MISAVA LEYI TALEKE HI MAXANGU

3 | Sirhelelaka Vanhu Lava U Va Rhandzaka

LESWI ENDLAKA SWI VA SWA NKOKA

Loko maxangu ya misava leyi ma ya ma tinyika matimba, vanhu vo tala a va ha tinyiki nkarhi wo tshama ni vanhu lava va va rhandzaka.

Van’wana va tihambanisa ni vanghana va vona.
Vatekani va tshamela ku holova.
Vatswari a va tinyiki nkarhi wo pfuna vana va vona loko va ri ni swiphiqo.

Leswi U Faneleke U Swi Tiva

Vanghana i va nkoka hikuva va hi pfuna hi khathalela rihanyo ra hina ni ku hi tiyisa hi mikarhi ya maxangu.
Ntshikilelo lowu vangiwaka hi maxangu ya misava leyi wu nga vanga swiphiqo ekaya hi ndlela leyi hi nga yi ehleketiki.
Loko vana va wena va twa kumbe va vona swilo leswi nga tsakisiki eka mahungu, swi nga va chavisa ngopfu.

Leswi U Nga Swi Endlaka Sweswi

Bibele yi ri: “Munghana wa ntiyiso u kombisa rirhandzu mikarhi hinkwayo, I makwenu wa ntiyiso loko u ri emaxangwini.”—Swivuriso 17:17.

Vanghana va nga hi pfuna ni ku hi nyika switsundzuxo leswinene. Vanghana vo tano lava hi rhandzaka va ta hi pfuna leswaku hi kota ku tiyisela swiyimo swo tika.

NDLELA LEYI U NGA SWI ENDLAKA HAYONA—Switsundzuxo Leswi Nga Ku Pfunaka

Hi nkarhi wa khombo, sirhelela vuxaka lebyi u nga na byona ni vanhu lava u va rhandzaka hi ku endla leswi landzelaka

TIYISA VUKATI BYA WENA

Tiyisa vukati bya wena

Bibele yi ri: “Vambirhi va antswa ku tlula un’we . . . Hikuva loko un’wana wa vona a wa, loyi un’wana a nga n’wi pfuxa.” (Eklesiasta 4:9, 10) Ku fana ni muhahisi wa xihahampfhuka loyi a tirhisanaka kahle ni mupfuni wakwe naswona va nga lwiki, vatekani na vona va fanele va tirhisana.

Loko mi ri ni swiphiqo leswi mi karhataka, tiyimiseleni ku nga holovelani. Ringetani ku lehiselana mbilu.
Tiyimisele ku vulavurisana ni munghana wa wena wa vukati hi swiphiqo leswi mi nga na swona, kumbexana kan’we hi vhiki. Lulamisani xiphiqo xa kona mi nga kalanga mi holova.
Vanani ni nkarhi wo endla swilo leswi hinkwenu mi swi tsakelaka.
Tinyikeni nkarhi wo tsundzuka mikarhi yo tsakisa leyi mi tiphineke swin’we hi yona, kumbexana hi ku langutisa swinepe swa n’wina swa mucato kumbe swin’wana swo tsakisa.

“Vatekani a va nge pfumelelani eka swilo hinkwaswo kambe a swi vuli swona leswaku a va nge pfuki va swi kotile ku tirhisana. Va nga teka xiboho swin’we kutani va tirha hi matimba leswaku va xi fikelela.”—David.

TIYISANI VUNGHANA BYA N’WINA

Sirhelela vunghana bya wena ni vanhu van’wana

Leswi vanghana va wena va ku seketelaka, na wena lava tindlela to va seketela. Loko u tinyika nkarhi wo tiyisa van’wana, na wena wa tiya.
Siku ni siku, vulavula ni van’wana va vanghana va wena leswaku u twa ku va pfuke njhani.
Vutisa vanghana va wena leswaku va yi hlule njhani mitlhontlho leyi fanaka ni ya wena.

“Vanghana va nga ku pfuna hi nkarhi wa mahlomulo. Va nga ku komba ndlela leyi u faneleke u famba hayona naswona va ku vuyisa endleleni loko u lahleka. Va ku rhandza swinene naswona va swi tiva leswaku na wena wa va rhandza.”—Nicole.

VANA MUTSWARI LOYI A SEKETELAKA VANA VAKWE

Seketela vana va wena

Bibele yi ri: ‘U fanele u hatla ku yingisa, u hlwela ku vulavula.’ (Yakobo 1:19) Vana va wena va nga kanakana ku ku phofulela leswi va karhataka nileswi va chavisaka kambe loko u va yingisela naswona u va lehisela mbilu, u ta va pfuna leswaku va tiphofula.

Endla vana va wena swi va olovela ku tiphofula eka wena. Vana van’wana va tshunxeka ku vulavula ni vatswari va vona loko va famba swin’we mpfhuka wo karhi hi milenge kumbe hi movha, ku ri ni ku va vulavurisana va lo tshama.
Tiyiseka leswaku vana va wena a va tshameli ku yingisela swiviko swa mahungu leswi nga va chavisaka.
Va byeli hi leswi u swi endleke leswaku ndyangu wu hlayiseka.
Kunguhata ndlela leyi u nga angulaka hayona eka timhangu ta xihatla kutani u swi praktisa swin’we na vona.

“Vulavurisana ni vana va wena naswona u va pfumelela va phofula ndlela leyi va titwaka hayona. Kumbexana va chava, va karhateka kumbe ku na leswi nga va hlundzukisa naswona va ringeta ku swi tumbeta. Va byeli leswaku na wena mikarhi yin’wana u pfa u titwa tano nileswi ku pfuneke leswaku u swi hlula.”—Bethany.