Xinhwanyatana Xi Tlhela Xi Hanya!

Yayiro wa swi vona leswaku wansati loyi a a khuluka ngati u horisiwile hi Yesu. Yesu a nga swi kota ku pfuna xinhwanyatana lexi hambileswi Yayiro a vonaka onge ‘xinhwanyatana xakwe xi fanele xi file.’ (Matewu 9:18) Xana swa ha ta koteka leswaku xi pfuneka?

Loko Yesu a ha vulavula ni wansati loyi a n’wi horiseke, ku fika vavanuna lava humaka ekaya ra Yayiro ivi va ku: “N’wana wa wena u file!” Va engetela va ku: “U nga ha n’wi karhati Mudyondzisi.”—Marka 5:35.

Lawa I mahungu yo vava hakunene! Wanuna loyi a xiximiwaka swinene emugangeni, sweswi a xi kona lexi a nga xi endlaka. N’wana wakwe loyi a ngo va n’wana wa tuva, u file. Hambiswiritano, Yesu u twa xiviko kutani a hundzulukela eka Yayiro, a vulavula hi ndlela leyi khutazaka a ku: “U nga chavi, vana ni ripfumelo.”—Marka 5:36.

Yesu u famba na Yayiro ekaya rakwe. Loko va fika, va kuma vanhu va ri karhi va rila. Vanhu lava hlengeletaneke kwalaho va kalakala naswona va karhatekile hileswi va nga ni gome. Yesu u nghena endlwini a vula marito lama hlamarisaka a ku: “N’wana loyi a nga fanga kambe u lo etlela.” (Marka 5:39) Loko vanhu va twa leswi Yesu a swi vulaka, va n’wi hleka. Va swi tiva leswaku hakunene xinhwanyatana lexi xi file. Hi ku tirhisa matimba lama a nyikiweke hi Xikwembu, Yesu u ta kombisa leswaku swa koteka ku vanhu va pfuxiwa eku feni ku fana ni loko va pfuxiwa evurhongweni lebyikulu.

Yesu u humesa vanhu hinkwavo ehandle handle ka Petro, Yakobo, Yohane ni vatswari va xinhwanyatana lexi. Yesu u famba ni vanhu lava va ntlhanu laha xinhwanyatana xi etleleke kona. Loko a xi khoma hi voko u ri: “‘Thalitha kumi,’ leswi, loko swi hundzuluxeriwa, swi vulaka leswaku: ‘Nhwanyana, ndzi ri eka wena, pfuka!’” (Marka 5:41) Hiloko xinhwanyatana xi pfuka ivi xi sungula ku famba. Ehleketa ntsako lowu Yayiro ni nsati wakwe va veke na wona loko va vona leswi! Loko a nyikela vumbhoni bya leswaku xinhwanyatana lexi xa hanya hakunene, Yesu u lerisa leswaku xi nyikiwa swakudya xi dya.

Eka swiendlakalo leswi hundzeke, Yesu u lerise lava a va horiseke leswaku va nga byeli munhu leswi a va endleleke swona naswona sweswi u byela vatswari lava leswi fanaka. Hambiswiritano, leswi vatswari lava ni vanhu van’wana a va tsakile, va hangalasa mahungu “emugangeni wolowo hinkwawo.” (Matewu 9:26) Xana a wu nga ta vulavula u tsakile loko u vone un’wana wa vanhu lava u va rhandzaka a pfuxiwa eku feni? Loku i ku pfuxiwa ka vumbirhi loku endliweke hi Yesu naswona swi rhekhodiwe ehansi.