Timbhoni Ta Yehovha Ti Ta Khoma Mintsombano Ya Matiko Hinkwawo

Huvo leyi Fumaka ya Timbhoni ta Yehovha yi kunguhata leswaku ku va ni mintsombano ya matiko hinkwawo hi 1998. Xitiviso lexi xi amukeriwe hi mandla mambirhi enhlanganweni wa lembe na lembe wa Watch Tower Bible and Tract Society of Pennsylvania, lowu khomeriweke le Holweni ya Tinhlengeletano eDoroba-nkulu ra Jersey hi Mugqivela, October 5, 1996.

Ku ta khomiwa mintsombano yo hlayanyana ya matiko hinkwawo, kun’we ni mintsombano leyi tolovelekeke ya muganga le Amerika N’walungu exikarhi ka 1998. Ku languteriwe leswaku mintsombano leyi yi hlanganisa madzana ya magidi ya Timbhoni to huma etindhawini to tala ta misava. Ku endlela leswaku ku yimeriwa matiko yo tala hilaha swi kotekaka hakona, hofisi yin’wana ni yin’wana ya marhavi lama tlulaka 100 ya Sosayiti ya Watch Tower yi ta va ni ntsengo wo karhi wa vapfhumba lava nga ta ya entsindza wo karhi wa ntsombano wa matiko hinkwawo le Amerika N’walungu.

Handle ko kanakana, van’wana eka lava swi tsakelaka ku ya eAmerika N’walungu a va nge swi koti ku endla tano. Hambiswiritano, swi nga koteka leswaku vanhu va magidi va va kona entsombanweni wa matiko hinkwawo lowu nga ta va endhawini ya ka vona. Ku endliwa malunghiselelo yo khoma mintsombano ya matiko hinkwawo ematikweni mambirhi kumbe manharhu le Yuropa, ni yin’wana eAfrika, Asia, Kharibiya, Latin Amerika ni le Pacific Dzonga.

Hi nkarhi lowu faneleke, tihofisi ta marhavi ya Sosayiti ti ta tivisa mavandlha lama nga etindhawini ta tona malunghana ni ntsindza kumbe mintsindza ya ntsombano leyi ma averiweke eka yona. Ma ta tivisiwa malunghana ni masiku ya ntsombano kun’we ni malunghiselelo yo hlawula vapfhumba. Lava va tiyimiseleke ku endla swikombelo swa ku hlawuriwa va va vapfhumba, va nga ha sungula ku veka mali ya swiendlakalo leswi swo hlawuleka.

Timbhoni hinkwato ta Yehovha emisaveni hinkwayo ti nga langutela leswi ti lunghiseleriweke swona emintsombanweni leyi ya matiko hinkwawo ya 1998. Mintsombano ya muganga ematikweni hinkwawo yi ta va ni nongonoko lowu fanaka.