Ndzima 47

Mihloti Yi Hundzuke Ntsako Lowukulu

LOKO Yayiro a vona wansati loyi a nga ni vuvabyi bya ku khuluka ngati a hanyisiwile, ku tshemba ka yena matimba ya mahlori ya Yesu handle ko kanakana ka engeteleka. Nimixo esikwini rero, Yesu a a komberiwa hi Yayiro leswaku a ta a ta ta pfuna n’wana wa yena wa wanhwana la rhandzekaka wa 12 wa malembe hi vukhale, loyi a a ri kusuhi ni ku fa. Hambi swi ri tano, sweswi leswi Yayiro a swi chavaka ngopfu swa humelela. Loko Yesu a ha vulavula ni wansati, vavanuna van’wana va fika ivi hi ku rhula va byela Yayiro va ku: “N’wana wa wena u file, wa ha karhatela yini Mudyondzisi?”

Mahungu lawa ya terisa gome swonghasi! Ehleketa ntsena: Wanuna loyi, loyi a hlohlotelaka xichavo lexikulu ngopfu eka vaaki-tiko, manuku u heleriwa hi matimba ngopfu loko a tiva hi ta rifu ra n’wana wakwe. Hambi swi ri tano, Yesu u twa bulo leri. Kutani, loko a hundzukela eka Yayiro, hi ku khutaza u ri: “U nga chavi, pfumela ntsena.”

Yesu u famba ni wanuna la hlaseriweke hi nhlomulo ekaya rakwe. Loko va fika, va kuma pongo lerikulu ra ku rila ni ku ba nkosi. Ntshungu wa vanhu wu hlengeletanile, naswona va titshandza nhlomulo. Loko Yesu a nghena, wa vutisa a ku: “Mi bela yini pongo leri, mi rilela yini? Nhwanyana loyi a nga fanga, u lo etlela.”

Loko va twa leswi, vanhu va sungula ku hleka Yesu hi ku monya hikuva va swi tiva leswaku nhwanyana u file hakunene. Hambi swi ri tano, Yesu u ri u lo etlela ntsena, hi ku tirhisa matimba yakwe lawa a ma nyikiweke hi Xikwembu, u kombisa leswaku vanhu va nga pfuxiwa eku feni hi ku olova tanihi leswi va nga pfuxiwaka evurhongweni lebyikulu.

Kutani Yesu u humesela hinkwavo ehandle ku sala Petro, Yakobo, Yohane na manana ni tata wa nhwana la feke. Kutani u ya ni lava va ntlhanu laha wanhwana lontsongo a etleleke kona. Loko a n’wi khoma hi voko, Yesu u ri: “Talita, kumi!” leswi loko, swi hundzuluxeriwa swi vulaka leswaku, “Nhwanyana, ndzi ri ka wena, pfuka.” Kutani hi ku hatlisa wanhwana wa pfuka ivi a sungula ku famba! Xivono lexi xi hlamarisa vatswari vakwe hi ntsako lowukulu ngopfu.

Endzhaku ka ku lerisa leswaku n’wana a nyikiwa swakudya, Yesu u lerisa Yayiro ni nsati wakwe leswaku va nga byeli munhu leswi humeleleke. Kambe ku nga khathariseki leswi Yesu a swi vulaka, ku vulavula ha swona ku hangalaka etikweni rero hinkwaro. Loku i ku pfuxiwa ka vafi ka vumbirhi loku Yesu a ku endlaka. Matewu 9:18-26; Marka 5:35-43; Luka 8:41-56.

▪ I timhaka tihi leti Yayiro a ti amukelaka, naswona xana Yesu u n’wi khutazisa ku yini?

▪ Xiyimo xi njhani loko va fika ekaya ra Yayiro?

▪ Ha yini Yesu a ku n’wana la feke u lo etlela ntsena?

▪ I vamani lava ntlhanu lava nga na Yesu lava vonaka ku pfuxiwa loku?