Mabandlha Ya Hlengeleteriwa Ku Twarisa Mfumo Wa Xikwembu

Loko a ri emisaveni, Yesu Kriste u twarisile Mfumo wa Xikwembu, a famba hi miti ni swimitana. Nakambe u leterile ni ku rhumela vadyondzisiwa vakwe ku endla ntirho lowu fanaka. A nga si tlhelela etilweni, u lerise vadyondzisiwa vakwe ku endla vadyondzisiwa hi vanhu va matiko hinkwawo. Ku sukela emasungulweni ya rona, bandlha ro sungula ra Vukriste a ri vumberiwe ku twarisa mahungu lamanene. Hinkwako laha vadyondzisiwa a va ya kona, a va ta kumiwa va twarisa Mfumo wa Xikwembu.—Matewu 4:17, 23; 10:1-16; 28:19, 20; Luka 4:43, 44; 8:1; 10:1-9; Mintirho 1:8; 4:31; 5:42; 8:12; 19:8; 28:23, 30, 31; Varhoma 10:9, 10, 14.

Eka vuprofeta bya Yesu bya makumu ya mafambiselo ya swilo, u te: “Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwavo; kutani hi kona makumu ma nga ta fika.” Ku twarisiwa loku i xiboho xo sungula xa bandlha ra Vukriste namuntlha.—Matewu 24:14; Marka 13:10.

Emisaveni hinkwayo, mabandlha hinkwawo ya Timbhoni ta Yehova ya vumberiwe ku hlanganisa ndzhawu hinkwayo ya kwalaho nkarhi na nkarhi hi ku twarisa ka mahungu lamanene ya Mfumo wa Xikwembu. Leswaku wu endliwa hi ndlela leyi faneleke, etikweni rin’wana ni rin’wana hofisi ya rhavi ya Sosayiti ya Watch Tower yi avela bandlha rin’wana ni rin’wana ndhawu yo veka vumbhoni eka yona. Bandlha ri avanyisa ndhawu yoleyo hi swiphemu leswintsongo, leswi kutani swi averiwaka lava nga ta rhwala vutihlamuleri byo vona leswaku vanhu va endzeriwa.—1 Vakorinto 14:33, 40.

Hakanyingi Timbhoni ti hlangana ni vanhu hi ku famba hi yindlu na yindlu. Eminhlanganweni ya vona ya mabandlha, Timbhoni ta Yehova ti leteriwe ku endla tinkulumo to koma ta mahungu ya Mfumo etindlwini, ti tirhisa Tibibele ta tona. Timbhoni ti famba ni tibuku ta Bibele ku ti siyela vini va miti lava navelaka ku kuma vutivi lebyikulu bya Rito ra Xikwembu.

Leswaku va nyika un’wana ni un’wana ensin’wini yoleyo nkarhi wa ku twa mahungu lawa ya risima ya Mfumo, Timbhoni ti hlayisa rhekhodo leyi nga ni vuxokoxoko loko ti karhi ti famba hi yindlu na yindlu, va komba laha vanhu a va nga ri kona emakaya kumbe lava hi mhaka ya xivangelo xin’wana a swi nga koteki ku va nyikela vumbhoni lebyinene. Ku nga tlheleriwa hi nkarhi wun’wana. Laha va kombiseke ku tsakela, kwalaho ka tsariwa, kutani Timbhoni ti tlhelela ku ya nyikela vuxokoxoko lebyi engetelekeke bya Matsalwa. Loko swi naveriwa, dyondzo ya Bibele ya minkarhi hinkwayo yi ta endliwa. Hinkwaswo leswi swi endliwa mahala.

Nakambe Timbhoni ta Yehova ti nyikela timagazini eka vahundzi eswitarateni. Hi ndlela leyi ta swi kota ku hlangana ni vanhu vo tala lava a ti nga ta va kuma emakaya. Ku endliwa matshalatshala ya ntiyiso yo fikelela hinkwavo lava nga ta yingisela.—Mintirho 17:17; Nhlavutelo 14:6, 7; 22:17.

Hikwalaho ka yini Timbhoni ti tshama ti ri karhi ti tlhelela loko vunyingi byi nga kombi ku tsakela? Ku kumeke leswaku xiyimo xa vanhu hakanyingi xa cinca kutani va swi amukela eka riendzo rin’wana, kumbe ku nga ha kumiwa munhu un’wana wa kwala kaya la nga ta komba ku tsakela.

Yesu u te eka vadyondzisiwa vakwe: “Rhangani mi tilavela Mfumo wa yena ni ku lulama ka yena.” Ku twarisa Mfumo wa Xikwembu ku endla xiphemu xa nkoka emhakeni yo va hi lava Mfumo ku sungula, kutani Timbhoni ta Yehova ti endla leswaku leswi wu va nchumu wa risima evuton’wini bya tona.—Matewu 6:33; 2 Timotiya 4:2.

• I ntirho wihi wa Yesu ni Vakriste vo sungula lowu a ku vhumbiwe leswaku wu ta endliwa ni le sikwini ra hina?

• Xana ntirho wa ku chumayela wa Timbhoni ta Yehova wu hleriwe hi ndlela yihi?

• Hikwalaho ka yini Timbhoni ti tshama ti ri karhi ti tlhelela eka vanhu loko vunyingi byi nga kombisi ku tsakela?

[Swifaniso leswi nga eka tluka 16, 17]

Timbhoni ta Yehova ti twarisa Mfumo wa Xikwembu ematikweni yo hambana-hambana

Thailand

Mexico

Netherlands

Korea

Curaçao

Ghana

Britain

Australia