Ku Tsaka Ni Ku Dzunisa Xikwembu eTinhlengeletanweni

Ku sukela ka va-1880 Swichudeni swa Bibele swi vone leswaku, ku engetela eka minhlangano ya kwalaho, a swi ta va leswi vuyerisaka ku tolovelana ni vapfumeri-kulobye va tindzhawu tin’wana. Kutani swi sungule ku lunghiselela mintsombano ya Swichudeni swa Bibele leswi humaka eUnited States hinkwayo, kutani endzhaku ni leswi humaka eCanada. Leyi a ku ri minkarhi yo phyuphyisa ya moya; ku nyikeriwa dyondzo leyi enteke ya Bibele hi masiku yo tala, nakona hinkwavo va tsakela ku khutazana loku tsakisaka. Ku khuvuriwa ka vapfumeri lavantshwa ku ve xiendlakalo xa nkarhi na nkarhi emintsombanweni. Nakambe mintsombano yi tirhisiwe ku nyikela vumbhoni lebyi enteke swinene eka vanhu.—Varhoma 1:11, 12.

Namuntlha Timbhoni ta Yehova ti tsakela tinhlengeletano ta minkarhi hinkwayo. Hakanyingi ku ringana mabandlha ya 18 ku ya ka 25 ya hlengeletiwa kun’we eka leswi swi vuriwaka swifundza, leswi vhakeriwaka, kumbe ku tirhiwa hi valanguteri lava famba-fambaka. Kambirhi hi lembe, ku lunghiseleriwa tinhlengeletano laha mabandlha ya xifundza, kumbe xiphemu xa xifundza xolexo, ya hlanganaka kun’we hi Mugqivela ni/kumbe Sonto.

Kan’we hi lembe, ku lunghiseleriwa mintsombano leyikulu ya masiku manharhu kumbe mune, leyi vuriwaka mintsombano ya muganga etikweni rin’wana ni rin’wana, laha magidi ya nga hlengeletanaka ndzhawu yin’we. Tinhlengeletano leti ti lunghiseleriwe ku aka vumoya bya Timbhoni ta Yehova ni van’wana lava tsakelaka mintirho ya tona, kutani va tlhela va nyikela vumbhoni bya le rivaleni.

Nongonoko wa tinhlengeletano leti kumbe mintsombano wu lunghiseleriwa hi Huvo leyi Fumaka ya Timbhoni ta Yehova naswona wu sekeriwe eka swilaveko swa Timbhoni emisaveni hinkwayo. Wu na tinkulumo, mimbulavurisano ni swikombiso swa vutomi swa xiviri, leswi nyikeriwaka hi valanguteri lava famba-fambaka ni Timbhoni leti fanelekaka emabandlheni. Nakambe vanhu vo hambana-hambana va hlamusela mintokoto ya hi laha va hlangavetanaka ni mphika-makaneta ya ku hanya tanihi Vakriste emisaveni leyi nga chaviki Xikwembu kumbe mimbuyelo leyi va vaka na yona evutirhelini. Eka mintsombano ya muganga ku na xiendlakalo xin’wana—swikombiso leswi hanyaka hi xivumbeko xa tidrama ta Bibele kumbe tidrama ta manguva lawa, leti kombaka leswi Vakriste va hlangavetanisaka swona ni swiphiqo leswi va langutanaka na swona namuntlha.

Nakambe swakudya ni swo nwa swa lunghiseleriwa hi munyikelo wa le hansi. Leswi swi pfumelela vuxaka lebyi tsakisaka loko minhlangano ya ha yimile. Ntirho hinkwawo lowu katsekaka eku endleni ka swiendlakalo leswi wu endliwa hi vatirhi vo tirhandzela lava humaka exikarhi ka Timbhoni ta Yehova. Minxavo ya swilo leswi tirhisiwaka kumbe ku durheriwa kun’wana swi hakeleriwa hi minyikelo ya ku tirhandzela. A ku hakeriwi mali yo nghena, naswona ku hava mihlengo leyi tekiwaka.

U nga kuma vuxokoxoko eka bandlha ra le kusuhi ra Timbhoni ta Yehova leswaku hi rini naswona hi kwihi laha minhlangano leyi yi lunghiseleriweke ku va kona endzhawini ya ka n’wina. Nakambe vuxokoxoko byi ta nyikeriwa hi ta malunghiselelo wahi na wahi ya swo famba, kun’we ni ndlela yo kuma byetlelo.

Tinhlengeletano ni mintsombano leyi swi pfuna Timbhoni ta Yehova ni hinkwavo lava hlanganyelaka na tona ku vona ni le handle ka bandlha ra ka vona ni ku tlangela nhlengeletano hinkwayo ya vamakwavo emisaveni.—1 Petro 2:17.

• I mimbuyelo yihi leyi Swichudeni swo sungula swa Bibele swi yi kumeke emintsombanweni ya swona?

• Hlamusela lunghiselelo ni nongonoko wa tinhlengeletano ta swifundza ni mintsombano ya muganga.

[Swifaniso leswi nga eka tluka 18]

Drama ya Bibele enhlengeletanweni ya muganga, eUnited States

Ntsombano wa matiko hinkwawo, ePoland

Ntsombano wa matiko hinkwawo, eArgentina

Nhlengeletano ya xifundza, eJapani

Vapfhumba va kume tibuku ta Bibele, eSwitzerland

Nkhuvulo entsombanweni wa matiko hinkwawo, eAfrika Dzonga

Ku humesiwa ka buku leyintshwa ya Bibele, eCanada

Vapfhumba va ntsombano va hlanganyela eku yimbeleleni, eSpain