela leyi faneleke

Vana ni xivindzi ni vuxiyaxiya. Muvabyi la yaka exibedlhele a nga ha karhateka ni ku titwa a nga pfuni nchumu. Kambe ku va ni xivindzi ni vuxiyaxiya, swi nga pfuna muvabyi leswaku a nga chuhi ngopfu ni ku nga endli swihoxo. Tiyiseka leswaku tifomo to amukeriwa exibedlhele ti tatiwa hi ndlela leyi faneleke. Xixima timfanelo ta muvabyi to tiendlela swiboho swa matshungulelo. Loko a vabya ngopfu lerova a tsandzeka ku ti endlela swiboho, xixima swiboho leswi tsariweke hi muvabyi swa nkarhi lowu hundzeke ni leswi xaka ra le kusuhi ri swi vulaka.a

Wansati ni muyimeri wa yena va vulavurisana ni loyi a tirhaka exibedlhele — Hi xichavo byela vatirhi va le xibedlhele leswi u swi xiyeke

Teka goza. U nga chavi ku vulavula loko swi fanerile. Ku languteka ka wena loku xiximekaka ni mikhuva leyinene, yi nga endla leswaku vatshunguri va n’wi khathalela kahle muvabyi. Eka swibedlhele swo tala, vavabyi va voniwa hi madokodela yo hambanahambana. U nga ma pfuna hi ku va byela leswi madokodela man’wana ma swi vuleke. Tanihi leswi u tivaka muvabyi, hlamusela ku cinca loku a veke na kona emirini ni le miehleketweni.

Loko wansati a hola, muyimeri wa yena u vulavurisana ni muongori — Pfuneta kambe u nga kavanyeti vatirhi

Vana ni xichavo ni ku nkhensa. Minkarhi yo tala vatirhi va xibedlhele va va eka swiyimo leswi tshikilelaka. Va khome hi ndlela leyi wena a wu ta lava leswaku va ku khoma ha yona. (Matewu 7:12) Xixima ndzetelo, ntokoto, vuswikoti bya vona ni ku va nkhensa hikwalaho ka ku tikarhata ka vona. Loko u va bumabumela swi ta va pfuna leswaku va tirha hi matimba.

Munhu a nga vabya nkarhi wun’wana ni wun’wana, kambe loko u ri ni vuxiyaxiya u tlhela u kuma mpfuno eka van’wana, swi ta endla leswaku u kota ku pfuna munghana kumbe xaka eka xiyimo xo tika.—Swivuriso 17:17.

a Milawu ni maendlelo loko swi ta eka timfanelo ta muvabyi ni vutihlamuleri swa hambana hi ku ya hi tindhawu. Tiyiseka leswaku maphepha hinkwawo lama nga ni leswi muvabyi a swi lavaka hi vutshunguri, ma tatiwile naswona ma hlelekile.