Ndzima 16
Ku Hlawula Loku Tshembisaka Vutomi Eku Rhuleni Ka Ntiyiso Ni Nsirhelelo
1. Loko hi endla ku hlawula lokunene, i ku rhula kwihi na ntshembo swi nga vaka swa hina sweswi?
I NTSAKO wonghasi ku va ni xikongomelo xa xiviri evuton’wini ku tiva laha u yaka kona! Naswona i ku rhula muni ka mianakanyo ni mbilu loku vangiwaka hi ku tiyiseka leswaku ku hava ndlela yo antswa leyi u nga yi teka! Ku rhula ko tano ni ntshembo swi nga va swa wena, kambe loko ntsena u hlawula kahle sweswi.
2. Ku tiva ka hina Yehova ni swikongomelo swakwe ku hi pfuna hi ndlela yihi mayelana ni malangutelo ya hina ya vutomi?
2 Vumbhoni byi le rivaleni leswaku hi nga ka hi nga languti eka misava leyi tanihi xihlovo xa ku rhula ka ntiyiso ni nsirhelelo. Mafambiselo ya bindzu, vukhongeri ni ya politiki, ku katsa na United Nations ni switiviso swa yona swa ‘ku rhula ni nsirhelelo,’ swi nga ka swi nga ku tisi. Hikwalaho, Bibele yi hi komba, eka Yehova Xikwembu tanihi xona ntsena Xihlovo xa ku rhula ka ntiyiso ni nsirhelelo. Ku n’wi tiva ni swikongomelo swakwe swi hi pfuna ku twisisa leswaku hikwalaho ka yini hi ri kwala misaveni ni leswaku hikwalaho ka yini swilo swi ri hi ndlela leyi swi nga xiswona namuntlha. Hi dyondza hi ta mphikamakaneta leyikulu leyi katsaka vuhosi bya Yehova bya misava hinkwayo, ni hi laha yi khumbaka un’wana ni un’wana wa hina ha kona. Hi dyondza ku pima vunene ni vutlhari bya tipakani ta hina, naswona hi kuma mimpimanyeto leyinene leyi tshembekaka leyi ku faneleke ku hanyiwa ha yona. Loko hi langutane ni vuvabyi, ku dyuhala kumbe rifu, hi na ntshembo lowu chavelelaka wa vutomi, emafambiselweni lamantshwa yo lulama ni ya rihanyo, hambi ku ri hi ku pfuka eku feni, loko swi fanela.
3. Hikwalaho ka yini Yehova a ri yena loyi hi faneleke ku veka mintshembo ya hina hinkwayo eka yena?
3 A swi hlamarisi ke, loko Esaya 26:4 a khongotela: “Tshembani Yehova hi minkarhi ni minkarhi, hikuva Yehova, Yehova i ribye ra malembe ya madzana-dzana.” Loyi a nga cinciki, wa matimba hinkwawo, ni loyi a nga riki ni ku hela, Yehova hakunene hi loyi hi faneleke ku veka mintshembo ya hina hinkwayo eka yena. Xana wa swi lava ku tsakela nkongomiso wakwe ni nsirhelelo hayi sweswi ntsena kambe eka nkarhi hinkwawo lowu taka eMafambiselweni yakwe Lamatshwa lama a ma tshembiseke? Loko swi ri tano, u fanele ku endla yini?
4. Ku kuma tintswalo ta Yehova, xana hi lava yini, naswona i yini lexi endlaka leswaku swi koteka?
4 Vanhu hinkwavo va hambukile eka Xikwembu hikwalaho ka xidyoho xa vatswari va hina vo sungula. Kambe Xikwembu xi pfule ndlela yo phahlelana mariyeta ni vuxaka na yena hi gandzelo ra N’wana wa xona. (2 Vakorinto 5:19-21; Vaefesa 2:12, 13) Kambe, a swi enelanga eka hina sweswi ku va hi ku olova hi vula leswaku hi lava vunakulobye bya Xikwembu.
5. Nsusumeto wa hina wu fanele wu va wihi eku laveni ka vuxaka bya Yehova?
5 Hi fanele ku rhandza, futhi hi ku hiseka, ku tikomba eka yena leswaku ha swi lava leswi, naswona hi nsusumeto lowunene. Hi xikombiso, xana hi lava vunghana bya Yehova ngopfu-ngopfu leswaku hi pona mhangu? Loko hi ta kuma xiyimo lexinene na Xikwembu, a swi nge vi swa nkarhi lowu wa xihatla ntsena ku nga si ta ku avanyisa ka xona kumbe ku pona ‘nhlomulo lowukulu’ lowu taka ntsena. (Matewu 24:21, 22) Swi fanele swi va swa nkarhi hinkwawo lowu taka. I rirhandzu ra ntiyiso ntsena ri nga ta hi nyika nsusumeto lowu. Leswaku hi ta kombisa vunene bya ku navela ka hina ka vunghana byakwe, Yehova u andlale swilo swin’wana leswi un’wana ni un’wana wa hina a faneleke ku swi endla leswaku a vuyelelana na yena eRitweni rakwe.
Ripfumelo Leri Hanyaka
6. Ku tsakisa Xikwembu, i ntshembo wihi hi faneleke ku va na wona mayelana na yena?
6 Yehova i Xikwembu xa rirhandzu. Kutani hi nga va ni ntshembo wa xiviri eka switshembiso swakwe. Kahle-kahle, “ehandle ka ku pfumela a swi endleki ku tsakisa Xikwembu. Un’wana ni un’wana loyi a lavaka ku tshinelela Xikwembu u fanele ku pfumela leswaku xi kona, ni leswaku xi hakela lava va xi lavaka.” (Vaheveru 11:6) Loko u ri na ripfumelo ro tano, kutani wa swi tiva leswaku hinkwaswo leswi Xikwembu xi swi endlaka swi na xikongomelo lexinene, ni leswaku minkarhi hinkwayo xi anakanya hi leswi swi nga ta hi pfuna. Ku sukela emintirhweni yakwe ya ku tumbuluxa ni le Ritweni rakwe leri tsariweke, wa swi vona leswaku a hi loyi a nga ni vutlhari hinkwabyo ni matimba hinkwawo ntsena kambe u tlhela a va Xikwembu xa tintswalo. Kavula, xi nga ka xi nga hambuki eka mimpimanyeto ya xona leyo lulama. Kambe, hambi loko hi nga hetisekanga nakona hi endla swihoxo, loko hi rhandza vululami, xi na ndlela ya ku tirhisana na hina leyi nga ta tisa minkateko.
7. Xana ku va ni ntshembo eka vunene ni vutlhari bya Yehova swi ta hi sirheleta hi ndlela yihi?
7 Xisweswo, loko hi kombiwa xihoxo hi Xikwembu, hi ta swi tiva ku endlela vuhlayiseki bya hina lebyi nga heriki. Hi ta tshemba Yehova tanihi n’wana wa mufana kumbe nhwanyana loyi a tshembaka tatana wa rirhandzu, wo tlhariha ni wa matimba. (Psalma 103:13, 14; Swivuriso 3:11, 12) Hi ku va ni ripfumelo ro tano, hi nga ka hi nga kanakani hi vutlhari bya ndzayo yakwe hambi byi ri vunene bya tindlela takwe, hambi loko hi nkarhi wo leha hi nga ha vaka hi nga ti twisisanga hi ku helela timhaka tin’wana. Hi mukhuva wolowo hi tiveka exikarhi ka lava mupisalema a va hlamuselaka: “Lava rhandzaka nawu wa wena va ni ku rhula lokukulu, a ku na ku khunguvanyisa eka vona.”—Psalma 119:165; Swivuriso 3:5-8.
8. (a) Hikwalaho ka yini ripfumelo ri ri roxe ri nga enelanga? (b) I xiendlo xihi lexi vuriweke eka Mintirho 3:19 lexi ripfumelo ri faneleke ku hi susumetela eka xona?
8 Kambe “ku pfumela na kona loku nga hava mintirho ku file,” Ku vula Yakobo 2:26. Ripfumelo ra ntiyiso ri susumetela munhu ku teka goza. Kutani xin’wana xa swilo swo sungula leswi ri susumetelaka munhu ku swi endla hi leswi muapostola Petro a swi khutazeke a ku: “Hundzukani . . . mi tlhelela eka Xikwembu, leswaku swidyoho swa n’wina swi hlanguriwa.” (Mintirho 3:19) Leswi swi vula yini xana?
Ku Hundzuka Ni Ku Tlhela
9. (a) Ku hundzuka ka ntiyiso i yini xana? (b) Hi fanele ku hundzuka eka yini?
9 EBibeleni, ku hundzuka swi vula ku cinca ka mianakanyo loku fambisanaka ni ku tisola ka mbilu eka ndlela yo sungula ya vutomi kumbe swiendlo leswi hoxeke. (2 Vakorinto 7:9-11) Kambe loko hi ta tsakela switshembiso swa “minkarhi yo phyuphya” swa Xikwembu, hi nga ka hi nga hundzuki ntsena eka swiendlo swo biha swa khale. Ku ri na sweswo, hi fanele ku komba ku hundzuka hikuva hi tiva leswaku, tanihi vana va Adamu, ntumbuluko wa hina wu vile exidyohweni. Tanihi loko muapostola Yohane a kombisa: “Loko hi vula leswaku: ‘a hi dyohi,’ ha tixisa . . . hi xi endla muhembi [Xikwembu], kutani Rito ra xona a ri kona eka hina.” (1 Yohane 1:8, 10) Hi fanele ku tekelela Muvumbi wa hina hi mukhuva lowu fanelaka, hi kombisa ‘xifaniso’ xa yena. Kambe xidyoho xa ndzhaka xi hi sivela ku endla leswi hi ndlela yo hetiseka. Kutani ke, ‘hi hupha pakani,’ leswi rito leri nge “xidyoho” ri vulaka swona eBibeleni.—Genesa 1:26; Varhoma 3:23.
10, 11. (a) I mani loyi hi n’wi kweletaka vutomi, naswona hikwalaho ka yini? (b) Kutani, hi fanele ku tirhisa vutomi bya hina hi ndlela yihi?
10 Hikwalaho hi lava ndzivalelo wa Xikwembu. (Matewu 6:12) Ha twisisa leswaku hi kolota vutomi bya hina eka yena tanihi Muvumbi wa hina. Kambe sweswi hi dyondza leswaku hi gandzelo ra N’wana wa Xikwembu, vanhu nakambe va “xaviwile hi nxavo” lowukulu. Kutani a hi fanelanga ku va “mahlonga ya vanhu,” hambi ya ku navela ka hina ka vutianakanyi. (1 Vakorinto 7:23) Kambe, hi nga si dyondza ni ku amukela ntiyiso, xana a hi swona leswi hinkwerhu ka hina a hi ri swona?—Yohane 8:31-34.
11 Embilwini ya wena, xana wa yi tlangela nyiko ya Xikwembu ya N’wana wa xona ni leswi xi swi endleke ha Kriste ku lunghiselela ku pona eka vuhlonga, xidyoho ni rifu? Kutani hakunene hi mbilu hinkwayo u ta tisola eka xihoxo xihi na xihi xa nkarhi lowu hundzeke leswaku u hanya hi ku yingisa Muvumbi wa wena. Leswi swi ta ku susumetela ku hundzuka ka mbilu hinkwayo eku landzeleni ka ndlela ya vutomi leyi fanaka ni ya misava, leyi nga twananiki na ku rhandza ka Xikwembu na swikongomelo swa xona.—Mintirho 17:28, 30; Nhlavutelo 4:11.
12. Munhu la hundzukeke u komba hi ndlela yihi leswaku hakunene u cukumete ndlela yakwe yo sungula?
12 Ku hundzuka loku ka ntiyiso ku yisa eku ‘cinceni,’ swi nga leswi rito leri nge ‘ku tlhela’ ri vulaka swona. Munhu la hundzukeke hi xiviri a nga tisoli ntsena loko a tirhise vutomi byakwe hi ndlela yo biha. U cukumeta ndlela yoleyo yo biha kutani hakunene a venga tindlela takwe to biha. U kombisa leswi hi ku ‘cinca’ ivi a tirha “mintirho leyi fambelanaka ni ku hundzuka,” a tisa vutomi byakwe eku twananeni na ku rhandza ka Xikwembu.—Mintirho 26:20; Varhoma 6:11.
13. (a) Hi wihi mongo wa marito ya Yesu ya leswaku valandzeri vakwe va fanele ku ‘titshika’? (b) Xisweswo hi tinyiketa eka Yehova hikwalaho ka xivangelo xihi, naswona swi khumba vutomi bya hina hi ndlela yihi?
13 Xiphemu xa ku hundzuka loku ni ku cinca xi katsa leswi Yesu a nga te i ku ‘titshika.’ (Matewu 16:24) Hi leswaku, a ha ha hanyi hi ku navela ka hina ntsena ka vutianakanyi hi nga ri na mhaka ni ku rhandza ka Xikwembu ni swikongomelo swa xona. Ku ri na sweswo, hi twisisa leswaku Yehova Xikwembu kunene u na mfanelo leyi heleleke evuton’wini bya hina tanihi Muvumbi wa hina ni Muxavi wa hina hi nkutsulo wa gandzelo ra N’wana wa yena. Tanihi loko Bibele yi swi kombisa, ‘a ha ha tifumi, hikuva hi xaviwile hi nxavo.’ (1 Vakorinto 6:19, 20) Kutani, ku ri na ku hundziwa hi ntshunxeko lowunene lowu hi wu pfuleriweke hi ntiyiso, hi tinyiketa hi xitalo eku endleni ka ku rhandza ka Xikwembu. (Vagalatiya 5:13; 1 Petro 2:16) Naswona hi endla leswi hayi hi leswi swi lulameke ntsena kambe hi leswi hi rhandzaka Yehova Xikwembu hi ‘timbilu ta hina hinkwato, moya, mianakanyo ni matimba.’ (Marka 12:29, 30) Hakunene leswi swi vangela un’wana ni un’wana wa hina ku hanya vutomi bya ku tinyiketa eka Xikwembu. Ku ri na ku va ndzhwalo, ndlela leyi yi endla leswaku hi kota ku tsakela vutomi ku tlula eku sunguleni.—Matewu 11:28-30.
Ku Vula eRivaleni Leswaku Hi Pona
14. (a) Loko munhu a nkhensa vun’wini lebyinene bya Yehova eka yena, a nga endla nhlamuselo ya leswi eka Xikwembu hi ndlela yihi? (b) I yini xin’wana lexi a faneleke a navela ku xi endla, tanihi loko swi kombisiwe eka Varhoma 10:10?
14 I nchumu lowunene leswaku hi xikhongelo hi vula ku tshemba ka hina ka malunghiselelo ya Xikwembu, hi nkhensa vun’wini bya xona eka hina. Kambe hi nga swi kota naswona hi fanele ku lava ku yisa marito ya hina ya ripfumelo emahlweni, tanihi loko Varhoma 10:10 yi hi byela: “Hikuva munhu u pfumela hi mbilu, kutani sweswo swi n’wi endla a va la lulameke; u vula hi nomu, kutani sweswo swi n’wi endla a va la ponisiwaka.” Ku vula ka le ‘rivaleni’ ka ripfumelo ra hina eka Yehova ni malunghiselelo ya yena ku fanele ku huma hi ntsako ku suka embilwini leyi taleke ku tlangela. Ku vula loku swi katsa ku nyiketela vutomi bya hina eka Yehova leswaku hi endla ku rhandza ka yena ni ku kombisa leswi hi nkhuvulo wa mati.
15. Hikwalaho ka yini hi fanele ku anakanyisisa swinene hi nkhuvulo wa mati?
15 Loko Yesu Kriste a sungule ntirho wakwe wa le rivaleni, u byele Yohane Mukhuvuri ku n’wi khuvula ematini. Bibele yi vika leswaku kutani Yesu a ku eka Xikwembu: “Ndzi tile ku ta endla ku rhandza ka wena.” (Vaheveru 10:9; Psalma 40:7, 8) Yesu u lerise leswaku hinkwavo lava hundzukaka vadyondzisiwa vakwe na vona va fanele va khuvuriwa. Xana u mudyondzisiwa wo tano? Kutani nkhuvulo wa wena wa mati i ku “vuriwa erivaleni” ka leswi.—Matewu 28:19, 20.
16. (a) U nga swi vonisa ku yini loko swi ku fanela ku khuvuriwa? (b) Xana valanguteri va pfuna vanhu eku lunghiseleleni ka vona ka nkhuvulo hi ndlela yihi?
16 I nkateko lowukulu ku va mbhoni leyi tinyiketeleke, leyi khuvuriweke ya Yehova, Mufumi wa misava hinkwayo. Sweswi pfuxeta leswi swi katsaka swona: Yehova hi rirhandzu u ku pfulele ndlela yo va ni vunghana byakwe. Kambe ku byi kuma, u fanele ku va ni ripfumelo, u pfumela hakunene leswaku Bibele i Rito ra Xikwembu leri huhuteriweke. (2 Timotiya 3:16, 17) Na wena u fanele ku va ni ripfumelo eka gandzelo ra nkutsulo ra Yesu tanihi ndlela yi ri yoxe yo amukela xiyimo lexinene eka Xikwembu. (Mintirho 4:12) U fanele ku tlangela ku tiseketela ka wena hi Yehova ni ku nyiketa vutomi bya wena eka yena leswaku u endla ku rhandza kakwe, hayi malembe ma nga ri mangani ntsena, kambe hi laha ku nga heriki. Ndlela yo tano yi katsa ‘ku nga vi wa misava.’ (Yohane 17:16; 1 Yohane 2:15) Tanihi vumbhoni bya leswaku u hundzukile ni ku ‘cinca,’ u fanele u cukumetile swiendlo swihi na swihi leswi lwisanaka ni mimpimanyeto leyinene ya Xikwembu naswona u fanele u ri karhi u endla leswi Xikwembu xi swi lerisaka. Xana u cincile mianakanyo ya wena leswaku leswi ku va ndlela leyi sweswi u langutaka vutomi ha yona? (Varhoma 12:1, 2) Loko swi ri tano, Bibele yi ku khutaza ku ri ‘vula erivaleni’ ripfumelo ro tano. Goza ro sungula ku ta va ku tshinelela un’wana wa valanguteri va bandlha ra Timbhoni ta Yehova endhawini ya ka n’wina kutani u n’wi tivisa hi laha u titwaka ha kona. U ta lunghiselela ku pfuxeta tidyondzo ta xisekelo ta Bibele na wena eku lunghiseleleni ka nkhuvulo.
17. Hi ku tirhisa Bibele, komba hi laha hi nga yaka emahlweni ha kona hi ‘vula ripfumelo ra hina erivaleni.’
17 Goza ra nkhuvulo a ri nge funghi makumu ya ‘ku vula erivaleni ka ripfumelo ra wena.’ Tanihi Mukriste la tinyiketeke eka Yehova Xikwembu, u ta lava ku twarisa ntshembo wa wena hi ku vulavula erivaleni, ‘ku n’wi twarisa enhlengeletanweni leyikulu.’ (Psalma 35:18; 40:9, 10) Nakambe u ta lava ku hlanganyela entirhweni wo hlawuleka wa ku ‘vula erivaleni’ lowu Yehova a wu avelaka hinkwavo lava nga ta n’wi tirhela—ku twarisa mahungu lamanene ya Mfumo emisaveni hinkwayo ni ku endla vadyondzisiwa hi vanhu va matiko hinkwawo.—Matewu 24:14; 28:19.
Ku Tsakela Vuxaka Bya Wena Na Xikwembu
18. Xana dyondzo ya munhu hi xiyexe i ya risima hi ndlela yihi eku tiyiseni ka leswaku vuxaka bya munhu na Yehova byi ta tiyisela?
18 Sweswi ke, u nga tiyiseka njhani leswaku, loko wo za u byi kuma, vuxaka bya wena na Yehova byi ta tiyisela hi laha ku nga heriki entsakweni wa ku rhula ni nsirhelelo? Phela u ta swi lava ku tshama u ri karhi u kula evutivini byakwe. Hi dyondzo ya munhu hi xiyexe u ta kuma ntsako wa xiviri eku kumeni ka xuma xa vutlhari lexi hlayisiweke eRitweni ra Xikwembu. U nga fana ni munhu loyi Psalma 1:2, 3 yi n’wi hlamuselaka: “A titsakela enawini wa Yehova, A wu anakanya nhlekanhi ni vusiku. U fana ni murhi lowu tswalaka mihandzu ya wona hi nkarhi wa wona, lowu matluka ya wona ma nga omiki: Hinkwaswo leswi a swi endlaka swi ta kateka.” Ina, ku kuma vutivi bya Xikwembu, ni ku byi tirhisa, swi ta ku pfuna ku famba “etindleleni leti tsakisaka” ni le ka ‘mintila ya ku rhula,’ hikuva swi ta ku nyika vutlhari byo hlangavetana ni swiphiqo hinkwaswo swa vutomi. (Swivuriso 3:13, 17, 18) Torha ra wena ra vutivi byo tano bya Bibele sweswi ri ta kombisa ku faneleka ka wena ka vutomi eMafambiselweni Lamantshwa ya Xikwembu, hikuva hi nkarhi wolowo “ku tiva Yehova ku ta eneta misava, tanihi leswi mati ma funengetaka vuento bya lwandle.”—Esaya 11:9.
19. Hikwalaho ka yini ku hlanganyela hi masiku etidyondzweni swi fanela evuton’wini bya vanhu va Yehova?
19 Nchumu wun’wana wa nkoka lowu u wu lavaka i ku hlanganyela nkarhi na nkarhi etidyondzweni na malandza yan’wana ya Yehova. Kwalaho u ta kuma nhlohlotelo wa xiviri wa rirhandzu ni mintirho leyinene, swikhutazo swa ku chivirika evuxakeni bya wena lebyinene na Xikwembu. (Vaheveru 10:23-25) Vuxaka lebyi tsakisaka, byo fana ni bya ndyangu bya malandza ya Yehova byi nyika vumbhoni lebyi tiyisaka bya leswaku ku rhula ni nsirhelelo leswi tshembisiwaka eMafambiselweni Lamantshwa ya Xikwembu i ntiyiso.—Psalma 133:1; 1 Vakorinto 14:26, 33.
20. Vakulukumba ebandlheni va nga hi pfuna hi ndlela yihi eminkarhini ya ku kanetiwa ni ku nonoha ka munhu hi xiyexe?
20 Ebandlheni u nga pfuneka hi lunghiselelo rin’wana ra rirhandzu. Yesu, ‘Murisi Lonene,’ u na ‘varisi-ntsongo’ emisaveni. Lava i valanguteri, kumbe vavanuna lava kuleke emoyeni, lava hlayisaka “tinyimpfu” takwe. I mpfuno wa matimba eku hlohloteleni ka ku rhula ni nsirhelelo exikarhi ka vanhu lava hlengeletaneke va Xikwembu emisaveni hinkwayo. (1 Petro 5:2, 3) Vavanuna lava va “kotisa xisirhelelo loko moya wu hunga, kukota xichavelo loko xidzedze xi fika, kukota xinambyana xa mati etikweni ra dyandza, ni ndzhuti wa ribye leri tlakukeke tikweni leri omeke.” (Esaya 32:1, 2) Ina, eminkarhini ya bubutsa ra ntshikilelo ni ku tika hikwalaho ka nkaneto wa misava kumbe ku nonoha ka munhu hi xiyexe, hi ripfumelo ra vona ro fana ni ribye na ku namarhela ka vona loku tiyeke eka Rito ra Xikwembu, vakulukumba lava va moya va nga nyika nseketelo wa xiviri. Va nga ku nyika ndzayo leyi phyuphyisaka ni swikhutazo.
21. I yini swi nga ta hi sivela ku pfumelela ku nga hetiseki ka van’wana ku onha vuxaka bya hina na Yehova?
21 I ntiyiso leswaku ku nga hetiseki ka vanhu ku ta tikomba, hambi ku ri exikarhi ka malandza ya Xikwembu. Hinkwerhu hi endla swihoxo siku na siku. (Yakobo 3:2) Kambe xana hi ta titshika hi khunguvanyisiwa hi ku nga hetiseki ka van’wana kutani hi swi tshika swi onha vuxaka bya hina na Yehova? Leswi na hina hi endlaka swihoxo, xana a hi nge rivaleli van’wana hi mukhuva lowu na hina hi lavaka ku rivaleriwa ha wona? (Matewu 6:14, 15) Loko hi ta tikomba hi ri lava faneriwaka hi ku tshama eMafambiselweni Lamantshwa ya ku rhula ya Xikwembu, sweswi hi fanele ku komba vuswikoti bya hina byo hanyisana ni van’wana hi ku rhula. Hi nga ka hi nga rhandzi Xikwembu handle ko va nakambe hi rhandza vamakwerhu va moya va xinuna ni va xisati lava Kriste a va feleke.—1 Yohane 4:20, 21.
22. I ndhawu yihi leyi xikhongelo xi faneleke ku va na yona evuton’wini bya hina?
22 Vuxaka bya wena lebyinene ni Xikwembu byi ku nyika lunghelo rin’wana ro saseka: ku tshinelela Xikwembu hi xikhongelo hi ntshembo wa leswaku xa ku yingisa. Tsakela lunghelo rolero kutani u ri tirhisa siku na siku, siku hinkwaro. Swiphiqo swi ta humelela. Ku nga hetiseki ka wena ku nga ha va xiphiqo eka wena. Kambe Bibele ya laya: “Mi nga vileli ha nchumu; kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi kombela mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.”—Vafilipiya 4:6, 7.
23. Loko hi hlangavetana ni miringo ni ku hlupheka hikwalaho ka ripfumelo ra hina, i yini lexi nga ta hi pfuna ku tiyisela?
23 Hi ku hlawula ku tirhela Yehova, Xihlovo xa ntiyiso xa ku rhula ni nsirhelelo, ni ku veka ntshembo wa wena eMafambiselweni yakwe Lamantshwa, u ta va u endle masungulo lamanene. Sweswi, hi laha Bibele yi vulaka ha kona, “swa fanela leswaku mi tiyisela, leswaku mi ta kota ku endla ku rhandza ka Xikwembu, mi ta amukela leswi xi nga mi tshembisa swona.” (Vaheveru 10:36) Loko u nantswile nkateko wa vuxaka lebyinene na Yehova, tiyimiseli leswaku u nga byi tshiki. U nga pfumeleli mintsako leyi hundzaka ya misava yi ku hambukisa. Hambi loko miringo leyi humaka eka misava leyi yo biha yi tika, tsundzuka leswaku leswi i swa xinkarhana. Ringanisa ni minkateko leyi Yehova a nga ta yi nyika lava n’wi rhandzaka, ku hlupheka ko tano a hi nchumu.—2 Vakorinto 4:16-18.
24. (a) I yini lexi ngopfu-ngopfu xi hi vangelaka ku tsaka namuntlha? (b) Ku fana ni mupisalema, minkarhi hinkwayo hi fanele ku titwa hi ndlela yihi ha Yehova ni vuxaka bya hina na yena?
24 Yana emahlweni ni ndlela ya vukhongeri, u tiyiseka leswaku i ndlela yo antswa ya vutomi sweswi ni leswaku yi ta yisa evuton’wini lebyi nga heriki eMafambiselweni Lamantshwa ya Xikwembu. (1 Timotiya 4:8) Tsakela vumbhoni bya ku tshinela ka Mafambiselo wolawo Lamantshwa ni ku rhula na nsirhelelo leswi nga heriki leswi ya nga ta swi tisa. Loko u ya emahlweni no aka vuxaka bya wena na Yehova, minkarhi hinkwayo titwi tanihi leswi mupisalema la huhuteriweke a titwiseke swona la tsaleke: “Xikwembu i ribye ra mbilu yanga, i ndzhaka ya mina hi laha ku nga heriki. Hikuva, waswivo lava tshinelaka kule na wena va ta fa. U herisa hinkwavo lava ku fularhelaka. Loko ndzi ri mina, ku tshinelela Xikwembu, i rifuwo ra mina eka Hosi Yehova, leswaku ndzi ta amba mintirho ya wena hinkwayo.”—Psalma 73:26-28.
[Swifaniso leswi nga eka tluka 181]
Ku Hlamusela eRivaleni