3 U Nga Heli Matimba

Ku ni xiga xin’wana lexi dumeke lexi nge, swi teka 21 wa masiku ku va munhu a tolovela mukhuva wo karhi. Vakambisisi va vula leswaku van’wana swi va tekela nkarhi wutsongo kasi hi hala tlhelo van’wana swi va tekela nkarhi wo leha leswaku va cinca. Xana sweswo swi fanele swi ku heta matimba?

Anakanyisisa hi xiyimo lexi: A hi nge u lava ku tolovela mukhuva wo endla vutiolori kanharhu hi vhiki.

• Hi vhiki ro sungula u kota ku fikelela pakani ya wena.

• Hi vhiki ra vumbirhi u endla vutiolori kambirhi ntsena.

• Hi vhiki ra vunharhu u fikelela pakani ya wena nakambe.

• Hi vhiki ra vumune u kote ku endla vutiolori kan’we.

• Hi vhiki ra vuntlhanu u tlhela u kota ku fikelela pakani ya wena naswona ku suka kwalaho u kota ku endla vutiolori vhiki ni vhiki.

Swi ku tekele mavhiki ya ntlhanu ku tolovela mukhuva lowuntshwa. Swi nga ha tikomba ku ri nkarhi wo leha, kambe loko u kote ku wu tolovela wa tsaka hikuva u kote ku tolovela mukhuva lowunene lowuntshwa.

NSINYA WA NAWU WA LE BIBELENI: “Lowo lulama a nga ha wa ka nkombo, kunene u ta pfuka.”​—Swivuriso 24:16.

Bibele yi hi khutaza leswaku hi nga heli matimba. Xa nkoka swinene i vuyelo, ku nga ri leswaku hi tsandzeke kangani.

LESWI U NGA SWI ENDLAKA

• U nga gimeti hi ku vula leswaku loko u tsandzeke kan’we se u mutsandzeki. Loko u ri karhi u lwela ku fikelela pakani ya wena, langutela ku hlangavetana ni swihinga.

• Tsundzuka mikarhi leyi swilo swi ku fambeleke kahle ha yona. Hi xikombiso, loko u ri eku antswiseni ka ndlela leyi u vulavulaka ha yona ni vana va wena, tivutise: ‘Hi rini laha a ndzi twa onge ndzi nga va holovela, kambe ndzi tikhomeke? Ematshan’weni yo va holovela ndzi endle yini? Ndzi nga swi engeta njhani sweswo?’ Swivutiso swo tano swi nga ku pfuna leswaku u dzikisa mianakanyo ya wena eka nkarhi lowu swilo swi ku fambeleke kahle ha wona ematshan’weni yo dzikisa mianakanyo ya wena eka leswi u tsandzekeke eka swona.

Xana u nga swi tsakela ku tiva ndlela leyi misinya ya milawu ya le Bibeleni yi nga ku pfunaka ha yona eka swiyimo swin’wana swa vutomi swo tanihi ku langutana ni ku vilela, ku va ni ndyangu lowu tsakeke ni ku kuma ntsako wa xiviri? Vutisa un’wana wa Timbhoni ta Yehovha, kumbe u nghena eka website ya hina, ya jw.org/ts.