Ndlela Yo Tlhantlha Swiphiqo

NTLHONTLHO

Loko wena na nkataku mi tlhuvutsa xiphiqo xo karhi, xana u tikuma u karihile ku tlula loko ma ha sungula? Loko swi ri tano, u nga swi kota ku antswisa. U fanele u sungula u tiva ku hambana exikarhi ka ndlela leyi vavanuna ni vavasati va vulavulaka ha yona.a

LESWI U FANELEKE U SWI TIVA

Vavasati va tsakela ku vulavula hi xiphiqo va nga si xi tlhantlha. Minkarhi yin’wana loko va vulavula, sweswo swi tlhantlha swiphiqo swa vona.

“Ndzi titwa ndzi ntshunxekile endzhaku ko phofulela nuna wa mina ta le mbilwini ni ku tiva leswaku wa ndzi twisisa. Loko ndzi heta ku vulavula ndzi titwa ndzi phyuphyile.”​—Sirppa.b

“A ndzi swi koti ku rivala xiphiqo xa mina kukondza ndzi phofulela nuna wa mina ndlela leyi ndzi titwaka ha yona. Loko ndzi phofula xiphiqo lexi ndzi karhataka ndza xi rivala.”​—Ae-Jin.

“Swi fana ni ntirho wa vufokisi. Loko ndzi ri karhi ndzi vulavula ndzi ehleketisisa hi leswi vangeke xiphiqo xexo.”​—Lurdes.

Hi ntolovelo vavanuna va lava tindlela to tlhantlha swiphiqo. Swa twisiseka, phela loko wanuna a tlhantlha swiphiqo swi n’wi endla a titwa a ri wa nkoka. Loko wanuna a tlhantlha swiphiqo u va a kombisa nsati wakwe leswaku a nga titshega hi yena. Vavanuna va pfilunganyeka loko ndlela ya vona yo tlhantlha swiphiqo yi nga amukeriwi. Wanuna la vuriwaka Kirk u ri: “A ndzi twisisi leswaku ha yini u fanele u vulavula hi xiphiqo loko u nga lavi ndlela yo xi tlhantlha!”

Buku leyi nge The Seven Principles for Making Marriage Work yi tsundzuxa yi ku: “U fanele u twisisa u nga si nyikela xitsundzuxo, u fanele u endla leswaku nkataku a swi tiva leswaku u xi twisisa hi ku helela xiphiqo u nga si ta ni ndlela yo xi tlhantlha. Minkarhi yo tala munghana wa wena wa vukati u va a nga kombeli leswaku u n’wi tlhantlhela xiphiqo ku ri na sweswo u va a lava leswaku u rhiya ndleve ntsena.”

LESWI U NGA SWI ENDLAKA

Vavanuna: Titolovete ku yingisela hi vukheta u tlhela u ringeta ku twisisa ndlela leyi nsati wa wena a titwaka ha yona. Wanuna la vuriwaka Tomás u ri: “Minkarhi yin’wana endzhaku ko yingisela nsati wa mina ndzi tibyela ndzi ku, ‘Bulo leri a ri pfunanga nchumu.’ Kambe minkarhi yo tala nsati wa mina u va a lava ntsena ku yingiseriwa.” Wanuna loyi a vuriwaka Stephen u pfumelelana na yona mhaka leyi. U ri: “Ndzi vona swi pfuna ku tshika nsati wa mina a tiphofula handle ko va ndzi n’wi kavanyeta naswona minkarhi yo tala loko a heta ku vulavula u ndzi byela leswaku u titwa a phyuphyile.”

Ringeta leswi: Enkarhini lowu taka loko u bula hi xiphiqo ni nsati wa wena, u nga hatliseli ku nyikela xitsundzuxo swi nga fanelanga. N’wi langute u tlhela u yingiserisisa hi vukheta leswi a swi vulaka. Pfumela hi nhloko ku komba leswaku u yingiserile. U nga phindha leswi a swi vuleke ku kombisa leswaku wa n’wi twisisa. Wanuna la vuriwaka Charles u ri: “Minkarhi yin’wana nsati wa mina u lava ku tiva ntsena leswaku ndza n’wi twisisa ni leswaku ndzi yima na yena.”​—Nawu wa Bibele: Yakobo 1:19.

Vavasati: Byela nuna wa wena leswi u lavaka a ku endlela swona. Wansati la vuriwaka Eleni u ri: “Hi nga ha langutela leswaku vanuna va hina va tiva leswi hi swi lavaka, kambe minkarhi yin’wana hi fanele hi tiphofula eka vona.” Wansati la vuriwaka Ynez u ringanyeta leswi: “Ndzi nga ha ku ‘Ku ni lexi ndzi karhataka naswona ndzi tsakela leswaku u ndzi yingisela kahle. A ndzi lavi u lulamisa xiphiqo lexi kambe ndzi lava leswaku u twa leswi ndzi lavaka ku swi vula.’”

Ringeta leswi: Loko nuna wa wena a hatlisela ku hlamula u nga ehleketi leswaku a nga khathali. Hakanyingi u va a ringeta ku pfuna. Wansati la vuriwaka Ester u ri: “Ematshan’weni yo va ndzi nyangatseka, ndzi xiya leswaku nuna wa mina wa khathala naswona wa swi lava ku yingisela kambe u tlhela a lava ku pfuna.”​—Nawu wa Bibele: Varhoma 12:10.

Vavanuna ni vavasati: Hi ntolovelo hi khoma van’wana hi ndlela leyi hi lavaka va hi khoma ha yona. Hambiswiritano, leswaku mi tlhantlha swiphiqo hi ndlela leyi humelelaka, u fanele u anakanya hi ndlela leyi nkataku a lavaka ku khomiwa ha yona. (1 Vakorinto 10:24) Wanuna la vuriwaka Miguel u swi veka hi ndlela leyi: “Loko u ri wanuna u fanele u tiyimisela ku yingisela. Loko u ri wansati lunghekela ku yingisela loko nuna wa wena a ta ni ndlela yo lulamisa swiphiqo. Loko havumbirhi mi tiyimisela ku tsakisana mi ta vuyeriwa.”​—Nawu wa Bibele: 1 Petro 3:8.