Ku Susa Khwiri
Nhlamuselo: Ku susa khwiri i ku humesa xitumbulukwa kumbe mbungu, lowu hi ntumbuluko wu nga swi kotiki ku hanya ehandle ka mbeleko. Ku huma ka khwiri handle ka xikongomelo kumbe ku onhakeriwa hi khwiri ku nga ha vangiwa hi ku nga hetiseki ka munhu kumbe ku vangiwa hi khombo. Ku susa khwiri hi vomu leswaku munhu a papalata ku tswala n’wana loyi a nga n’wi laviki i ku dlaya vutomi bya munhu hi vomu.
Xana Xihlovo xa vutomi bya munhu xi fanele xi khumba mavonelo ya hina emhakeni leyi hi ndlela yihi?
Mint. 17:28: “Eka xona [Xikwembu], ha hanya, ha tshuka-tshuka, naswona, hi va kona.”
Ps. 36:9: “Nseledyana ya v̌utomi yi na wena [Yehovha Xikwembu].”
Rhom. 14:12: “Un’wana ni un’wana wa hina ú ta tihlamulela hi yexe emahlweni ka Xikwembu.”
Xana Yehovha u languta vutomi bya n’wana byi ri bya risima hambi emasungulweni ya ku kula ka yena endzhaku ka loko a tikiwile?
Ps. 139:13-16: “[Yehovha] u nḍi v̌umbile khurini ra manana. . . . Mahlo ya wena ma v̌onile ku v̌umbiwa ka [mina], kutani masiku ya mina ma ṭariwile hikwawo e bukwini ya wena.”
Xana Xikwembu xi kale xi vula leswaku munhu u ta va ni nandzu loko a vavisa n’wana la nga siki velekiwaka?
Eks. 21:22, 23: “Loko v̌anhu v̌a lwa, kutani v̌a wisa wansati l’a tikeke, loko a humeriwa hi khuri, kambe a nga fi, o ta rihiwa hi hakelo le’yi nga ta v̌ekiwa hi nuna wa yena; o ta rihiwa e mahlweni ka v̌aav̌anyisi. Kambe loko wansati a fa, u ta riha v̌utomi hi v̌utomi.” (Vuhundzuluxeri byin’wana byi swi endla swi vonaka onge eka nawu lowu wa le Israyele mhaka ya nkoka a ku ri leyi humelelaka eka manana, hayi eka mbungu. Hambi swi ri tano, tsalwa ra masungulo ra Xiheveru ri kombisa khombo lerikulu leri nga humelelaka eka manana kumbe eka n’wana.)
Xana ku dlaya munhu hi xivangelo lexi nga amukeriwiki hi Xikwembu i nandzu lowukulu ku fikela kwihi?
Gen. 9:6: “Uṅwana ni uṅwana l’a nga ta halata ngati ya munhu, ngati ya yena yi ta halatiwa hi munhu-kulobye; hikuv̌a Šikwembu ši endle munhu hi šifaniso ša šona.”
1 Yoh. 3:15: “Ku hava mudlayi loyi vutomi lebyi nga heriki byi tshamaka eka yena.”
Eks. 20:13: “U nga ṭhuki u dlaya.”
Xana mavonelo ya dokodela ya leswaku ku tshika khwiri ri kula hi ku helela swi ta vavisa rihanyo ra manana, ma vula leswaku swi fanerile ku susa khwiri?
Nkarhi wun’wana mianakanyo ya vutshunguri ya hoxisa. Xana swi nga va swinene ku dlaya munhu-kuloni hi mhaka ya leswi kumbexana yoloye a nga tshukaka a vavisa munhu-kulobye? Loko enkarhini wa ku velekiwa ka n’wana ku fanele ku hlawuriwa exikarhi ka vutomi bya manana ni bya n’wana, nhlawulo wu le mavokweni ya vanhu lava khumbekaka. Hambi swi ri tano, nhluvuko wa vutshunguri ematikweni yo tala wu endle leswaku xiyimo lexi xi nga tali ku va kona.
Loko Munhu A Ku—
‘Kambe ndzi ni mfanelo yo endla swiboho etimhakeni leti khumbaka miri wa mina.’
U nga ha hlamula u ku: ‘Ndzi twisisa ndlela leyi u titwaka ha yona. Minkarhi yo tala namuntlha timfanelo ta hina ti tekeriwa ehansi hi van’wana; vo tala a va na mhaka leswaku ku endleka yini eka vanhu van’wana. Kambe Bibele yi nyika swikongomiso leswi swi nga hi sirhelelaka. Kambe, leswaku hi vuyeriwa, hi fanele hi tlhela hi amukela vutihlamuleri.’ Kumbexana u nga engetela u ku: (1) ‘Vamanana vo tala va tshikiwile hi vavanuna lava tswaleke vana va vona. Kambe emutini lowu wanuna ni wansati va hanyaka hi mimpimanyeto ya Bibele, wanuna u ta rhandza nsati wakwe ni vana vakwe naswona u ta tshama na vona hi ku tshembeka, a va hlayisa. (1 Tim. 5:8; Ef. 5:28-31)’ (2) ‘Loko hina vini hi ta kuma rirhandzu ni xichavo xa muxaka wolowo, hi fanele hi tirhisa mimpimanyeto ya Bibele eka ndlela leyi hi langutaka swirho swa ndyangu wa hina ha yona. Xana Bibele yi ri hi fanele hi va languta njhani vana lava hi va tswalaka? (Ps. 127:3; ringanisa Esaya 49:15.)’