Dyondzo 92

Yesu A Pfuxa Mufi

XINHWANYATANA lexi u xi vonaka laha xi ni malembe ya 12. Yesu u xi khome hi voko naswona mana wa xona na tata wa xona va yime ekusuhi. Xana wa swi tiva leswaku ha yini va tsake swonghasi? A hi voneni.

Tata wa xinhwanyatana lexi i wanuna wa nkoka la vuriwaka Yayiro. Siku rin’wana n’wana wakwe wa nhwanyana u sungule ku vabya kutani a latiwa emubedweni. Kambe a a nga antswi. Vuvabyi bya yena byi nyanyile. Yayiro ni nsati a va nga dyi byi rhelela, hikuva a swi tikomba onge xinhwanyatana xa vona xi ta fa. Xi lo tswariwa xi ri xoxe. Hiloko Yayiro a famba a ya lava Yesu. A a twe hi ta masingita lawa Yesu a a ma endla.

Loko Yayiro a kuma Yesu, a ku ri ni ntshungu lowukulu lowu n’wi rhendzeleke. Kambe Yayiro u manyukute exikarhi ka ntshungu kutani a fika a nkhinsama emilengeni ya Yesu. A ku: ‘N’wana wa mina wa nhwanyana u vabya ngopfu.’ Hiloko a kombela a ku: ‘Ndzi kombela u famba na mina u ya n’wi hanyisa.’ Yesu u vule leswaku u ta ta.

Loko va ri eku fambeni, ntshungu a wu susumetana wu tshinela ekusuhi na yena. Hiloko Yesu a yima. Kutani a vutisa a ku: ‘I mani la nga ndzi khumba?’ Yesu u twe matimba ma huma eka yena hiloko a swi lemuka leswaku ku ni munhu la n’wi khumbeke. Kambe i mani? I wansati loyi a a vabya swinene ku ringana malembe ya 12. U tile a ta khumba tinguvu ta Yesu kutani a hanyisiwa!

Leswi swi tiyise Yayiro nhlana, hikuva a a vona ndlela leyi swi olovaka ha yona eka Yesu ku hanyisa munhu un’wana. Kambe, hiloko ku fika murhumiwa. A byela Yayiro a ku: ‘U nga ha n’wi karhati Yesu. N’wana wa wena u file.’ Yesu u yi twile mhaka leyi hiloko a byela Yayiro a ku: ‘U nga chavi, u ta hanya.’

Loko va fika endlwini ya Yayiro, vanhu a va ri eku rileni hi xiviti lexikulu. Kambe Yesu u te: ‘Mi nga rili. N’wana a nga fanga. U lo etlela.’ Hiloko va hleka ni ku hlekula Yesu, hikuva a va swi tiva leswaku n’wana u file.

Hiloko Yesu a teka tata wa xinhwanyatana ni vaapostola vakwe vanharhu a nghena na vona endlwini leyi n’wana loyi a etleleke eka yona. U n’wi khome hi voko kutani a ku: ‘Pfuka!’ Hiloko n’wana a pfuka, hilaha u swi vonaka hakona laha. Kutani a pfuka a sungula ku famba-famba! Hi swona leswi endlaka leswaku mana wakwe ni tata wakwe va tsaka ngopfu.

Loyi a hi munhu wo sungula ku va a pfuxiwa hi Yesu eku feni. Munhu wo sungula loyi Bibele yi hi byelaka ha yena a ku ri n’wana wa jaha wa noni ya le mutini wa Nayini. Endzhakunyana, Yesu u tlhele a pfuxa Lazaro loyi a a file, makwavo wa Mariya na Marta. Loko Yesu a fuma tanihi hosi leyi vekiweke hi Xikwembu, u ta pfuxa vanhu vo tala swinene. Xana sweswo a swi nge hi tsakisi?

Luka 8:40-56; 7:11-17; Yohane 11:17-44.