MISAVA LEYI TALEKE HI MAXANGU

1 | Sirhelela Rihanyo Ra Wena

LESWI ENDLAKA SWI VA SWA NKOKA

Makhombo yo karhi lawa ma nga hi welaka ma nga khumba rihanyo ra hina hi tindlela to hambanahambana.

Loko vanhu va weriwa hi makhombo va nga ha tshikileleka swinene naswona sweswo swi nga endla leswaku va vabya.
Nakambe makhombo ma nga endla leswaku swi tika ku kuma vutshunguri lebyi faneleke eswibedlhele.
Ma nga ha tlhela ma endla leswaku van’wana va heleriwa hi mali lerova va nga ha swi koti ku xava swakudya kumbe mirhi ya swa vutshunguri.

Leswi U Faneleke U Swi Tiva

Vuvabyi lebyi nga ni khombo ni ntshikilelo wa miehleketo swi nga ku endla u honisa ku endla swilo leswi nga swa nkoka eka rihanyo ra wena. Leswi swi to nyanyisa mavabyi.
Loko u nga khathaleli rihanyo ra wena, u nga ha nyanya ku vabya naswona vutomi bya wena byi ta va ekhombyeni.
Loko u khathalela rihanyo ra wena swi ta ku pfuna leswaku u teka swiboho swa vutlhari hi nkarhi wa khombo.
Hambiloko u tikeriwa hi tlhelo ra timali, u nga swi kota ku teka magoza lama nga sirhelelaka rihanyo ra wena.

Leswi U Nga Swi Endlaka Sweswi

Munhu wo tlhariha u ehleketisisa hi makhombo lama nga vaka kona kutani a teka magoza ya ku tisirhelela. Leswi swi katsa ni le mhakeni ya rihanyo. Hakanyingi leswaku u kota ku tisirhelela eka mavabyi, u fanele u papalata ku tiveka ekhombyeni ro khomiwa hi mavabyi ni ku tlhela u basisa laha u tshamaka kona. Ku tisirhelela i swa nkoka ku tlula vutshunguri.

“Ku tshama hi basile ni ku basisa kaya ra hina, swa hi pfuna leswaku hi nga tirhisi mali yo tala eka dokodela kumbe loko hi xava mirhi ya swa vutshunguri.”—Andreas.a

a Mavito man’wana ma cinciwile eka magazini lowu.

NDLELA LEYI U NGA SWI ENDLAKA HAYONA—Switsundzuxo Leswi Nga Ku Pfunaka

Hi mikarhi ya khombo, sirhelela rihanyo ra wena hi ku endla leswi landzelaka

TSHAMA U BASILE

Tshama u basile

Bibele yi ri: “Lowo tlhariha u vona khombo kutani a tumbela.” (Swivuriso 22:3) Ringeta hi matimba ku vona leswi nga xungetaka rihanyo ra wena ni ku tlhela u swi papalata.

Tshamela ku hlamba mavoko hi xisibi ni mati, ngopfungopfu loko u nga se khoma swakudya kumbe endzhaku ko tirhisa xihambukelo.
Tshama u ri karhi u basisa kaya ra wena, ngopfungopfu eka tindhawu ni swilo leswi khomiwaka nkarhi na nkarhi.
Loko swi koteka, papalata ku tshinelela vanhu lava nga ni vuvabyi lebyi tlulelaka.

DYANA SWAKUDYA LESWI NGA NI RIHANYO

Dyana swakudya lewsi nga ni rihanyo

Bibele yi ri: “A nga kona munhu loyi a tshameke a venga miri wakwe, kambe wa wu wundla ni ku wu hlayisa.” (Vaefesa 5:29) Hi kombisa leswaku hi rhandza mimiri ya hina hi ku va ni vuxiyaxiya eka leswi hi swi dyaka ni ku swi nwa.

Nwana mati yo tala.
Dyana mihandzu ni matsavu yo hambanahambana.
Hunguta ku dya swakudya leswi taleke mafurha, munyu ni chukele.
U nga dzahi, u nga kukutleli byala ku tlula mpimo kumbe ku tirhisa swidzidzirisi.

“Leswaku hi papalata ku khomiwa hi mavabyi, hi dya swakudya leswi nga ni rihanyo leswi hi pfunaka leswaku hi nga tirhisi mali yo tala hi ku tshamela ku ya eka dokodela kumbe ku xava mirhi ya swa vutshunguri. Hi tirhisa mali ya hina eku xaveni ka swakudya leswi nga ni rihanyo.”—Carlos.

ENDLA VUTIOLORI U TLHELA U WISA

Endla vutiolori

Bibele yi ri: “Swa antswa ku wisa ku ri ni ku tshamela ku tirha ni ku hlongorisa moya.” (Eklesiasta 4:6) Hi fanele hi tirha kambe ku wisa na swona swa laveka.

Tshama u ri eku endleni ka vutiolori. U nga endla tano hi ku tshamela ku tiolola hi ku famba mpfhuka wo leha. Vutiolori byi nga ku pfuna leswaku u va ni rihanyo lerinene hambiloko se u kurile, u lamarile kumbe u ri ni vuvabyi lebyi nga tshungulekiki.
Tinyike nkarhi wo wisa

Wisa nkarhi lowu eneleke. Loko u nga tinyiki nkarhi wo wisa, u nga ha va ni ntshikilelo wa miehleketo naswona swi ta endla leswaku miehleketo ya wena yi kavanyeteka hi ku olova. Sweswo swi nga ha ku vangela swiphiqo leswikulu swa rihanyo hi ku famba ka nkarhi.
Veka nkarhi lowu u faneleke u etlela hi wona naswona u nga wu tluli. Siku ni siku ringeta ku etlela u tlhela u pfuka hi nkarhi lowu fanaka.
Papalata ku hlalela TV kumbe ku tirhisa switirhisiwa swa elektroniki loko u ri eminkumbeni.
Loko u lava ku etlela, papalata ku dya ngopfu, ku nwa leswi nga ni khafeyini kumbe byala.

“Ndzi xiye leswaku ku etlela swi khumba rihanyo ra mina. Loko ndzi nga etleli nkarhi lowu eneleke, mikarhi yin’wana ndzi pandziwa hi nhloko naswona miri wa mina wa vava. Kambe loko ndzi etlela nkarhi lowu eneleke ndzi titwa ndzi ri ni matimba yo endla mitirho yo tala! Ndzi va ni matimba yo tala naswona a ndzi tshameli ku vabya.”—Justin.