Hi Swihi Swiphiqo Leswi Thekinoloji Yi Nga Swi Vangaka Eka Vanghana Va Wena?

Hambiswiritano, vanhu van’wana lava tirhisaka thekinoloji ngopfu leswaku va tshama va ri ni vanghana va tala ku . . .

• nga vi na ntwelavusiwana eka vanghana va vona.

• titwa va ri ni xivundza ni ku nga pfuni nchumu.

• tiehleketelela ngopfu ku tlula vanghana va vona.

LESWI U FANELEKE U SWI TIVA

NTWELAVUSIWANA

Leswaku hi va ni ntwelavusiwana, hi fanele hi tinyika nkarhi wo ehleketa hi munhu un’wana, ku nga nchumu lowu nga ha vonakaka wu tika ku wu endla loko hi khomeke hi ku hlaya ni ku rhumela marungula ni ku languta swilo leswi nga eka social media.

Hi ku famba ka nkarhi, loko u ri ni marungula yo tala, swi ta ku tikela ku hlamula rungula leri humaka eka munghana. U nga ha vona ma tale ngopfu lerova u lava ku hatla u hlamula marungula ya wena hinkwawo, ku nga khathariseki leswaku i ya nkoka kumbe a hi ya nkoka, ivi u nga swi xiyi leswaku munghana wa wena u lava mpfuno.

MHAKA YO ANAKANYISISA HI YONA: Loko u tirhisa thekinoloji ku vulavurisana ni vanghana va wena, u nga swi kombisa njhani leswaku u va ‘twela vusiwana’?—1 PETRO 3:8.

XIVUNDZA

Valavisisi van’wana va kume leswaku vanhu vo tala va titwa va ri ni xivundza swinene endzhaku ka loko va hete nkarhi wo tala va ri karhi va tirhisa social media. Va gimete hi ku vula leswaku ku languta swifaniso swa swilo leswi vanhu van’wana va swi endlaka swi nga endla munhu loyi a swi languteke a “titwa a tlange hi nkarhi wakwe.”

Ku tlula kwalaho, ku languta swifaniso swo tsakisa leswi vanhu van’wana va swi hoxaka eka social media, swi nga endla munhu a vona onge vutomi bya yena a byi tsakisi. Phela, swi nga ha vonaka onge vanhu van’wana a va ri eku tiphineni, kasi wena vutomi bya wena bya borha.

MHAKA YO ANAKANYISISA HI YONA: Loko u tirhisa social media, u nga swi papalata njhani ku tiringanisa ni van’wana?—VAGALATIYA 6:4.

KU TIEHLEKETELELA NGOPFU

Mudyondzisi un’wana u tsale leswaku swichudeni swin’wana swa yena a swi tiehleketelela ngopfu naswona a swi lava ntsena vanghana lava a va ta swi endlela swo karhi. Munhu a nga ehleketa leswaku vanghana vakwe va fana ni foni leyi faneleke yi n’wi hungasa nkarhi wun’wana ni wun’wana loko a va lava nileswaku a nga va bisa hi moya mikarhi yin’wana.

MHAKA YO ANAKANYISISA HI YONA: Xana leswi u swi hoxaka eka social media swi kombisa leswaku u nga ha va u ri ni moya wo phikizana ni van’wana kumbe u tiehleketelela ngopfu?—VAGALATIYA 5:26.

LESWI U NGA SWI ENDLAKA

KAMBISISA NDLELA LEYI U YI TIRHISAKA HA YONA THEKINOLOJI

Loko thekinoloji u yi tirhisa kahle yi ta ku pfuna leswaku u bula ni vanghana va wena hambi ku ri ku tiyisa vunghana bya n’wina.

Hlawula swiringanyeto leswi u nga lavaka ku swi ringeta kumbe u tsala mavonelo ya wena.

• Ringeta ku vulavula ni vanhu (ku ri ni ku rhumela marungula kumbe tiimeyili ntsena)

• Veka foni ekule (kumbe u yi titivata) loko u vulavula ni van’wana

• Hunguta nkarhi lowu u wu tirhisaka u ri eka social media

• Vana muyingiseri lonene

• Fonela munghana loyi a nga ni swiphiqo